Redaksiyamıza daxil olmuş məlumata görə, Abşeronun Masazır kəndinin sakinləri ölkə Prezidenti cənab İlham Əliyevə və Birinci vitse-prezident Mehriban xanıma müraciət ediblər. Kənd sakinlərini aylardır narahat edən və əsası keçmiş başçı İradə Gülməmmədova tərəfindən qoyulmuş cinayət əməllərinin hələ də davam etdirilməsidir.
Kənd sakinləri bildirir ki, uzun illər rayon icra başçısı, rayonun memarı və bələdiyyə başçısından ibarət cinayətkar dəstənin harınlığı və özbaşınalığı o həddə çatıb ki, boş sahələri bina tikintisi üçün MTK-lara satmaq bir yana qalsın, hətta həyətlərin arasında da çoxmərtəbəli tikintilərin kütləvi şəkildə aparılmasına icazə veriblər. Kəndin Yeni Bakı yaşayış massivinə təxminən bitişik Rəsul Rza küçəsində artıq başlanmış azı 9 mərtəbəli binaların tikintisini misal göstərmək olar. İlk əvvəl sakinlər aldadılır ki, guya maksimum üç mərtəbəli kiçik fərdi evlər tikilir. Lakin başlayandan sonra məlum olur ki, azı 9- 10 mərtəbəli hündür yaşayış binaları tikilir. Sakinlər bildirir ki, onların rahatlığı pozulub, ərazidə yaşayış həm də təhlükəli olmağa başlayıb, çünki artıq yaşayış olan fərdi evlərlə divar-divara yapışıq olan çoxmərtəbəli binaların yanında necə təhlükəsiz olmaq olar?
Sakinlər ölkə rəhbərliyinin diqqətinə çatdırır ki, keçmiş icra hakimiyyəti aşkar qanunsuzluğa yol verib. Belə ki, yalnız həyətyanı sahə və fərdi evlər tikintisi üçün paylanmış pay torpaqlarda çoxmərtəbəli tikintilərə icazə verilməsi cinayətdir. Hələ o da var ki, memarlıq və şəhərsalma qaydalarına tam zidd olan bu çoxmərtəbəli tikintilərə Fövqəladə Hallar Nazirliyi necə və nə əsasla icazə verib. Sakinlər Fövqəladə Hallar Nazirliyinin yerli idarəsindən və polis idarəsindən soruşur ki, bu böyüklükdə qanunsuz tikinti onların gözündən necə "yayındırılıb"?..
Maraqlıdır ki, fərdi ev tikintisi üçün müraciət edərək bələdiyyədən və ya icra hakimiyyətindən 3, ya 6 sot torpaq payı götürən fərdi şəxslər nə ixtiyarla ərazinin təyinatını dəyişdirir? Masazır sakinləri hesab edir ki, öz pay torpağını bina tikintisi üçün satmış vətəndaşlar da ağır məsuliyyət daşıyır. O məntiqlə ki, sənə fərdi ev tikintisi üçün torpaq lazım deyildisə, onu niyə götürürdün? Fərdi torpaqlarda tikilən çoxmərtəbəli binaların işıq, su və kanalizasiya infrastrukturlarının necə olacağı da yanaşı qonşuların rahat yuxusuna haram qatıb.
İradə Gülməmmədova qandallanmamışdan öncə ilk mərhələdə Bakı-Novxanı yolunun Masazırın ortasından keçən hissəsinin iki tərəfindəki həyətləri hədəfləmişdi. İndi Respublika əhəmiyyətli yolun hər iki tərəfi saysız çoxmərtəbəli binalardan ibarətdir. Fərdi ev tikintisi üçün nəzərdə tutulmuş torpaqlarda azı 9 mərtəbəli binalar ucalır. Onsuz da dar olan Bakı-Novxanı yolunun taleyi necə olacaq? Bu binalarda mənzil alanlar hansı ağılın sahibləridir? Bu binaların heç birinin həyətyanı sahəsi, yeraltı qarajı deyilən bir şey yoxdur. Sakinlər deyir ki, burada insanlar gələcəkdə bir-birini sözün həqiqi mənasında qıracaq. Bu darısqallıqda və sıxlıqda sakit yaşamaq sadəcə mümkün deyil.
Görünür İradə Gülməmmədovanın dişləri cinayətin şirəsinə necə batdısa, şirniklənərək Masazırın içindən keçən yolun sağ-sol sahilindəki torpaqlarda qanunsuz bina tikintilərindən sonra məhəllələrdəki fərdi evlərin də yerində uca binaların tikintisinə icazə verməyə başladı. Yaxşı ki, Gülməmmədova ölkə Prezidenti tərəfindən vaxtında zərərsizləşdirildi. Əgər Gülməmmədova bu günə qədər başçı olsaydı, fərdi evlərin arasında mal və toyuq fermalarının salınmasına da icazə verərdi. Ancaq, İradənin kökünü qoyduğu cinayətkar tikintilər hələ davam etdirilir və rayon icra hakimiyyətinin yeni başçısı Abdin Fərzəliyevin bu qanunsuzluqlara necə reaksiya verəcəyi də sakinlər üçün maraqlıdır.
Sakinlər bu günlərdə icra başçısının özünə şəxsən şikayət etməyə hazırlaşırlar.
Masazır sakinləri dövlət başçısı cənab İlham Əliyevdən və Mehriban xanımdan məsələyə dərhal müdaxilə etməyi və yaşayış evlərinin arasında qorxulu və qanunsuz bina tikintilərinin təcili dayandırılmasını xahiş edirlər.
Baki-xeber.com
