Mətbuatın yazdığına görə, 67 yaşlı qadın sağ olduğu halda ölmüş kimi qeydiyyata alınıb. Ağcəbədi rayonu, Cəfərbəyli kənd sakini Həmayıl Əliyeva bu səbəbdən çıxılmaz vəziyətdə olduğunu bildirir.
1955-ci ildə Ağcabədi rayonu, Cəfərbəyli kəndində anadan olmuş Həmayıl Əliyeva mətbuata bildirib ki, artıq 4 aydır, pensiyası dayandırlıb. Səbəb isə sistemdə ölü kimi qeydiyyatda olmasıdır. 2-ci qrup əlil olan Cəfərbəyli kənd sakininin ötən ilin oktyabr ayından pensiyası kəsilib. Kartından pul çıxarmaq istəyəndə orada vəsaitin olmadığını görüb. Ağcabədi Rayon Dövlət Sosial Müdafiə Fonduna müraciət etdikdə isə bildirilib ki, o, ölmüş adam kimi qeydiyyata alınıb. Həmayil Əliyeva əlavə edib ki, bununla bağlı üz tutduğu bərpa mərkəzindən də eyni cavabı alıb. Xanımın övladının məsələ ilə bağlı üz tutmadığı ünvan da qalmayıb.
67 yaşlı Həmayıl Əliyeva necə “ölü” kimi qeydiyyata salına bilərdi? Bu sistem xətasıdır, yoxsa məqsədli şəkildə edilə bilər?
Rəşad Mehdili: “Onun müraciəti araşdırıldıqdan sonra ödəniş bərpa edilib”
Məsələyə Dövlət Sosial Müdafiə Fondundan münasibət öyrənmək üçün quruma sorğu göndərdik. “Bakı-Xəbər”ə hazırda vətəndaşın üzləşdiyi problemin dərindən və hərtərəfli araşdırıldığını deyən Fondun mətbuat xidmətinin rəhbəri Rəşad Mehdili bildirdi ki, məsələ ətraflı araşdırılıb: “Bəzi sosial şəbəkə səhifələri və KİV-də Ağcabədi rayon sakini Əliyeva Hamayıl Məmiş qızının vəfat etmiş şəxs kimi qeydiyyata alınaraq pensiyasının dayandırılması barədə yayılan məlumatla əlaqədar bildiririk ki, həmin vətəndaşın pensiyasının ödənişi hazırda davam edir. Pensiya ödənişi prosesi elektron sistemlər üzərindən avtomatlaşdırılmış qaydada, aidiyyəti qurumların informasiya bazalarına inteqrasiya şəraitində həmin bazalardakı məlumatlara istinad edilməklə həyata keçirilir. Aidiyyəti orqanın informasiya bazasında vətəndaşa məxsus FİN nömrəsi altında başqa şəxsin vəfat etdiyi rəsmiləşdirildiyindən pensiya üzrə e-sistemdə də bu ödəniş avtomatik dayandırılıb. Onun müraciəti araşdırıldıqdan sonra ödəniş bərpa edilib. Növbəti ödəniş günü – yanvarın 28-də vətəndaşın almadığı pensiya da daxil olmaqla tam ödənişi həyata keçiriləcək”.
Məsələyə eskpert rəyi də öyrəndik. Çünki belə hallara kütləvi olmasa da, amma rast gəlinir, qanunsuz olaraq vətəndaşların müavinətinin kəsildiyinn, pensiyasının dayandırıldığının şahidi olmuşuq. Belə hallarda aidiyyatı qurumlar əsasən “sistem xətasıdır” deyib problemi həll etdiklərini bildirirlər.
Akif Nəsirli: “Analoji hadisə bir neçə il əvvəl Bakı kəndlərindən birində də baş vermişdi”
İqtisadçı Akif Nəsirli bizimlə söhbətində bildirdi ki, həyatda yaşayan bir şəxsin adının sistemə “ölü” kimi salınmasının sistem xətası olub olmadığını dəqiq bilmir, bunu sistem üzrə mütəxəssislər deyə bilər. “Amma analoji hadisə bir neçə il əvvəl Bakı kəndlərindən birində də baş vermişdi. Bir neçə qadına saxta sənəd düzəltmişdilər ki, guya onlar dünyalarını dəyişiblər. Məqsəd də həmin qadınların adlarına olan torpaq sahələrini özəlləşdirmək olub. Yəni daşınmaz əmlakı onların adından çıxarmaq üçün onları “ölü” çıxarıb istəklərinə nail olublar. Onların “ölümü” hökumət portalında əksini tapdığına görə, bir tərəfdən onların adlarına saxta ölüm şəhadətnaməsi hazırlayıb torpaq sahələrini özəlləşdirilmişdi, digər tərəfdən də Pensiya Fondu pensiyaların dayayandırılıb. Pensiya dayandırılanda isə araşdırılıb ki, həmin adamların adına ölüm şəhadətnaməsi var. Sonra məlum olub ki, saxta ölüm şəhadətnaməsi onlar əlindən torpaq sahəsini çıxarmaq məqsədilə hazırlanıb. Sonradan onlar prokurorluğa bununla bağlı müraciət etdilər. Amma məsələnin həll edilib edilmədiyini bilmirəm.
İndi bu xanımınla bağlı baş verənlər dərindən araşdırılmalıdır ki, onun adına torpaq sahəsi, daşınmaz əmlak var, yoxsa yox? Bəlkə möhtəkirlər onun da torpaq sahəsini, daşınmaz əmlakını ələ keçirmək üçün adını “öldüyə” çıxarıblar. Dərindən araşdırmaq lazımdır ki, bu hadisə necə baş verib və bəlkə kimlərsə onun əmlakını (əgər varsa-A.N) ələ keçirmək üçün saxta ölüm şəhadətnaməsi hazırlayıblar. Bütün bunlar rəsmi qurumun araşdırması nəticəsində bilinəcək. Amma bütün hallarda çox mənfi bir haldır..” - deyə A.Nəsirli bildirdi. İradə SARIYEVA
