Çoxları elə bilir ki, müharibə bitdi və bununla da erməni təxribatı, bu toplumun əsassız tələbləri də qurtardı. Xeyr, elə deyil, heç zaman onların mərəzi sağalan deyil, çünki bu xəstəlik onların qanındadır.
Çox təəssüflər olsun ki, bizim içimizdə də erməniyə “dost” deyənlər, onlarla “sülh bağlayanlar” var. Belələri, fürsət düşən kimi erməni sevgilərini biruzə verirlər, özü də açıq-aşkar. Biz bunun nümunəsini Rusiyanın Soçi şəhərində keçirilən KVN komandalarının 33-cü Beynəlxalq Festivalında (“KiViN-2022”) Azərbaycanı təmsil edən “Şuşa” komandası adını ermənilərin “tələbi” ilə “Buta” olaraq dəyişdirməsində gördük. Komandaya rəhbərlik edən Müşfiq Abbasov açıq şəkildə dedi ki, komandanın adının “Şuşa” olması ermənilərdə qıcıq yaradıb, Ruben və Araik adlı şəxslər ondan komandanın adının dəyişdirilməsini tələb edib. “…Birinci turdan sonra iclas oldu. İclasda redaktorlardan biri – Araik soyadlı redaktor dedi ki, filan komandalar ikinci tura keçir, “Şuşa” komandası yalnız adını dəyişsə, iştirak edə bilər. O söylədi ki, mənə bunu Ruben deyib. Ruben adlı burda bir nəfər var – o, Maslyakovun müavinidir. Ruben Jaqinyan orada vəzifə və söz sahibidir. Dedim ki, olar qərarı Maslyakov versin? Dedilər, yaxşı. İkinci turda hansı komandaların oynayacağını Ruben həll edir. Dedik ki, onda ikinci tur üçün adımızı dəyişək, Ruben bizi buraxsın, icazə versin ki, ikinci turda iştirak edək”, - M.Abbasov bildirib.
Sonra M.Abbasov komandanın adının yenidən bərpa olunaraq “Şuşa” adlandırıldığını bildirsə də, sosial şəbəkələrdə yayılan məlumata görə, KVN-nin rəsmi saytında komandanın adı hələ də “Buta” olaraq göstərilir.
Azərbaycan KVN komandasının Ribenin, Araikin “tələbi” ilə “Şuşa” adından imtina etməsi Azərbaycanda şok effekt yaradıb və ciddi narazılığa səbəb olub. Ən müxtəlif səviyyələrdə M.Abbasov atdığı bu yanlış addıma görə qınanır. Bu gün sosial şəbəkələrdə ən çox səslənən sözlərdən biri ““Şuşa” adını “Buta”ya çevirən qorxaq KVN-şiklər” fikridir ki, onun da müəllifi Kamran Həsənlidir. İkinci tura adlamaq və “şan-şöhrətə” çatmaq naminə “Şuşa”nı “Buta”ya çevirənlərin şəhidlərin ruhunu təhqir etdiyini deyənlər saysızdır. Tanınmış qələm adamı Bəybala Mirzəyevin şərhi də diqqət çəkəndir: “Şuşa ili”ndə “Şuşa” kimi müqəddəs adı daşıya bilməyən, düşmənlə ideoloji mübarizəyə hazır olmayan şən və cavabsızlar komandası...”
“Planet Parni iz Baku” KVN teatrının bədii rəhbəri Tahir İmanovun da məsələyə reaksiyası sərt olub: “O komandanı ora göndərəndə KVN-çilərdən, məndən, Bəhram Bağırzadədən, Cabirdən kimsə nəsə soruşdumu? Sualları komandanı oraya göndərən dövlət qurumuna vermək lazımdır. Mənim öz fikrim var, istəyirəm ki, bu komandanı yaradanlar, oraya göndərən açıqlama versinlər. Neçə gündür ki, camaat ayağa qalxıb. Sosial şəbəkələrdə aktivləşiblər. Bütün Azərbaycan xalqı gözləyir, mən də gözləyirəm. Üstüörtülü yox, geniş açıqlama versinlər. Desinlər görək, komanda niyə çıxışdan imtina etməyib? …İnandırım sizi, bunu bizim “Parni İz Baku”ya desəydilər, Anar Məmmədxanov nəinki orada qapını vurub gedərdi, hələ başqa şeylər də edərdi. Ümumiyyətlə, son illər bu KVN-lər fəallaşıb. Bir komanda getdi bizi biabır etdi, bu da ikincisi oldu. Bir dəfə olsun, məşhur KVN-çilər müraciət ediblərmi, bununla bağlı bizə xəbər ediblərmi? Etməyiblər”.
M.Abbasovun rəhbərliyi ilə KVN komandasını Soçiyə Mədəniyyət Nazirliyi, yoxsa başqa bir qurum göndərib? KVN-şikləri festivala göndərən təşkilat nə üçün bu rəzilliyə zamanında son qoymayıb və komanda niyə yarışmanın növbəti turunda iştirakdan imtina etməyib?
Mədəniyyət Nazirliyi: “Adı gedən klubun nazirliklə heç bir əlaqəsi yoxdur”
İctimaiyyəti ciddi narahat edən bu sualları Mədəniyyət Nazirliyinə ünvanladıq. Nazirlikdən bildirdilər ki, bu komandanın bu qurumla heç bir əlaqəsi yoxdur: “Bildirmək istərdik ki, Mədəniyyət Nazirliyinə bu mövzu ilə bağlı heç bir müraciət daxil olmayıb. Adı gedən klubun nazirliklə heç bir əlaqəsi yoxdur”.
Samir Adıgözəlli: “Şuşa” adından istifadə birdəfəlik həmin KVN komandasına qadağan edilsin”
Bunu böyük bir rəzillik adlandıran İSBAM sədri Samir Adıgözəlli bizimlə söhbətində bildirdi ki, bu barədə əsəbləşmədən danışmaq olmur. O, hesab edir Azərbaycan KVN komandasının “Şuşa” adından hansısa bir Rubenə, Araikə görə imtina etməsi bağışlanılmaz səhvdir və o adamların indən sonra komandanın adını qaytarmasının da heç bir əhəmiyyəti yoxdur: “Müşfiq Abbasovun bu rəzil davranışı, ermənilərin qabağından qaçması bizim cəmiyyəti çox ciddi narahat etdi. Elə bir adam yoxdur ki, bunda narazı olmasın. Erməni kimdir ki, sənin qarşına şərt qoyur, səndən “Şuşa” adını dəyişməyi tələb edir? Çox təəssüf ki, Azərbaycanın KVN komandası özünü qalib ölkənin təmsilçisi kimi apara bilmədi. Təsəvvür edin ki, “Şuşa İlində” “Şuşa” komandasının adının dəyişdirilməsi necə böyük rəzillikdir. Artıq sosial şəbəkələrdə də açıq şəkildə bəyan edilir ki, “Şuşa” adından istifadə birdəfəlik həmin KVN komandasına qadağan edilsin. İgid, qalib Şuşanın adını qorxaqların təmsil olunduğu bir komandanın daşıması ayıbdır. O komanda Şuşa adına layiq deyil. Onların bu hərəkəti Şuşanı dişi-dırnağı ilə azad edən oğulların ruhuna təhqirdir. İnanın ki, Müşfiq Abbasovun hərəkətindən hamı əsəb keçirib. Deyir ki, komandanın adını bərpa edib, indən sonra bu nəyə lazımdır, nəyə yarayasıdır. Lazımı məqamda Şuşanın təəssübünü çəkmədin, onu Rubenin sözü “Buta” ilə əvəzlədin, indi də deyirsən ki, bərpa etdim. Hesab edirəm ki, ictimai qınaq öz yerində əlaqədar qurumlar da KVN komandasına lazımı dərs verməlidir” - deyə S.Adıgözəlli qeyd etdi.
İradə SARIYEVA
