Son günlər Azərbaycan Milli Elmlər Akademiyası ilə bağlı müxtəlif məlumatlar yayılır. Məlumdur ki, AMEA-da rəhbər vəzifədə çalışacaq şəxslər seçki ilə təyin olunmalıdır.
Akademiyanın müxtəlif şöbələrində rəhbər vəzifədə çalışmaq istəyən şəxslər öz namizədliyini verir. Ancaq məlumatlara görə, AMEA-da ədalətli seçki keçirilmir. Akademiyanın Rəyasət Heyəti kimi məsləhət görərsə, həmin şəxslər vəzifəyə təyin olunur. Beləliklə, adı seçki olsa da, bu sadəcə formal xarakter daşıyır.
Həmçinin, onu da qeyd edək ki, müdafiə şuraları ilə bağlı narazılıqlar var. Belə ki, əvvəllər hər bir sahənin ayrı-ayrı müdafiə şurası var idi. Ancaq Ramiz Mehdiyev Akademiyaya prezident gəldikdən sonra bütün sahələr üzrə müdafiə şurası birləşdirildi. Ekspertlər isə bunun düzgün qərar olmadığını düşünür.
Məsələ ilə bağlı fikir bildirən Təhsil Nazirliyi yanında İctimai Şuranın üzvü, Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov bildirdi ki, AMEA-da institut direktorları, şöbə müdiri vəzifəsinə təyinat Rəyasət Heyətinin qərarı ilə reallaşır: “Qeyd olunan qurumda rəhbər vəzifədə çalışacaq şəxslər formal şəkildə seçilir. Belə olan halda ləyaqətli, işinin peşəkarı olan şəxslər kənarda qalır”.
Həmsöhbətimiz onu da əlavə etdi ki, hazırda akademiyada alimlərə qarşı hörmətsizlik mühiti formalaşıb: “Məlumdur ki, AMEA kollegial qurumdur. Təəssüf ki, akademiyanın Rəyasət Heyətinin üzvləri də yerində olmur. Bu da açıq-aşkar akademiyanın idarə olunmasında özünü göstərir. AMEA-da sonuncu seçkilər keçirilərkən ona əvvəlki prezidentin etdiyi səhvlər və onların düzəlməsinin vacibliyi barədə məlumat vermişdik. Ancaq ümidlərimiz doğrulmadı. Akademiyada bərbad idarəçilik hökm sürür. Akademiyada dahi şəxslər çalışıb. Hansı ki onlar Azərbaycan elmi üçün öz sözlərini deyiblər. Ancaq indi AMEA-nın Rəyasət Heyəti, institut direktorları haqqında danışmağa dəyməz. Onu da qeyd edim ki, bu gün akademiyaya gənclər müraciət etmir, gəlmir. Mahmud Kərimovun vaxtında orada böyük bir gənclik hərəkatı yaranmışdı”.
Günel CƏLİLOVA
