Rusiyanın rəsmi dairələri Ermənistanın növbəti hiyləsini ifşa edib. Rəsmi Moskva Rusiyanın Ermənistandakı səfiri Sergey Kopırkinin “Ermənistan-“Artsax” strateji ittifaqı” forumunun təşkilat komitəsinin üzvləri ilə qalmaqallı görüşü ilə bağlı mövqeyini açıqlayıb.
Ermənistan mediasının verdiyi məlumata görə, iyunun 26-da forumun fəalları Armen Rüstəmyan, David Şahnazaryan və Qeqam Nazaryan Rusiya səfiri ilə Dağlıq Qarabağ danışıqlarının detallarını müzakirə etmiş, sonda ona mayın əvvəllərində işğal altındakı Xankəndidə keçirilmiş forumun rus dilində bəyannaməsini təqdim etmişlər.
Rusiya XİN-in rəsmi təmsilçisi Mariya Zaxarova Moskvadakı ənənəvi brifinqində Kopırkinin keçirdiyi görüşlə bağlı ölkəsinin mövqeyini bəyan edib. Jurnalistin “Mayın 26-da Rusiyanın Ermənistandakı səfiri Sergey Kopırkinin “Ermənistan-“Artsax” strateji ittifaqı” forumunun təşkilat komitəsinin üzvləri ilə görüşünü necə şərh edərdiniz” sualına Mariya Zaxarova belə cavab verib ki, Rusiya diplomatları öz fəaliyyətlərində müvafiq beynəlxalq hüquqi sənədləri rəhbər tuturlar və öz səlahiyyətləri çərçivəsində ilk növbədə işlədikləri ölkələrin rəsmi hakimiyyətləri ilə, həmçinin, qeyri-hökumət təşkilatlarının, siyasi partiyalar və cərəyanların nümayəndələri ilə təmas qururlar: “Bu, onların birbaşa vəzifə borcudur”.
Onun sözlərinə görə, bu təmaslar açıq şəkildə olur və onlar haqda ictimaiyyət məlumatlandırılır. “Bu, bütünlüklə RF-nin Ermənistandakı səfirliyinə də aiddir”. Xatırladılan görüşə gəlincə, Zaxarova deyib: “Söhbət səfirin olduğu ölkənin siyasi qüvvələri ilə ünsiyyəti çərçivəsində bəsit təmaslarından gedir. Bu, Ermənistanın qədim partiyalarından olan “Daşnaksütyun”un nümayəndələri ilə görüş idi. Mən, həmçinin, təsdiqləyə bilərəm ki, həmin söhbətin təşəbbüskarı erməni tərəfi olub və söhbətdə məsələlərin geniş spektrinə toxunulub. Dağlıq Qarabağ mövzusu da müzakirə edilib, hərçənd, o əsas məsələ olmayıb”.
Zaxarova bildirib ki, Rusiyanın Dağlıq Qarabağ nizamlanmasına dair mövqeyi dəyişməz qalır, bu mövqe Moskvada – dövlətin paytaxtında səslənir və yerlərdə nümayəndələri, o cümlədən, diplomatları tərəfindən təsdiqlənir: “Bu mövqe həmişə ölçülü-biçili və balanslı olması ilə xarakterizə olunur. Həmin mövqe haqda bizim azərbaycanlı tərəfdaşlarımız da məlumatlandırılıb”.
Beləliklə, Zaxarovanın sözlərindən belə qənaət hasil olur ki, daşnaklar, sadəcə, rusiyalı diplomatları aldadıb pis vəziyyətə qoyublar və görüşdə təxribatçı forumun təşkilat komitəsi üzvlərinin peyda olması səfir Kopırkin üçün tam gözlənilməz olub. Bununla Ermənistan guya Rusiyanın Ermənistan-“Artsax” yaxınlaşmasına Rusiyanın da dəstək verməsinə dair görüntü yaratmaq istəyib, lakin Rusiyanın rəsmi dairələri onları ifşa edib. Ermənilərin həmin planının tam fiaskoya uğradığını söyləmək olarmı?
Elşən Həsənov: “Rusiya heç vaxt neytrallığına xələl gətirən belə məkrli və qanunazidd layihələrdə iştirak etməz”
Azərbaycan Sosialist Partiyasının sədri Elşən Həsənov “Bakı-Xəbər”ə bildirdi ki, Ermənistanın bütün siyasəti fırıldaq və hiylə üzərində qurulub: “Onların özü heç qondarma qurumun “müstəqilliyini” tanımırlar. Rusiya niyə bu yöndə onlara dəstək verməlidir? Ola bilər ki, partiya səviyyəsində səfirlə görüş istəyiblər. O da qəbul edib. Əslində, bu, normal diplomatik etiket qaydalarına uyğundur. Çünki istənilən ölkənin səfiri təmsil olunduğu ölkədə qanuni fəaliyyət göstərən partiyalarla, QHT-lərlə görüş keçirə bilər. Biz analoji tendensiyanı Azərbaycanda da müşahidə edirik. Buna kimsə etiraz edə bilməz. Ancaq Ermənistan normal ölkə olmadığı üçün, belə detallardan əndişə keçirir. Məsələn, bu günlərdə biz həmin bu səfirin eks-prezident Köçəryanla keçirdiyi görüşdən Ermənistanın rəsmi dairələrinin necə narahatlıq keçirdiyinin şahidi olduq. Hətta həmin təmasa görə səfirə xəbərdarlıq da etdilər. İndi də səfirlə başqa bir oyun oynayıblar. Daha doğrusu, səfirin timsalında saxtakar bir “layihəyə” Rusiyanın dəstək ifadə etdiyinə dair rəy yaratmağa çalışıblar. Amma bu tam ifşa olunub. Görüşü başqa adla alıb, çıxanda guya başqa mövzu ətrafında müzakirə aparıldığına dair rəy formalaşdırıblar. Rusiyanın rəsmi dairələrinin açıqlaması isə onların istəklərini ürəyində qoyub. Zaxarova bəyan edib ki, ölkəsi heç vaxt bu cür məsələdə Ermənistana dəstək ifadə edə bilməz. Bununla bir daha sübut olunur ki, ermənilər məqsədlərinə çatmaq üçün bütün hiylə və variantlardan istifadə edirlər. Rusiya ATƏT-in Minsk Qrupunun həmsədridir. O heç vaxt neytrallığına xələl gətirən belə məkrli və qanunazidd layihələrdə iştirak etməz”.
Məhəmmədəli QƏRİBLİ
