Tariflər müəyyən olunana qədər parklanma ödənişsizdir. Parklanmanın ödənişsiz olması ilə bağlı şəhərin istənilən yerində bu barədə lövhələr asılıb. Paytaxt ərazisinin bir çox yerlərində bu lövhələrə rast gəlmək olur, amma təəssüflər olsun ki, lövhələrdəkilər həqiqəti əks etdirmir. Niyə? Çünki sürücülər avtomobillərini bu ərazilərdə saxladıqları zaman onlardan ödəniş tələb olunur.
Uzun müddətdir ki, parklanmaya görə tələb olunan ödənişin qeyri-qanuni olması, həmin məbləğin kim tərəfindən təyin olunması müzakirə olunur
Bu günlərdə polis Bakıda qanunsuz parklanma ilə bağlı reydlərə başlayır. Bakı şəhər DYP İdarəsinin bölmə rəisi, polis polkovniki Vaqif Əsədov media nümayəndələrinə açıqlamasında qeyd edib ki, son günlər bəzi vətəndaşlar tərəfindən avtomobillərin dayanma-durma və parklanması ilə əlaqədar Bakı şəhər Dövlət Yol Polisi İdarəsinə çoxsaylı müraciətlər daxil olub: “Qanunsuz ödənişlərin yığılmasına haqlı olaraq etirazlar var. Bu cür hallara qarşı mübarizə aparmaq üçün bütün rayon polis orqanlarının əməkdaşları ilə birgə tədbirlər keçiriləcək. Araşdırma və aparılan müşahidələr zamanı həqiqətən də bir çox ərazilərin qanunsuz olaraq parklanma kimi istifadə olunması və bunun müqabilində müxtəlif şəxslər tərəfindən vətəndaşlardan pul alınması faktları təsdiqini tapıb. Həmin şəxslər müxtəlif formalar geyinir və bəzi adlardan istifadə etməklə imtiyazlı olduqlarını ifadə edirlər. Təbii ki, yol hərəkəti qaydaları müzakirə edilmədən yerinə yetirilməlidir. Bununla da qanunun aliliyi təmin edilməlidir. Qanunu pozanlar anlamalıdır ki, baş verən qəzalar, süni sıxlıq məhz dayanma-durma qaydalarınının pozulmasının nəticəsidir. Qanunsuz parklanma məşğul olan şəxslərə qarşı müvafiq qaydada tədbirlərin həyata keçirilməsi üçün sərt addımlar atılacaq. Polis əməkdaşları sabahdan etibarən tədbirlərə başlayacaq. Bunun nəticəsi olaraq qeyri-qanuni parklanma yeri yaradaraq hüquqi və ya fiziki şəxslər, eləcə də bəzi adlardan istifadə edənlər məsuliyyətə cəlb ediləcək”.
“Bəzi işbazlar parklanmaya görə “ödəniş pulsuzdur” lövhələrinin olmasına baxmayaraq, yenə də sürücülərdən pul tələb edirlər”
Məsələ ilə bağlı fikir bildirən sosial sahə üzrə ekspert Mayis Əliyev qeyd etdi ki, artıq neçə ildir bu məsələ gündəmdə idi: “Sürücülər parklanmaya görə tələb edilən ödənişdən narazılıq edirdilər. Bu sahə ilə bağlı çoxlu sayda qanunsuzluq qeydə alınırdı. Sevindici haldır ki, Bakı Nəqliyyat Agentliyi parklanmaya görə şəhərin küçələrində ödənişin tələb olunmaması barədə məlumat lövhələri qoyub. Təəssüf ki, bəzi işbazlar həmin lövhələrin olmasına baxmayaraq, yenə də sürücülərdən pul tələb edirlər. Sürücülər bu məsələdə aktiv olmalıdırlar. Onlardan parklanmaya görə ödəniş tələb olunsa da, həmin şəxslərə ödəniş etməsinlər. Bununla bağlı aidiyyəti qurumlara müraciət etsinlər”.
Ekspert onu da əlavə etdi ki, gün ərzində Bakı şəhərində parklanmadan yığılan pullar az məbləğ deyil: “Bu pullar qeyri-rəsmi yığılır və müvafiq olaraq vergi də verilmir. Danılmaz faktdır ki, pul ödəməyən sürücülərin maşınlarını cızırlar, təkərlərini deşirlər. Özlərinə də açıq-aşkar deyirlər ki, park yerində maşını saxlayıb pul ödəmirsə, baş verəcək xoşagəlməzliklərə cavabdeh deyillər. Bu reketsayağı pul qoparmaq üsulları Bakı küçələrində hər gün təkrar olunur”.
Günel CƏLİLOVA
