Qarlı-şaxtalı qış fəslinin özəlliklərindən yararlanmaq istəyən turistlərin sayı heç də yaz-yay aylarındakından az olmur. Dünya Turizm Təşkilatının statistikasına əsasən, hər il səyahət etmək istəyənlərin təxminən 30-35 faizi istirahət mərkəzlərinə məhz qış ayında üz tuturlar. İsveçrə, Skandinaviya ölkələri, Çexiya, ABŞ, Kanada və Rusiya qış turizminin inkişaf etdiyi ölkələr sırasındadır.
Xarici ölkələrdən fərqli olaraq Azərbaycanda qış turizmi elə də inkişaf etməyib. Azərbaycanda yay turizmi inkişaf etsə də, qış turizmində axsama var. Halbuki, qış turizmindən xeyli mənfəət əldə edən ölkələr var. Məsələn, qonşu Gürcüstan, qardaş Türkiyədə qış turizmindən hər mövsüm milyonlarla vəsait qazanılır, iqtisadiyyatın dirçəlməsinə zəmin yaradır. Kifayət qədər populyar olan qış turizmi Azərbaycanda tam inkişaf etməyib. Təbii ki, Şahdağ Turizm Mərkəzi hazırda yerli və xarici turistlərin ixtiyarındadır. Lakin Azərbaycanın coğrafi relyefi bu cür mərkəzlərin sayını artırmağa imkan verir. Ekspertlər də belə qənaətdədirlər ki, ölkəmizdə qış turizminin inkişafına şərait var.
“Azərbaycanda qış turizmi üçün lazımi şərait var, ancaq qiymətlərin fantastik dərəcədə baha olması çoxlarının qış fəslindən həzz almaq arzusunu ürəyində qoyur”
Turizm sahəsi üzrə ekspert Elçin Rüstəm bildirdi ki, Azərbaycanda qış turizmi üçün lazımi şərait var. Bunu Qusardakı, Qəbələdəki infrastuktur sübut edir: “Ancaq qiymətlərin fantastik dərəcədə baha olması çoxlarının qış fəslindən həzz almaq arzusunu ürəyində qoyur. Azərbaycanda qış turizminin inişafı üçün şərait var. Qış fəslini insanlar üçün cazibəli edən hər şeydən əvvəl, fərqlilikdir. Eyni dağlıq əraziyə həm yayda, həm qışda gedənlər fərqli mənzərə görəcəklər. Dağları qışda görmək lazımdır. Təsadüfi deyil ki, əsrlər boyunca şairlər “dağ” və “qar” sözlərini yanaşı hallandırıblar. Dağların qış mənzərəsi insanda tamam fərqli bir psixoloji ovqat yaradır, onu il boyu sürən enerji ilə təmin edir. Nəhayət, qarlı yamacda xizəyin üstündə dayanmağın yaşatdığı həyəcan çoxlarına zövq verir”.
Ekspert hesab edir ki, sırf qış turizminin inkişafı ilə bağlı ayrıca bir Dövlət Proqramı qəbul edilməsinə ehtiyac var. Qış turizmi elə bir sahədir ki, dövlətin dəstəyi olmadan özəl biznesin nəyəsə nail olması çətindir. Çünki burada uyğun infrastrukturun yaradılması üçün ciddi logistik işlərə də ehtiyac var ki, bunu dövlət edə bilər. İndi dövlətin əsas diqqəti Qarabağda quruculuq işlərinə yönəlib və bu, belə də olmalıdır: “Yeri gəlmişkən, Qarabağın özü də orta perspektivdə qış turizmimizə əlavə potensial qatacaq. Təkcə Kəlbəcərin imkanlarını xatırlatmaq kifayətdir. Amma buna qədər hələ müəyyən vaxt keçəcək. Həmin müddətdə isə digər bölgələrimizdə olan qış turizmi potensialını reallaşdırmaq üçün xüsusi Dövlət Proqramının qəbulu həm ölkəmizə, həm də insanlarımıza çox böyük fayda gətirə bilər”.
Günel CƏLİLOVA
