“Biz bunu ona görə edirdik ki, azərbaycanlı gəncləri yetişdirək, onlar gözəl peşə sahibləri olsunlar, mütəxəssis olsunlar. Əsas məqsəd budur - xalqımızın intellektual potensialının möhkəmləndirilməsi”. Bu fikirləri Prezident İlham Əliyev gənclərlə görüşdə xaricdə təhsil proqramı ilə bağlı sualı cavablandırarkən bildirib.
Dövlət başçısının sözlərinə görə, gənclər 30-dan çox ölkənin 300-dən çox ali məktəblərinə ezam edilib və bu məqsədlər üçün 200 milyon manat vəsait xərclənib. Prezident bildirib ki, 2016-cı ildə biz bu proqrama başlayanda Azərbaycanda vəziyyət elə idi ki, bir çoxları bəlkə də orada, xaricdə qalmağı seçə bilərdilər. Ancaq buna baxmayaraq, dövlət xətti ilə oxuyanların böyük hissəsi Azərbaycana qayıdıb.
Prezident İlham Əliyev yeni proqramın artıq işlənildiyini və müvafiq sərəncamın keçən il verildiyini deyərək bildirib: “Yəqin ki, bu ildən başlayaraq, biz bu proqramı bərpa edəcəyik, yeni formada bərpa edəcəyik. Yəni, əvvəl birinci proqramın tutaq ki, çatışmazlıqları nəzərə almaq şərtilə. İldə təqribən 400-ə qədər gənc dünyanın aparıcı ali məktəblərinə göndəriləcəkdir”.
“Gələcəkdə uğurlu kadr təminatını yaxşılaşdırmaq üçün gənclərimiz xarici ölkələrdə təhsil almağa göndərilir”
Hər il xarici təhsil almaq üçün 400-ə qədər gəncin göndərilməsinin əhəmiyyəti haqqında danışan Azərbaycan Respublikası Təhsil Nazirliyi yanında İctimai Şuranın üzvü, Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov “Bakı-Xəbər”ə bildirdi ki, 2007 ci ildə 2015-ci Azərbaycan gənclərinin xaricdə təhsili üzrə Dövlət Proqramı hazırlanıb. Həmin proqramı çərçivəsində 3500-dən çox gənc dünyanın aparıcı ali təhsil müəssisələrinə təhsil almaq üçün göndərildi: “Xüsusilə qeyd edim ki, həmin gənclər müasir dövrün tələbinə cavab verən ixtisaslar, eyni zamanda, ölkəmiz üçün strateji əhəmiyyət kəsb edən sahələr üzrə oxumağa göndərildi. Artıq həmin dövlət proqramı sona çatıb. 2 fevral tarixində Prezident İlham Əliyev haqqında bəhs etdiyi proqram Azərbaycan gənclərinin təhsil alması ilə bağlı növbəti layihədir. Məlumat üçün qeyd edim ki, gənclərin xaricdə təhsili ilə bağlı dövlət proqramı hazırlanır. Azərbaycanın gəncləri dünyanın müxtəlif ölkələrində, ən yaxşı təhsil ocaqlarında ali təhsil alacaqlar. Həmin gənclər dövlət hesabına xaricdə təhsil almaq imkanı qazanacaqlar. Məlumat üçün qeyd edim ki, bu sahədə sərf olunacaq vəsaiti Dövlət Neft Fondu qarşılayacaq”.
Həmsöhbətimizin sözlərinə görə, Azərbaycan gənclərinin xaricdə təhsil alması ilə bağlı proqramın hazırlanmasının səbəblərindən biri də ölkə daxilində olan universitetlərin rəqabətqabiliyyətini artırmaqdır: “Doktorantura pilləsi üzrə Azərbaycan gəncləri dünyanın elm tutumlu mərkəzlərinə göndərildi. Prezident İlham Əliyevin “neft kapitalını, insan kapitalına” şüarı birbaşa Azərbaycanın gələcəyinə ünvanlanıb. Gələcəkdə uğurlu kadr təminatını yaxşılaşdırmaq üçün gənclərimiz xarici ölkələrdə təhsil almağa göndərilir. Ümumiyyətlə, qarşıya qoyulan məqsədlərdən biri də əmək bazarında rəqabətqabiliyyətini artırmaqdır”.
İ.Orucov onu da əlavə etdi ki, birinci dövlət proqramı çərçivəsində təhsil alan gənclər bu gün dövlət qurumlarında, elmi müəssisələrdə çalışır: “Xaricdə təhsil alıb geri qayıdan gənclərin potensialından dövlətin inkişafı naminə istifadə olunur. Azərbaycanda savadlı, bilikli gənclərdən peşəkar kadr hazırlanması çox vacibdir. Azərbaycan dövlət başçısının həyata keçirdiyi siyasətin kökündə gənclərin savadlı, bilikli olması dayanır”.
Ekspertin dediyinə görə, yeni dövlə proqramı çərçivəsində xeyli sayda gənc xaricdə təhsil alacaq. Birinci dövlət proqramında 3500-dən çox gənc təhsil aldı. Həmin gənclərin bir qismi ali təhsillərini bitirdikdən sonra ölkəyə qayıtmadı, ancaq Azərbaycanın elit diasporasının formalaşmasından xüsusi rolları oldu: “Savadlı gənclərimiz xaricdə tanınmış şirkətlərdə çalışır, onlar yüksək hörmətə, nüfuza malikdirlər. Həmin gənclər Azərbaycanın simasıdır. 44 günlük Vətən müharibəsi zamanı dövlət proqramı çərçivəsində təhsil alan gənclər Azərbaycanın haqq səsini dünyaya çatdırdılar”.
Günel CƏLİLOVA
