Bu günlərdə Yaponiyanın Azərbaycandakı fövqəladə və səlahiyyətli səfiri Vada Cüniçi dağlar diyarı Lerikə rəsmi səfərə gəlmişdi. Səfər çərçivəsində səlahiyyətli qonağı Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev qəbul etdi və onların arasında İcra Hakimiyyətinin inzibati idarə binasında görüş keçirildi.
Çay süfrəsi arxasında baş tutan görüşdə rayon icra hakimiyyəti başçısının səlahiyyətlərini icra edən Cəlil Baxşıyev qonağa rayonun qədim tarixi, coğrafi mövqeyi, adət-ənənəsi, mədəniyyəti haqqında məlumat verdi, aqrar bölmənin dirçəldilməsi üçün həyata keçirilən tədbirlərdən danışdı, rayonun turizm potensialı, eləcə də son illərdə görülmüş tikinti-quruculuq işlərindən söhbət açdı. Həm də bu səfərin Yaponiyanın ölkəmizdə səfirliyinin yaranması gününə düşdüyünü bildirməklə cənab səfiri səfirliyin yaranmasının 22 illiyi, iki ölkə arasında diplomatik əlaqələrin isə 30 illiyi münasibətilə təbrik edib dedi: - “Ölkələrimiz arasında ötən müddətdə səmərəli qarşılıqlı əməkdaşlıq həyata keçirilmiş, münasibətlər yüksək səviyyəyə qalxmışdır. Yaponiya Hökuməti Azərbaycanda yaşayan insanların ilkin ehtiyaclarını qarşılaya biləcək inkişaf layihələri üçün “Ot Kökləri Layihələri üzrə Qrant Yardımı (GGP)” adlı sxem üçün maliyyə yardımı təklif etmişdir. 2000-ci ildən bəri sözügedən sxem, bələdiyyələr, tibb müəssisələri və Qeyri Hökumət Təşkilatları tərəfindən təqdim olunan, insanların yaşayış standartlarını yüksəldən 200-ə yaxın layihəni birləşdirir. Sözügedən layihələr yoxsulluğun aradan qaldırılması, sosial müdafiə, infrastruktur, ictimai səhiyyə və gəlirin artırılması sahələrində həyata keçirilibdir. 2003–2004-cü illərdə Lerik şəhər 3 saylı tam orta məktəbinin tədris korpusu, 2012-ci ildə Lerik rayonunun Şingədulan kənd həkim məntəqəsi, son vaxtlarda Pirasora və Conu kəndlərində tibb məntəqələri tikilərək istifadəyə verilib və Lerik Rayon Mərkəzi Xəstəxanasının uşaq xəstəlikləri şöbəsinin binası əsaslı təmir olunubdur. Bütün bu görülmüş işlərə və 44 günlük Vətən müharibəsi zamanı Yaponiyanın ölkəmizə göstərdiyi dəstəyə görə səfirin timsalında bütün dünyada uzunömürlülər diyarı kimi tanınan leriklilərin Yaponiya dövlətinə təşəkkürünü bildirir, bundan sonra da yeni layihələrin icrasına inanıram”.
Səmimi qəbula, qonaqpərvərliyə görə minnətdarlığını bildirən səfir Vada Cüniçi Yaponiya-Azərbaycan dövlətləri arasında ikitərəfli əməkdaşlığın getdikcə inkişafın, Azərbaycanda gedən sosial-iqtisadi vəziyyətin onda xoş təəssürat oyatdığını, paytaxtla yanaşı region şəhərlərində də dinamik inkişafın getdiyini, dağlar diyarında yağan qarın yaratdığı füsunkar mənzərənin insanda xoş ovqat yaratdığını və burada olmasından məmnun qaldığını, İki ölkə arasında diplomatik əlaqələrin 30 illiyi münasibətilə 2022-ci ildə səfirlik tərəfindən bir sıra rəngarəng tədbirlərin təşkilini, gələcəkdə də Lerikdə layihələrin icrasının davam olacağını söylədi.
Daha sonra qarşılıqlı hədiyyələr verildi, səfir “Uzunömürlülər” muzeyində oldu, xatirə kitabına ürək sözlərini yazdı.
Zəfər ORUCOĞLU, Azərbaycan Jurnalistlər Birliyinin üzvü
