Prezident İlham Əliyev bir sıra şəxsləri “Azərbaycan Xalq Cümhuriyyətinin 100 illiyi (1918 - 2018)" yubiley medalı ilə təltif edib.
Qeyd edək ki, “Azərbaycan Xalq Cümhuriyyətinin 100 illiyi (1918–2018)” yubiley medalının təsis edilməsi ilə bağlı Prezident İlham Əliyev sərəncam imzalayıb. Bu medalla AXC liderlərinin varisləri və Azərbaycan Xalq Cümhuriyyəti irsinin tədqiqində və təbliğində, Azərbaycan Respublikasının dövlət müstəqilliyinin qorunub saxlanmasında və inkişafında, ölkənin ictimai-siyasi həyatında xüsusi xidmətlərinə görə Azərbaycan Respublikasının vətəndaşları, əcnəbilər və vətəndaşlığı olmayan şəxslər təltif edilirlər.
“Azərbaycan Xalq Cümhuriyyətinin 100 illiyi (1918-2018)” yubiley medalı döşün sol tərəfinə, Azərbaycan Respublikasının digər orden və medalları olduqda onlardan sonra taxılır. Medalla təltif olunanların sırasında müxalifəti təmsil edən şəxslərin də adı var. Bu xüsusda Fazil Mustafanın, Fərəc Quliyevin, Qüdrət Həsənquliyevin, Asim Mollazadənin və başqalarının adını qeyd edə bilərik. Prezidentin imzaladığı bu sərəncam AXC irsinə dövlətin necə hörmətlə yanaşdığının əlaməti sayıla bilər. Təltif olunanların sırasında müxalif siyasətçilərin də olması onu deməyə əsas verir ki, dövlətimiz AXC irsinə münasibətdə siyasi mənsubiyyət amilinə fərq qoymayıb.
Fazil Mustafa: “Ölkə başçısı siyasi mənsubiyyətə görə heç bir ayrıseçkiliyə yol vermədən bu təltifi edib”
Medalla təltif olunanlardan biri, müxalifyönlü Böyük Quruluş Partiyasının sədri Fazil Mustafa “Bakı-Xəbər”ə açıqlamasında bildirdi ki, bu məslədə Prezident AXC-yə ən gözəl münasibətini ortaya qoyub: “Həmin medalın bütün parlamentarlara təqdim olunması məqsədəuyğun sayılıb. Yəni bu məsələdə kimsə siyasi dünyagörüşü, müxalifliyinə görə fərqləndirilməyib. Ola bilsin ki, bu məsələdə kimin uyğun və ya uyğun olmadığı ilə bağlı mövzu ətrafında dərindən araşdırmanın aparılması məqsədəuyğun sayılmayıb. Çünki onda tarix uzana bilərdi. Buna görə də ölkə başçısı siyasi mənsubiyyətə görə heç bir ayrıseçkiliyə yol vermədən bu təltifi edib. Bu səbəbdən də hər birimiz ölkə başçısına öz təşəkkürümüzü bildirmişik. Bu çox qürurverici bir hadisədir. Çünki Cümhuriyyətin 100 illiyi həm də bizim özümüzün şərəf tarixidir. Millətimizin ən şərəfli keçmişidir. Təbii ki, belə mükafata sahib olmaq hər bir təltif olunana əlavə qürur hissi yaşadır. Hər halda bu, AXC irsinə ehtiramı daha da artıracaq. Amma AXC irsi elə böyükdür ki, buna rəğbəti yalnız medal almaqla məhdudlaşdırmaq olmaz. Hesab edirəm ki, bu dəyərlər daim yaşayacaq. Nə qədər ki, Cümhuriyyətimiz var, ona sevgi də yaşayacaq. Belə dəyərin verilməsi Cümhuriyyət irsinə rəğbətin güclənməsinə səbəb olur. AXC irsi elə bir dəyərdir ki, onu siyasi mənsubiyyətindən asılı olmayaraq, hamı sevməlidir. Ölkə başçısının münasibəti buna daha da stimul vermiş olacaq”.
Məhəmmədəli QƏRİBLİ
