Nəzakət Məmmədova: “Avropa Birliyi, NATO-Rusiya münasibətləri hər nə qədər ziddiyyətli olsalar da, onları həm geosiyasi, həm enerji siyasəti baxımdan uğurla yaxınlaşdıran ölkə Azərbaycandır”
Xorvatiya Respublikasının Prezidenti xanım Kolinda Qrabar-Kitaroviç Zaqrebdə Azərbaycan Respublikasının Prezidenti İlham Əliyevin şərəfinə verilən rəsmi ziyafətdə çıxışı zamanı deyib:
"İnanıram ki, bu gün təkcə apardığımız danışıqlar, həmçinin, Baş nazirlə və parlamentin sədri ilə apardığınız söhbətlərlə yadda qalmadı. Anlaşma memorandumunun imzalanması, xüsusilə də enerji sektorunda fəaliyyət göstərən şirkətlər arasında danışıqlarla biz Xorvatiya və Azərbaycan arasındakı münasibətlərin yeni mərhələsinə qədəm qoyduq.
Cənab Prezident, ikitərəfli münasibətlərimizin inkişafına töhfə vermək məqsədilə Sizinlə, sizin hamınızla birlikdə işləməyi səbrsizliklə gözləyirəm. Əlbəttə ki, biz hər iki ölkənin inkişafını arzu edirik. Əfsuslar olsun ki, tarixən qeyri-sabit regionda yerləşən hər iki ölkəyə sabit və firavan gələcəyə ümidlə baxmağı, açıq qalan istənilən məsələləri və həll olunmamış münaqişələri nizamlamaq iqtidarında olmağı arzu edirəm və bu məsələdə biz sizi tam dəstəkləyirik".
Kolinda Qrabar-Kitaroviç bildirib ki, Azərbaycan və Avropa İttifaqı arasında olan xüsusi tərəfdaşlıq vasitəsilə Avropa İttifaqı kontekstində birlikdə çalışmağı arzu edir: "Bu gün qeyd etdim ki, NATO-nun tərəfdaşı qismində verdiyiniz töhfələrə, xüsusilə Əfqanıstanda “Qətiyyətli dəstək” missiyasına verdiyiniz töhfəyə görə biz Sizə minnətdarıq. Lakin, eyni zamanda, ümumi kontekstdə regional və qlobal təhlükəsizliyi müzakirə etdiyimizə, ümumi maraqlarımıza və ümumi gələcəyimizə görə Sizə təşəkkürümü bildirirəm. Bir daha Sizə çox xoş axşam və Xorvatiyada xoş vaxt keçirməyi arzu edirəm".
Xorvatiya ilə yaxşı münasibətlər Azərbaycanın NATO və Avropa Birliyi ilə əməkdaşlığının perspektivinə necə təsir edəcək?
Politoloq Nəzakət Məmmmədovanın sözlərinə görə, Xorvatiya Prezidenti xanım Kitaroviç ölkəsinin Azərbaycanın Avropa Birliyində səmimi dostlarından biri olmaqda davam edəcəyini bildirib: ”Prezident Əliyev də Azərbaycanın NATO ilə əməkdaşlığının yüksək səviyyədə olduğunu qeyd edib. Azərbaycanın bəzi postsovet ölkələri, məsələn, Gürcüstan və Ukrayna kimi NATO-ya üzvlük planları yoxdur, yaxud da elə həmin ölkələr və ya Ermənistan kimi Avropa Birliyi ilə tərəfdaşlıq sazişləri imzalamayıb, həmin sazişi Prezidentin son səfərində hələ ki, yalnız paraflayıb. Lakin Azərbaycan bu təşkilatlarla əməkdaşlığı da yüksək səviyyədə davam etdirir. Məsələn, Əfqanıstandakı NATO qüvvələrinə logistik dəstək, yüklərin daşınması məhz Azərbaycan vasitəsilə həyata keçirilir. Azərbaycan Avropa Birliyinin enerji təminatında mühüm rol oynamaq potensialı olan ölkədir. Bunun üçün də bir sıra mühüm layihələr həyata keçirir. Xorvatiya Prezidenti qeyd edib ki, ölkəsi Mərkəzi Avropanın enerji təminatında rol oynamaq istəyir. Bildiyimiz kimi, Avropa Birliyinin enerji bazarı Rusiya təbii qazından çox asılıdır. Qətərdən Suriya vasitəsilə Avropaya təbii qaz xətti çəkmək planları da münaqişə ucbatından iflasa uğradı. İrana tətbiq edilən embaqronun ikinci dalğası noyabr ayından etibarən enerji sahəsinə də şamil olunacaq ki, bu da İrandan Avropaya enerji ixracatı imkanlarını heçə endirir”.
Nəzakət Məmmədova hesab edir ki, belə bir şəraitdə Avropa faktiki iki yerə bölünmüşdü: bir hissə Almaniya, Avstriya, Fransa və s. ölkələr başda olmaqla "Şimal axını - 2" layihəsini dəstəkləyirdi və Baltik dənizinin dibi ilə 2019-cu ildə Rusiyadan Almaniyaya təbii qaz xətti çəkilməsini dəstəkləyirdi: “Digər qrup isə, Avropa Komissiyası başda olmaqla, burada ABŞ-ın da dəstəyi var idi, bu layihənin əleyhinə çıxırdı və Avropa enerji bazarının şaxələndirilməsinə tərəfdar çıxır. Azərbaycanın “Cənub Qaz Dəhlizi” məhz bu məsələdə böyük rol oynayacaq. Xorvatiya o ölkələrdəndir ki, qitənin enerji təminatında rol almaq istəyir. Azərbaycan Prezidentinin Zaqrebə rəsmi səfəri tək Azərbaycan və Xorvatiya üçün deyil, bütün Avropa üçün böyük əhəmiyyətə malikdir.
Azərbaycan Prezidenti ağıllı strateq kimi ölkəmizin uğurlu enerji diplomatiyasına şəxsən rəhbərlik edir və çox mürəkkəb qütbləri uzlaşdırmağa nail olur.
Prezident Əliyev yəqin ki, Putinlə bir neçə gün əvvəl Soçi görüşündə bu məsələləri də müzakirə edib. Habelə Merkelin Azərbaycan səfərində də enerji diplomatiyasının gündəmin əsas mövzularından biri olması sirr deyil”.
N.Məmmədovanın sözlərinə görə, belə bir şəraitdə onu müşahidə edə bilərik ki, Azərbaycan Prezidenti müxtəlif, ziddiyyətli mövqeləri bir araya gətirməyə nail olub: “Avropa Birliyi, NATO - Rusiya münasibətləri hər nə qədər ziddiyyətli olsalar da, onları həm geosiyasi, həm enerji siyasəti baxımdan uğurla yaxınlaşdıran ölkə Azərbaycandır. Bu baxımdan Prezidentin Xorvatiya səfəri indiki şəraitdə olduqca əhəmiyyətlidir”.
Məhəmmədəli QƏRİBLİ
