Havalar soyuduqca paytaxt sakinlərinin də istiliklə bağlı qayğıları artır. Hazırda Bakıda yaşayış binalarının bir qisminə istilik verilsə də, illərdir istilik üzünə həsrət qalan sakinlər də az deyil. Məlumdur ki, “Azəristiliktəchizat” ASC noyabrın 1-dən ölkənin ucqar rayonlarında, noyabrın 15-dən isə Bakı və ətraf ərazilərdə qış rejiminə keçidlə bağlı binalara istilik verməlidir.
Ancaq bəzi ərazilərdə hələ də istilik problem yaşanır. Binəqədi rayonu Mir Cəlal 63A saylı binanın istiliyi kəsilib. Sakinlər qeyd edir ki, binanın istiliyinin kəsilməsinə səbəb borcun olmasıdır: “Binada 1000-dan çox insan yaşayır. Bir neçə şəxsin borcuna görə bütün binanın istiliyinin dayandırılması düzgün deyil. Nəzərə almaq lazımdır ki, binada xeyli sayda təmirsiz və yaşayış olmayan mənzillər var. bu mənzillərə görə də yaranan borc binanın borcu kimi hesablanır”.
“Azəristiliktəchizat”ASC - Rafiq Əliyev: “Həmin binanın hazırda 10 minə yaxın borcu var”
“Azəristiliktəchizat”ASC-nin Abonent və müştəri xidmətləri rəisi Rafiq Əliyev “Bakı-Xəbər”ə açıqlamasında qeyd etdi ki, artıq sözügedən yaşayış binası istiliklə təmin olunub: “Həmin binaya nəzarət edən komendant binada hansı mənzildə istiliyin olub-olmaması ilə bağlı bizə məlumat verir. “Azəristiliktəchizat”ASC-lə Mir Cəlal 63A saylı binanın istilik təchizatına dair münasibətlər həmin mənzil tikinti korperativi ilə qurum arasında bağlanmış müqavilə əsasında tənzimlənir. Biz ayrı-ayrı vətəndaşlarla müqavilə imzalamırıq. MTK-la müqavilə bağlanılır, ödənişi də bu qurum edir. Məlumat üçün qeyd edim ki, həmin binanın hazırda 10 minə yaxın borcu var. O binada elə bir mənzil yoxdur ki, onun borcu olsun. Borc barədə komendantın da məlumatı var. Komendant dəfələrlə etiraf edib ki, vətəndaşlar ödəniş etmək istəmir. Bu gün (dünən) sakinlərlə görüş keçirildi. Bir həftəlik istiliyi açdıq. Sakinlərə izah olundu ki, istilik haqqı tam şəkildə ödənilməlidir. Qanunvericilikdə də qeyd olunur ki, istilik haqqının dəyəri tam ödənilənə qədər istiliyin bir ay güzəştlə verilə bilər. Bir ay ərzində ödəniş edilməzsə, istilik təchizatı dayandırılır”.
Ilqar Hüseynli: “Ödəniş etməyən bir-iki adama görə bütün binanın istilik təchizatının dayandırıması düzgün deyil”
Sosial sahə üzrə ekspert, binanın sakini İlqar Hüseynli qeyd etdi ki, binada yaşayış olmayan çoxlu sayda mənzil var: “Təxminən 30-a yaxın mənzil təmirsiz vəziyyətdədir. Bir o qədər təmir olunub, lakin yaşayış olmayan mənzillərdə mənzillər var. Bu mənzillərin sayına görə daha çox borclanma yaranıb. Binanın istilik təminatı ilə bağlı müqavilə “Azəristiliktəchizat”ASC MKT arasında imzalanır. Onu da deyim ki, həmin binada yaşayan insanların bəzisi ödəniş etmir. Ödənişin edilməməsi ilə bağlı nəzarət mexanizmi tətbiq edilməlidir. Bir-iki adama görə bütün binanın istilik təchizatının dayandırıması düzgün deyil”.
Günel CƏLİLOVA
