İndi Azərbaycan ovaxtkı Azərbaycan deyil, Bakı indi dünyanın ən gözəl şəhərlərindən biridir. Azərbaycanda olan infrastruktur bir çox ölkələr üçün nümunə ola bilər. Ölkəmizin mədəni həyatı çox zəngindir və insanlar burada özlərini çox rahat hiss edirlər. Heç bir təhlükə yoxdur - sabitlik, əmin-amanlıq, xoş ab-hava.
Bu fikirləri Prezident İlham Əliyev gənclərlə görüşdə xaricdə təhsil proqramı ilə bağlı sualı cavablandırarkən bildirib.
Dövlətimizin başçısının sözlərinə görə, hazırda Azərbaycan iqtisadiyyatı dünya iqtisadiyyatının bir parçasıdır, əmək resurslarımız da həmçinin: “İndi bir çox azərbaycanlılar var ki, xaricdə işləyirlər, yaşayırlar. Mən bunu ancaq alqışlayıram. Nə qədər çox olsa, necə deyərlər, bizim adımızı onlar ucaldırlar. Amma, eyni zamanda, Azərbaycanda və xüsusilə Bakıda açılan yeni böyük müəssisələrdə və xidmət sektorundakı müəssisələrdə menecerlər, top menecerlər xaricilərdir. Bu, belədir. Mən demirəm ki, bu yaxşıdır, ya pisdir. Yenə deyirəm, Azərbaycan çox qonaqpərvər ölkədir, hər kəs üçün burada yer var və bunu alqışlayıram, onlar gəlirlər təcrübəni bölüşürlər. Amma, eyni zamanda, nə üçün xaricilərdir, çünki yerli kadrlar hələ ki, tam uyğun deyillər. Ona görə xaricdə aparıcı ali məktəblərdə təhsil alanlar gəlib burada həmin bu vakansiyalarda işləsinlər və Vətənə burada xeyir gətirsinlər”.
Deməli, xaricdə təhsiı alanlarla bağlı problem ciddidir. Hətta dövlət hesabına təhsil alanların çoxu ölkəyə qayıtmır. Hansı amillər savadlı gənclərin ölkəyə qayıdışına mane olur?
Təhsil məsələləri üzrə ekspert, professor Məhərrəm Zülfüqarlı “Bakı-Xəbər”ə açıqlamasında bildirdi ki, Prezidentin toxunduğu məsələ olduqca ciddidir: “Bilirsiniz ki, dövlətin və SOCAR-ın dəstəyi ilə gənclərin xarici ölkələrdə təhsili təşkil edilib. Bundan çoxlu sayda tələbə bəhrələnib. Ancaq onların geri qayıdıb, işləmısi problemə çevrilib. Çünki bura gələndə, həmin gənclər özlərinə layiq olan işlə təmin edilmirlər. Bu səbəbdən də başqa ölkələri seçirlər. Onların ölkədə qalmasını stimullaşdıran addımlar atılmalıdır. Qərb standarlarına uyğun əmək haqqları verilsə, onlar gəlib həvəslə ölkədə işləyərlər. Bunu həll etmək üçün bizdə ciddi islahatların aparılmasına ehtiyac var. Azərbaycan ailəsinin əziyyətlə böyüdüb, təhsil verdiyi “hazır məsulu” xarici şirkətlər ələ keçirir. Dövlətimiz elə etməlidir ki, milli kadrlarımız özümüzə xidmət etsin. Ən azı Türkiyə təcrübəsindən nümunə götürməliyik. Onlarda kadrların yerləşdirilməsi mexanizminə fikir versək, yaxşı nümunələr götürə bilərik”.
Məhəmmədəli QƏRİBLİ
