Uşaqların həm fiziki, həm də mənəvi cəhətdən inkişafı dövlətin əsas pioritet istiqamətlərindəndir. Dövlət uşaqların və gənclərin fiziki, mənəvi sağlamlığı üçün yüzlərlə təlim-tədris müəssisələri, idman məktəbləri yaradıb, burada uşaqların, gənclərin fiziki, mənəvi inkişafının yüksəldilməsi üçün işlər görülür.
Sağlam bədəndə sağlam ruh olar deyimi artıq bir aksiomaya çevirilib. Bu ifadənin çox dərin qatları var və burada yalnız fiziki tərbiyənin, idmanın uşaqların sağlamlığında oynadığı rol nəzərdə tutulmur, eyni zamanda mənəvi inkişaf məsələsi də önə çəkilir, sağlam bədənli gəncin sağlam mənəviyyata sahib olduğu təsbit olunur. Gizlin deyil ki, fiziki tərbiyə və idmana böyük maraq bəsləyən uşaqların mənəvi-psixoloji vəziyyəti daha fərqli olur. Bu uşaqlarda yaranan əsas keyfiyyətlərdən biri mübariz və məsuliyyətli olmaqdır ki, onlar da buna əsasən idman profilli məktəblərdə yiyələnirlər.
İdman məktəbləri fiziki və mənəvi inkişafın ünvanıdır...
Çoxları düşünür ki, ölkəmizdə həm paytaxtda, həm də, bölgələrdə kifayət sayda idman profilli təhsil - tədris müəssisələri, zallar var, bunlar uşaq və gənclərin mənəvi və fiziki inkişafında nə dərəcədə rol oynaya bilir? Uşaq və gənclərlə işləyən pedoqoqlar, psixoloqlar, idman məşqçiləri hesab edirlər ki, müxtəlif idman növləri, onların öyrədildiyi idman müəssisələri, Uşaq-Gənclər İdman Məktəbləri uşaqların həm fiziki, həm də mənəvi cəhətdən inkişafını təmin edir. Təlim və tərbiyənin bir-birindən ayrı olmadığını deyən pedoqoqların fikrincə, uşaqların sağlamlığı və fiziki cəhətdən inkişafı qloballaşan dünyada ən vacib məsələlərdən biridir. Reallıq ondan ibarətdir ki, Azərbaycanlı uşaqların və gənclərin həyatı idmanla, idman məktəbləri ilə sıx bağlıdır, elə ailə yoxdur oradan idman məktəbinə gedən uşaq olmasın. Bir sözlə, Azərbaycan ailəsinin, cəmiyyətinin idman profilli məktəblərlə yaxın bağlılığı var. Çox doğru deyilib ki, idman insanların sağlamlığına xidmət edən ən mühüm amil, uşaq və gənclərin mənəvi tərbiyəçisidir.
Uşaq-gənclər idman məktəbi...
Azərbaycanda idmanın, fiziki tərbiyənin tarixi qədim olduğu kimi idman müəssisələrinin yaradılması yeni deyil. Ölkəmizdə böyük tarixi olan təsisatlardan biri Uşaq-gənclər idman məktəbidir (UGİM) . Mütəxəssislərə görə, UGİM öz fəaliyyətini uşaq, yeniyetmə və gənclərin bədən tərbiyəsi və idman vasitəsilə sağlamlığının və fiziki hazırlığının möhkəmləndirilməsinə, yerləşdiyi ərazidə ümumtəhsil məktəbləri ilə fiziki tərbiyə işində istiqamətləndirici rol oynamağa və yüksək səviyyəli idmançıların hazırlanmasının baslanğıc və orta mərhələlərinin əhatə edilməsinə yönəldən məktəbdənkənar, sosial yönlü müəssisədir. Bu müəssisələrə uşaq və gənclərin axını da təsadüfi deyil. UGİM-lər olimpiya ehtiyatları hazırlayan bir müəssisədir və burada yetişən idmançılar dünya, Avropa və Olimpiya çempionlarında iştirak edir, qalib olur, üçrəngli müqəddəs bayrağımızı göylərə qaldırır, o idmançıların şərəfinə himnimiz səsləndirilir. Bu cür yarışlara gənclərin hazırlanmasının əsası da başdan Uşaq Gənclər İdman məktəblərində qoyulub. Azərbaycanda fəaliyyət göstən UGİM-nin nəzdində fəaliyyət göstərən idman növləri uşaqların mənəvi və fiziki tərbiyəsində əsaslı rola malikdir. Bu müəssilərdə boks, həndibol, karate, taekvondo, cüdo və sambo, şahmat idman növləri öyrədilir.
“Bizim gələcəyimiz gənclərə məxsusdur”
Araşdırmalarımız göstərir ki, Heydər Əliyev hakimiyyətə qayıtdıqdan sonra idmana xüsusi diqqət yetirib və uşaq idmanının inkişafına böyük əhəmiyyət verib. Elə UGİM-lərin də fəaliyyətinin də geniş inkişafının əsası Heydər Əliyevin dövründə qoyulub. İdmanın uşaq və gənclərin fiziki və mənəvi inkişafında xüsusi yeri olduğunu H.Əliyev çıxışlarında vurğulayıb: “Bizim gələcəyimiz gənclərə məxsusdur. Biz bu gün yaşayırıq. Bu gün dövləti, milləti idarə edirik, amma sabahı düşünməliyik. Gələcək üçün biz sağlam gənclik hazırlamalıyıq. Fiziki cəhətdən sağlam, mənəvi, əqli cəhətdən sağlam, düşüncəli gənclər hazırlamalıyıq”.
“UGİM-lər uşaqların yalnız fiziki inkişafında deyil...”
Respublikanın əməkdar məşqçisi Ramil Həsənov bizimlə söhbətində bildirdi ki, UGİM-lərin ölkəmizin idman təlimi və tədrisi sahəsində rolu əvəzssizdir. O, həmçinin qeyd etdi ki, bu gün uşaq və gənclər UGİM-lərə maraq göstərir və bu dövlət müəssisəsində yüksək peşəkarlığa malik olan, yükəsk titullu müəllim-məşqçilər çalışır. “UGİM-lər uşaqların yalnız fiziki inkişafında deyil, eyni zamanda mənəvi inkişafında da əhəmiyyətli rol oynayır. Fiziki cəhətdən sağlam və yetkin olan uşaqlar, gənclər hər şeydən əvvəl nizam-intizamı öyrənirlər, onlarda uşaqlıqdan məsuliyyət formalaşır. Bu gün Azərbaycanda idman sahəsinin inkişafı üçün də geniş imkanlar yaradılıb və uşaqların idmanla məşğul olması üçün heç bir problem yoxdur. Uşaq və gənclər məşqlərə böyük həvəslə gəlir, yarışlarda iştirak edirlər. Bir sözlə, bədən tərbiyəsi, idman, idman müəssələri hər zaman gənclərə, uşaqlara hərtərəfli dəstək olur. Bu anlamda bədən tərbiyəsi və idman yeniyetmələrin, gənclərin mənəvi və fiziki cəhətdən inkişafında əsas rollardan birini oynayır. Çünki fiziki və mənəvi inkişafı bir-birindən kənarda tutmaq olmaz, ikisi də bir-biri ilə üzvü surətdə bağlıdır. Uşaqların və gənc nəslin daha sağlam inkişafı üçün idmanın, idman məktəblərinin, məşqçi-müəllimlərin rolu hər zaman qabarıq gösrənməlidir...”-deyə əməkdar məşqçi bildirdi.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
