Bakı şəhərində tikinti şirkətlərinin vətəndaşlara yaratdığı problemlər bitib-tükənmək bilmir. Çox az tikinti şirkəti tapılar ki, vətəndaşlar ondan razı qalsın, amma əksəriyyəti vətəndaşlara əziyyət verir desək yəqin ki, mübağiləyə yol vermərik.
Son illər bəzi tikinti şirkətlərinin tikintisini vəd etdiyi tarixdə başa çatdırıb vətəndaşı mənzillə təmin etmədiyi, vətəndaşları süründürməçiliyə, get-gələ məruz qoyduğu haqda şikayətlərin sayı artmaqdadır. Tikinti şirkətlərin əksəriyyəti vətəndaşa “gecikmənin sənə nə aidiyyatı var, kirayə haqqını ödəyirik” deyirlər. Bəzi sakinlər tikinti şirkətləri ilə razılaşsa da, xeyli sayda sakin razılaşmır, binanın tikintisinin gec başa çatmasından narahatlıq keçirirlər.
Sosial şəbəkələrdə, eləcə də YouTube-də Bakı şəhər sakinlərinin deputat Rauf Əliyevin tikinti şirkəti ilə bağlı narazılığı yayılıb. Sakinlər iddia edir ki, binanı sökən tikinti şirkəti həmin ərazidə tikiləcək yeni binadan vətəndaşa mənzil verəcəyini vəd etsə də, binanın tikintisi başa çatmaq bilmir. Yaşayış binalarını söküb yerində yeni çoxmərtəbəli bina inşa edən şirkətin deputat R.Əliyevə aid olduğunu deyən sakinlər qeyd edirlər ki, şirkət yaşayış binasını 1 il 8 aya sakinlərin istifadəsinə verəcəyini vəd etsə də, 7 ilə yaxındır 400 yüz ailənin gözü yolda qulağı səsdədir ki, bina nə zaman təhvil veriləcək? 17-18 mərtəbəli binanın heç bir sənədi, hüquqi əsası olmadan tikildiyini deyən sakinlər “dərindən gedib yoxlasanız icra hakimiyyəti nümayəndələrinin orada marağı var. Bu binada olanların əksəriyyəti Akademiyanın nüfuzlu alimləridir, tanınmış, həyatını elmə sərf edən adamlardır. Ancaq elə vəziyyətə gəlib çıxıb ki, elm adamlarını peşə məktəbinin müəllimlərindən də aşağı səviyyədə saxlayırlar. Ona görə də Azərbaycan aliminə belə hörmətsizlik edirlər” deyirlər.
Üzləşdikləri problemlə bağlı Prezident İlham Əliyevə müraciət edən sakinlər deyirlər ki, 7 ildir sənədli-sübutlu, qanuni, kupçalı evlərini heç bir hüquqi əsas olmadan söküb atıblar, onları evsiz qalmağa vadar ediblər.
Sözügedən tikinti şirkətinin sakinlərin əksəriyyətindən 120-150 minə yaxın pul aldığını iddia edən sakinlər bildirirlər ki, bir ev ən azı 4-5 adama satılıb. Sakinlər onu da bildirirlər ki, deputat tikintini başa çatdırmaq üçün onlardan 4 ay vaxt istəsə də, 6 ay keçməsinə baxmayaraq vədinə əməl etməyib. Bakı şəhər sakinlərinin sözlərinə görə, indi problemləri həlledilməz durumdadır və Yasamal rayon İcra Hakimiyyətindən də onlara “gedin şirkəti məhkəməyə verin” deyirlər. Sakinlər sual edir ki, şirkət onların evlərini məhkəmə yolu ilə söküb indi gedib işi də məhkəmə yolu ilə həll etsinlər? Onların sözlərinə görə, şirkət onların yaşadığı binanı məhkəmə qərarı olmadan söküb. R.Əliyevlə yanaşı Yasamal rayonun sabiq icra başçısı İbrahim Mehdiyevi də ittiham edən sakinlər qeyd edib ki, İ.Mehdiyevin özü vəzifədən getsə də, insanlara yaşatdıqları problemlər qalır. İbrahim Mehdiyev gəlib sinəsini irəli verib dedi ki, mən sizə söz verirəm... İndi İbrahim Mehdiyev hardadır? Almaniyadadır. Qaçıb oğlunun yanında villalarında yaşayır” - deyən sakinlər bildirir ki, bu cür adamların ucbatından vətəndaşlar belə acınacaqlı vəziyyətə düşüblər. Sakinlər deyirlər ki, kirayələrdə yaşamaqdan beziblər və hətta 7 nəfər mənzil sahibi, ailə başçısı artıq gözləyə-gözləyə vəfat ediblər.
Əfrasiyab Əmirov: “Rauf müəllimin bu işə heç bir aidiyyatı yoxdur”
Vətəndaşların şikayətində adı keçən deputat Rauf Əliyevin köməkçisi Əfrasiyab Əmirovla əlaqə saxladı. Ə.Əmirov bizimlə söhbətində bildirdi ki, iddialar əsassızdır və həmin tikintinin R.Əliyevlə heç bir əlaqəsi yoxdur. “Rauf müəllimin bu işə heç bir aidiyyatı yoxdur, deyilənlərin əsası yoxdur. Rauf müəllim Yasamalda tikinti aparmır. O, 13 saylı Xəzər-Pirallahı seçki dairəsindən deputat seçilib” - deyə deputatın köməkçisi bildirdi.
Əli TURABOV
