Ermənistan Baş naziri Nikol Paşinyan Müstəqillik günü münasibətilə Birləşmiş Ştatlar Prezidenti Donald Trampa təbrik məktubu göndərib. Paşinyan məktubda ABŞ-ın bu illər ərzində Ermənistana etdiyi yardımı yüksək dəyərləndirib. Ermənistan hökumətinin başçısının sözlərinə görə, bu yardım həmişə Ermənistanın inkişafı üçün ciddi əhəmiyyətə malik olub.
Baş nazir hesab edir ki, bundan sonra da ABŞ-la əməkdaşlıq guya Ermənistanda başladılan islahatları daha tez və asan həyata keçirməyə imkan verəcək, nəticədə respublikada demokratiyanın təsdiqlənməsi dönməz olacaq.
Paşinyan məktubunda, həmçinin, ABŞ-ın ATƏT-in Minsk Qrupunun həmsədr ölkəsi kimi Dağlıq Qarabağ münaqişəsinin sülh yolu ilə nizamlanmasında əhəmiyyətli rolunu vurğulayıb.
O ümid edir ki, regionda sabitlik və təhlükəsizliyin lehinə birgə səylər vasitəsilə problemin həllinə nail olmaq mümkün olacaq.
Paşinyanın məktubunda diqqətçəkən məqamlardan biri də onun Ermənistandakı mühitlə bağlı Trampda formalaşdırmaq istədiyi yanlış rəydir. O qeyd edir ki, guya son ildə Ermənistanda tam demokratik üsulla yeni hakimiyyət formalaşdırılıb, söz və mətbuat azadlığı sahəsində mühüm addımlar atılıb. Bir sözlə, Paşinyan vəziyyəti Trampa “ideal demokratiya” modeli kimi təqdim etməyə çalışır. Ancaq biz bilirik ki, Ermənistanda vəziyyət çox acınacaqlıdır və hər hansı demokratiyadan danışmağa dəyməz. Belə olan təqdirdə, Paşinyanın Trampa yalnız demokratiya təsəvvürü yaratmasının arxasında hansı məqamlar dayana bilər?
Yeganə Hacıyeva: “Ölkə daxilində guya ki, demokratik institutların qurulması yönündə işlərin davam etdirilməsi adı altında...”
Politoloq Yeganə Hacıyeva “Bakı-Xəbər”ə açıqlamasında bildirdi ki, saxtakarlıq, ümumilikdə, Ermənistan hökumətləri üçün həmişə xarakterik olub və proseslərin, tarixin, danışıqların saxtalaşdırılması erməni diplomatiyasının ana xəttini təşkil edir: “Paşinyan hökuməti istər daxili, istərsə də auditoriya üçün nəzərdə tutulan məlumatların saxtalaşdırılması ilə erməni cəmiyyətini, Ermənistan hökumətinin əməkdaşlıq etdiyi dövlətləri, beynəlxalq təşkilatları aldatmaq təcrübəsini geniş tətbiq edir və hətta bunu öz sələflərindın daha uğurla həyata keçirməsini söyləyə bilərik. Məsələn, son aylarda yeni hökumətin ABŞ Prezidentinin milli təhlükəsizlik məsələləri üzrə müşaviri Con Boltonla telefon danışığının detallarının dəyişdirilməsi, Nikol Paşinyanın Rusiya Prezidenti Vladimir Putinlə apardığı telefon danışığının saxtalaşdırılması, Rusiya Prezidentinin köməkçisi Yuri Uşakovun KTMT sammiti ilə bağlı bəyanatının dəyişdirilməsi və s. kimi detalların saxtalaşdırılmasını nümunə göstərə bilərik. Bu sıraya bir neçə gün öncə mediaya sızan Nikol Paşınyanın bu ilin may ayında NATO-nun baş katibi Yens Stoltenberqə yazdığı əməkdaşlıq təklifi mövzulu məktubun mövcudluğunun təkzibi faktını da əlavə etsək, onda Ermənistanın yeni hakimiyyətinin belə ciddi mövzular ətrafında saxtakarlıq hallarının mövcudluğu faktı aydın olur “.
Politoloqun sözlərinə görə, bu günlərdə Ermənistanın Baş naziri Nikol Paşinyanın ABŞ-ın Müstəqillik Günü münasibətilə bu ölkənin Prezidenti Donald Trampa ünvanladığı məktubu da bu xüsusda növbəti nümunə adlandıra bilərik: “Belə ki, Nikol Paşınyan Müstəqillik Günü münasibətilə Donald Trampa ünvanladığı məktubda hər iki dövlətin birgə səyi ilə regionun sabitliyi və təhlükəsizliyi naminə Dağlıq Qarabağ konfliktinin dinc yolla həllinə nail olmaq və konfliktin tənzimlənməsində ATƏT-in Minsk Qrupunun həmsədri kimi ABŞ-ın rolunun əhəmiyyəti haqqında qeydlər gedib. Mütəmadi olaraq Dağlıq Qarabağ danışıqları ətrafında ATƏT-in Minsk Qrupu çərçivəsində əldə olunmuş razılaşmalara zidd, problemin həllində tərəflərin razılaşdırdığı bəndlərin pozulması ilə müşayiət olunan, yenilənmiş Madrid prinsiplərinin şübhə altına alınması anlamına gələn mövqe sərgiləyən, təkcə Azərbaycanı deyil, həmçinin, regionda dayanıqlı sülhün və inkişafın bərqərar olması üçün çalışan bütün maraqlı tərəflər və nizamlayıcı missiya daşıyan beynəlxalq qurumların narahatlığına səbəb olmuş açıqlamaların müəllifi, oğlunu işğal olunmuş Azərbaycan ərazilərində hərbi xidmətə göndərən Nikol Paşinyanın məktubundakı bu qeydlər istər Baş nazir və ya siyasətçi kimi onun, istərsə də rəhbərlik etdiyi hökumətin saxtakar xislətindən xəbər verir. Məktubda təhrif kimi diqqətçəkən ikinci məqam, əlbəttə, Nikol Paşınyanın yeni Ermənistan hökuməti və onun müşayiəti ilə demokratik təsisatların oturuşması prosesi haqqında qeydidir ki, bu da tamamilə yalan və təhrif olunmuş mövqedir. Çünki məhz Nikol Paşinyanın birbaşa rəhbərliyi və komandasının müşayiəti ilə ölkənin qanunverici və icraedici orqanlarını ələ keçirmiş yeni hökumət seçkilərdə hüquqi dövlətin idarəetmə prinsipinin nüvəsi olan siyasi plüralizmə zidd olaraq, parlament fraksiyalarını seçkidə öz namizədini irəli sürməmək haqqında iltizam verməyə məcbur etmiş, hakimiyyətinin ilk günlərindən həbslər və təzyiqlər vasitəsilə siyasi və iqtisadi opponentlərini zərərsizləşdirmək siyasəti yürütmüş, siyasi opponentlərini həbs etməklə seçki marafonundan kənarlaşdırmaq istiqamətində sistemli fəaliyyət aparıb. Ölkədə korrupsiyaya qarşı mübarizə, yeni vergi islahatları adı altında rəqib siyasi qrupların iqtisadi rıçaqlarını sıradan çıxarmış və ən əsası, ölkədə iqtisadi resursların və mülkiyyətin yeni və qanunsuz bölüşdürülməsi istiqamətində sistemli fəaliyyət göstərən və bu “islahatlar”da əsas hədəf olaraq keçmiş hakim klanın nüfuzlu iqtisadi və siyasi simalarını "zərərsizləşdirmə" siyasəti yürüdülür” .
Ekspertin sözlərinə görə, ABŞ-ın Müstəqillik Günü münasibətilə bu ölkənin Prezidenti Donald Trampa ünvanladığı məktubda Nikol Paşınyanın yeni Ermənistan hökuməti və onun müşayiəti ilə demokratik təsisatların oturuşması prosesi haqqında qeydi bir neçə məqsədə xidmət edir. Birinci və ən əsası, bu qeyd adına hər nə qədər də “məxməri inqilab” deyilsə də, reallıqda küçə iğtişaşları ilə leğitim hökuməti devirərək hakimiyyətə gəlmiş və sələflərindən heç nə ilə fərqlənməyən Paşınyanın və hökumətinin siyasi legitimliyinin lobbiçiliyinə xidmət edir. Çünki korrupsiyaya qarşı mübarizə şüarları altında hakimiyyətə gələn Ermənistanın yeni Baş naziri Nikol Paşınyanın yaratdığı və həyat yoldaşı tərəfindən idarə olunan korrupsiya sxemi üzrə müxtəlif fondlar adı altında öz siyasi rəqibləri və devirdiyi hökumətin nüfuzlu simalarından rüşvət alması, korrupsiya faktlarının mövcudluğu Ermənistanda istər daxili auditoriya, istərsə də xarici tərəfdaşlarda bu istiqamətdə suallar hər gün daha qabarmaqdadır. Digər tərəfdən, Ermənistanın guya demokratik tərəqqi yolunda irəliləməsinə ABŞ-dan dəstək və ölkə daxilində guya ki, demokratik institutların qurulması yönündə işlərin davam etdirilməsi adı altında ABŞ-dan alınan maliyyə yardımlarının davamlılığı və bu vəsaitlərin məbləğinin artırılması məqsədinə xidmət edir. Bu isə Ermənistan üçün həyati əhəmiyyətli məqamdır və iqtisadiyyatı tamamilə məhv olmuş Ermənistanın iqtisadi dayanaqlığının təminatında lobbi xətti ilə xaricdən cəlb olunan ianələrin yükü əvəzedilməzdir”.
Məhəmmədəli QƏRİBLİ
