“Oğru elə bağırdı ki, doğrunun bağrı yarıldı” sözü Rusiyanın Soçi şəhərində keçirilən KVN komandalarının 33-cü Beynəlxalq Festivalında (“KiViN-2022”) Azərbaycanı təmsil edən “Şuşa” komandasının adını “Buta” olaraq dəyişən komandanın rəhbəri Müşfiq Abbasova daha çox uyğun gəlir.
Necə? Soçidə kecirilən KVN festivalında Azərbaycanı layiqincə təmsil edə bilməyən və komandanı qalib ölkənin komandası kimi təqdim etməyi bacarmayan M. Abbasov buna görə, Azərbaycan xalqından üzr istəmək əvəzinə xalqı təhqir edib: “...Hamısı qələt edirlər, başlarını daşa döyürlər. Qeyrətləri, namusları, bircə qram vətənpərvərlik hissləri varsa, bütün bu neqativ yazanların, müsahibə verənlərin şəxsiyyətli, şəxsiyyətsiz olanların namuslu, namussuz olanların fərqi yoxdur, hamısına çağırış edirəm. İnşallah, mart ayında 1/8 finalda Sankt-Peterburq şəhərində bizim birinci oyunumuz “Şuşa” adı ilə olacaq”.
Bu M.Abbasovun xalqa “hörmətinin” ifadəsidir. Bu adam tək deyil, xalqın pulu ilə özlərinə var-dövlət, populyarlıq qazananların əksəriyyətinin xalqa “təşəkkürü” təhqir olub. Biz belə pseovdasənətkarklarları, psevdiossenaristləri çox görmüşük, bu da onlardan biri.
“Bu onlara başucalığı gətirmir”
Müasir İnkişaf İctimai Birliyinin sədri, siyasi şərhçi Mübariz Göyüşlü bizimlə söhbətində bildirdi ki, xalqı təhqir edənlərin heç bir bəraəti yoxdur. “Mən bu məsələ ətrafında gedən polemikaları çox diqqətlə izlədim. Əlbəttə, “Şuşa” adının “Buta”ya dəyişdirilməsi, özü də bunun ermənilərin tələbi ilə baş verməsi çox yanlış addım olub. Bu addımı atan, buna qərar verən şəxslərin hərəkətlərini sərt şəkildə qınayıram”.
M.Göyüşlü deyir ki, Şuşa adı bizim üçün çox həssas olduğundan insanlar buna çox sərt yanaşdı və cəmiyyətimizdə digər tənqid olunası problemlər də var, insanlar onlara da kəsin yanaşmalıdır. “Bütövlükdə, baş verənlərı qınayıram. Müvəqqəti də olsa ad dəyişiminə getmək olmazdı. Eyni zamanda barəsində səsləndirilən tənqidlərə KVN komandasının rəhbərinin təhqirlə cavab verməsi yumşaq desək tərbiyəsizlikdir. Çünki ortada bir yanlış var və bu yanlışa görə də toplum, cəmiyyət onu tənqid edir. Bu toplumun yanı sırasında millət vəkilləri də, tanınmış ziyalılar da, ictimai xadimlər də, sıravi vətəndaşlar da var. Hamını toplam şəkildə bu cür təhqir edib aşağılamaq bu insanın özünün mahiyyətinin necəliyini ortaya qoyur. Səhnədə insanlara gülüş bəxş edən insanların insanlara qarşı bu cür aqressiv yanaşma sərgiləməsi sözün düzü o qədər də gözlənilən deyildi. Bu onlara başucalığı gətirmir. Onlar bu mövqelərə, bu məşhurluğa və sair elə bu aşağıladıqları, təhqir etdikləri insanların, cəmiyyətin sayəsində gəlib çıxıblar. Ona görə də, KVN komandasının rəhbərinin üzürxahlıq etmək əvəzinə belə kobudluq etməsi səhv dalınca səhvdir. Onun birinci səhvi “Şuşa” adını dəyişməsi, ikinci səhvi isə cəmiyyəti aşağılamasıdır...”-deyə M.Göyüşlü qeyd etdi.
İradə SARIYEVA
