Bakının illərdir həll olunmayan problemlərindən biri də zibil məsələsidir. Yaşayış binalarının həyəti, ətrafı, kafe və restoranların önü və s.
Evinin içini düzəldib, zibilini isə küçəyə atan adamların sayı, bunu etməyənlərdən qat-qat çoxdur. Avtomobilində yola gedən zaman yediyi yeməyin, çəkdiyi siqaretin qutusunu küçəyə atanlar, zibil qutusu ola-ola zibili qutuya yox, onun ətrafına tullayanlar, eyvana çıxıb, iylənmiş zibilini aşağı atanlar... Bu sıraya çox şey əlavə etmək olar. Bütün bunlarla tez-tez rastlaşırıq.
Bakı sakinlərində günah olduğu kimi, aidiyyəti orqanlar da məsuliyyətdən qaçmalı deyil. Bakının bəzi küçələrində zibil qutuları çox azdır. Elə küçələr var ki, oradan zibil qutusu ümumiyyətlə yoxdur. Əslində isə yaşayış binalarının ətrafından əlavə, adi küçələrdə 50 metrdən bir balaca zibil qutuları olmalıdır ki, yolla gedən şəxslər qutulardan istifadə edə bilsinlər. Çünki bəzən elə olur ki, bəzi Bakı sakinləri normal insan kimi əlində tutduğu kağızı, paketi atmaq üçün zibil qutusu axtarır, amma bir neçə küçəni adlasa da, istəyinə nail ola bilmir. Sonda hansısa dönər evinin, marketin çöldə qoyduğu kağız qutuya öz zibilini atmalı olur.
Hətta zibil qutuları elə yerdə qoyulur ki, əlindəki zibili qabına atmaq istəyən şəxs həyatını riskə atmalı olur. Belə ki, paytaxtın bir sıra ərazilərində zibil qutularının qoyulması üçün ayrılan yer düzgün seçilməyib. Məsələn, Xətai rayonu Məhəmməd Hadi küçəsindəki bu məkan kimi. Əhmədli metrostansiyasının yaxınlığında qoyulan zibil konteynerləri düz avtobus zolağının üzərindədir. Bu da həm nəqliyyatın hərəkətinə mane olur, həm də ora zibil atmağa gələn sakinlərin həyatını təhlükəyə salır.
“Zibil qabları dayanacaqların düz yanında qoyulur, bu vəziyyət həm zibil qabına zibil atanların həyatını riskə atır, həm də yolun ortasında zibil qalığının yaranmasına səbəb olur”
Sosioloq Aytəkin Kamranqızı bildirdi ki, küçələrdəki zibil qablarının sayı azdır: “Zibil sahələri üçün az yerlər ayrılır. Hətta elə yerlər var ki, zibil qabları qoyulur ancaq düzgün yerdə deyil. Elə yerlər var ki, zibil qabları dayanacaqların düz yanında qoyulur. Bu vəziyyət həm zibil qabına zibil atanların həyatını riskə atır, həm də yolun ortasında zibil qalığının yaranmasına səbəb olur. Zibil konteynerləri üçün ərazi seçilərkən bir neçə amil nəzərə alınmalıdır. Metro ətrafında, məktəbin yanında, dayanacaqda zibil konteynerləri qoyulmamalıdır. Hər şeydən öncə sakinlərin rahatlığı nəzərə alınmalıdır. Avtobus zolağında zibil qabının qoyulması insanların həyatını təhlükəyə salır. Həmçinin, həmin yoldan keçən avtomobillər zibili necə gəldi atırlar. Nəticədə həmin ərazidə xoşagəlməz mənzərə yaranır”.
Günel CƏLİLOVA
