Bir neçə gün öncə Ədliyyə Nazirliyinin İctimaiyyətlə Əlaqələr İdarəsinin rəisi Aynur Sabitova sosial şəbəkə hesabında paylaşım edərək vəkillərin təcridxana və cəzaçəkmə müəssisələrində müvəkilləri ilə görüşə gələrkən karantin rejiminin qaydalarına əməl etmədiyini bildirib.
Nazirlik rəsmisi qeyd edib ki, koronavirusun yayılmasının qarşısının alınması ilə bağlı tətbiq olunan məhdudiyyətlərə, tələblərə dair sosial şəbəkələrdə mənfi fikirlərə rast gəlinir. Onun dediyinə görə, məhkumlarla görüşə gələn şəxslər, o cümlədən, bəzi vəkillər tərəfindən koronavirus testindən keçmək tələbinə narazılıq ifadə olunur: “Penitensiar müəssisələrə daxil olmaq üçün vəkillərə, müstəntiqlərə və başqa şəxslərə əlverişli şərait yaradılaraq Ədliyyə Nazirliyi pulsuz PCR testinin verilməsini təşkil edib. Eyni zamanda, buna alternativ olaraq həmin şəxslər bilavasitə getdiyi penitensiar müəssisədə ekspess test verməklə içəri daxil ola bilərlər. Buna rəğmən məhkumların hüquq və mənafelərini qorumalı olan vəkillərin onların sağlamlığına biganə yanaşmaları təəccüb və təəssüf hissi doğurur”.
Bu açıqlamadan sonra Vəkillər Kollegiyasının İdarə Heyətinin sədri Anar Bağırov Aynur Sabitovanın iddialarına cavab verib. O, nazirlik rəsmisinin iddialarını qəbul etmir: “Məhbusların vəkilləri vasitəsilə virusa yoluxma hallarına rast gəlməmişəm. Hətta belə hal olubsa belə, bu barədə heç vaxt və heç bir qurumdan təqdiqlənmiş rəsmi məlumat daxil olmayıb. Öz təşəbbüsümüzlə apardığımız araşdırmalarımız da bu cür şayiələri təsdiq etməyib. Hər kəsdən yoxlanılmamış və təsdiqini tapmayan məlumatları paylaşmamağı xahiş edirəm. Vəkillərin əksəriyyəti vaksinasiyadan keçib və müvafiq sertifikata malikdirlər”.
Adəm Məmmədov: “Vəkillərin təqsirləndirilən şəxsi virusa yoluxdurması fikri cəfəngiyatdır”
Tanınmış hüquqşünas Adəm Məmmədov “Bakı-Xəbər”ə açıqlamasında bildirdi ki, vəkillərin təqsirləndirən şəxsi virusa yoluxdurması fikri cəfəngiyatdır: “Vəkil təcridxanada məhbusla görüşən zaman karantin qaydalarına əməl edir. Hər bir vəkil məhkumla görüşdən əvvəl koronavirus testi verir. Məhkumla görüşdən əvvəl vəkilin sağlıq durumu yoxlanılır. Bu səbəbdən də nazirlik rəsmisinin səsləndirdiyi iddia həqiqəti əks etdirmir”.
Əziz Qənbərov: “Vəkillər təcridxanaya daxil olarkən, oranın xüsusi həkimləri tərəfindən yoxlanılır”
Tanınmış vəkil Əziz Qənbərov bildirdi ki, o da nazirlik rəsmisinin iddiaları razı deyil: “Vəkillərin 90 faizi vaksin olunub. Vəkillər təcridxanaya daxil olarkən, oranın xüsusi həkimləri tərəfindən yoxlanılır. Yoxlanış zamanı hər hansı bir şəxsdə yüngül hərahət və ya digər narahatçılıq olarsa vəkil təcridxanaya buraxılmır. Bu səbəbdən də vəkillərin məhbusları COVİD-19-a yoluxdurması fikri düzgün deyil. Onu da qeyd edim ki, məhkumlarla tək vəkillər deyil, eyni zamanda, Prokurorluq işçiləri və digər istintaq aparan qurumların əməkdaşları da görüşür. Həmçinin, məhkumların yaxın qohumları ilə görüşü də təşkil olunur”.
Ə.Qənbərov hesab edir ki, vəkillərin müdafiə etdiyi şəxsə keyfiyyətli hüquqi yardım göstərməsi vacibdir.
Günel CƏLİLOVA
