Məlum olduğu kimi ətraf mühit eko-sistemləri arasında tarazlığın qorunub saxlanması üçün yaşayış məntəqələrində kanalizasiya sisteminin mükəmməl qurulması əsas şərtlərdən biridir. Mükəmməl qurulan kanalizasiya sistemi həm də əhalinin və ərazinin ekoloji vəziyyətinin tənzimlənməsində mühüm rol oynayır.
Beynəlxalq təşkilatların araşdırmalarına görə, normal kanalizasiya sistemi mövcud olan yaşayış məntəqələrində əhali epidemya və raspirator xəstəliklərə, kanalizasiyası sistemləri olmayan məntəqələrdə yaşayan əhaliyə nisbətən bir neçə dəfə az yoluxur. Araşdırma qrupuna daxil olan həkimlər və ekoloqlar belə qənaətə gəliblər ki, çirkabın kanalizasiya vasitəsi ilə kənara axıdılıb zərərsizləşdirilən ərazilərdə atmosferə zərərli qazlar da az miqdarda atıldığından, belə ərazilərdə yaşayan əhalinin arasında epidemiya və respirator xəstəliklərə daha az rast gəlinir. Abşeron yarmadasının yaşayış məskənlərinin kanalizasiya sistemində mövcud olan qüsurlar, daha iki problemə birbaşa təsir göstərir.
Abşeron rayonu Hökməli bələdiyəsi, Atyalı yeni yaşayış massivində su və kanalizasiya xətti yoxdur. Yaşayış massivinin sakinləri qeyd edir ki, 2 ildir fasilələrlə Abşeron Sukanal idarəsinə müraciət etsələr də, hər hansı nəticə əldə etməyiblər: “Biz yaşayan qəsəbədə su və kanalizasiya xətti yoxdur. Qonşularla qərara aldıq ki, bir yerə toplanıb öz hesabımıza su və kanalizasiya xətti çəkək. Buna da imkan vermirlər. Bəzi qonşular Abşeron Sukanal idarəsinə sayğac pulu (hər ailə 200-250 manat) verdikdən sonra su xətti çəkə biliblər. Bizim isə buna gücümüz çatmır. Digər bütün xərcləri biz çəkəcəyik. Buna görə qəsdən süründürməçiliyə salıblar”.
“Azərsu” ASC-nin Mətbuat Xidmətinin rəhbəri Anar Cəbrayıllı bildirdi ki, müraciətlər əsasında təkliflər hazırlanaraq hökumətə təqdim olunub: “Hər kəsin istədiyi kimi gəlib xətt çəkməsinə icazə yoxdur. Su ilə təminat iki halda aparılır. Birincisi, texniki şərt - ərazidə şəbəkə varsa, abonentlər həmin su şəbəkəsinə qoşulur. İkinci halda isə investisiya hesabına yeni şəbəkə qurulur və əhaliyə su verilir. Həmin ərazi ilə bağlı bizə də müraciətlər daxil olub. Bizim Layihə Planlama Departamenti tərəfindən məsələ ilə bağlı təkliflər hazırlanıb və “Azərsu” ASC tərəfindən hökumətə təqdim olunub. Yəni vəsait ayrıldığı təqdirdə orada işlər icra oluna bilər”.
Günel CƏLİLOVA
