Azərbaycanda məktəb direktorunun müəllimdən rüşvət istəməsinə dair səs yazısı yayılıb. Söhbət Ağstafa rayonu Aşağı Kəsəmən tam orta məktəbinin direktoru Mətanət Məmmədovadan gedir. Səs yazısına əsasən, direktor məktəbin müəllimi Vüsalə Məmmədovadan əlavə dərs saatları müqabilində hər ay ona pul verməsini tələb edir. V.Məmmədova isə imkanı olmadığını deyərək, pulu verə bilməyəcəyini bildirir.
Bundan sonra, direktor həmin müəllimi otaqdan qovur və bu barədə hardasa danışacağı təqdirdə onu cəzalandıracağı ilə hədələyir.
Şikayətçi Vüsalə Məmmədova məsələ ilə bağlı rayon Təhsil Şöbəsinə və Təhsil Nazirliyinə şikayət edib.
Mətanət Məmmədova: “Bu səs yazısı sırf böhtandır və mənə qarşı şantajdır”
Məsələ ilə bağlı Ağstafa rayon Şahin Abadov adına Aşağı Kəsəmən kənd orta məktəbinin direktoru Mətanət Məmmədova bildirdi ki, o 27.01.2022-ci il tarixində bəzi saytlarda Ağstafa Rayon Şahin Abadov adına Aşağı Kəsəmən kənd tam orta məktəbinin direktoru olaraq rüşvət istəməyi il bağlı yayılan səs yazısını qeyri-etik hal hesab edir: “Neçə illərdən bəri pedaqoji fəaliyyətimə olan hörmətsizlik kimi dəyərləndirirəm. Bildirirəm ki, məktəbin müəllimi Vüsalə Məmmədovanın (dediyinə görə kimsə şərti adla paylaşım edib) facebook sosial şəbəkəsində etdiyi paylaşım qanunsuzdur və heç bir halda qanunauyğun fəaliyyət hesab edilmir. Bu səs yazısı sırf böhtandır və mənə qarşı şantajdır. Cinayət məcəlləsinin 155 və156-cı maddəsinin tələblərini pozaraq ictimai rəydə mənimlə bağlı mənfi rəy formalaşdırmaqdır. Bir məktəb direktoru kimi rəhbərlik etdiyim pedaqoji kollektivə, hər tədris ilinin sonunda yetirmələrinin sədasının nüfuzlu ali məktəblərdən gəlməsində əməyi olan müəllimlərimizə yanlış münasibətdir. Neçə illik təcrübəsi olan bir direktora ədalətsizlikdir, onun ali təhsili olmayan bir müəllim tərəfindən məruz qaldığı şantajdır, qərəzdir”.
Nizami Hüseynov: “Direktorlarla müəllimlər arasında ən çox qalmaqal vəzifə səlahiyyətlərinin düzgün bölünməməsi ilə bağlıdır”
Təhsil eksperti Nizami Hüseynov bildirdi ki, bəzi məktəb direktorları öz vəzifələrinin öhdəsindən gələ bilmirlər: “Direktorların əksəriyyəti vəzifəyə gələn kimi kollektivlə yola getmirlər və daha çox təhsilin inkişafını yox öz maddi imkanlarını düşünürlər. Məktəbin bir neçə katibəsi, laborantı və texniki işçisi olmalıdır. Məktəb direktoru bu vəzifələri öz yaxın ailə üzvləri arasında bölür və onlar işə gəlmədən müəyyən əmək haqqı alırlar. Onların fəaliyyətini isə məktəbin digər işçiləri yerinə yetirirlər. Bəzən görürük ki, məktəbin mühafizəçisi sənəd üzərində olsa da, məktəbdə yoxdur. Direktorlarla müəllimlər arasında ən çox qalmaqal vəzifə səlahiyyətlərinin düzgün bölünməməsi ilə bağlıdır. Müəllimlərlə direktorla arasında ən ciddi konfliktlərdən biri də maddiyatla bağlıdır. Məktəbdə neqativ hadisələr baş verirsə, təbii ki, bu şagirdlərə yaxşı nümunə deyil. Ona görə də ilk növbədə məktəb direktorları təyin olunan zaman onların hərtərəfli araşdırılması lazımdır. Fikrimcə, Təhsil Nazirliyi məktəblərdə dərs bölgülərini elektron qaydada həyata keçirməlidir. Bir çox hallarda direktorlar diaqnostik imtahanlarda az bal toplayan müəllimlərə pul qarşılığında çox dərs saatı verir. Bəzən görürük ki, savadlı müəlimlərin dərs saatı azdır. Bütün bunlar sonra konfliktlərin baş verməsinə gətirib çıxarır. Ona görə də belə məsələrə ciddi nəzarət edilməlidir və bu tipli hadisələrə yol verən direktorlar mütləq şəkildə cəzalanmalıdır”.
Günel CƏLİLOVA
