Yeganə Hacıyeva: “Məhz bu səbəbdən də Xorvatiya Prezidenti ölkəsinin Bakıda səfirliyinin açılmasına qərar verib”
Xorvatiya Respublikasının Prezidenti xanım Kolinda Qrabar-Kitaroviç sentyabrın 6-da sənədlərin imzalanması mərasimindən sonra Azərbaycan Respublikasının Prezidenti İlham Əliyevlə mətbuata bəyanatla çıxış edərkən deyib ki, Xorvatiya Azərbaycanı özünün mühüm strateji tərəfdaşı hesab edir:
“Xorvatiya Azərbaycanı strateji tərəfdaşlıq haqqında Bəyannamə əsasında özünün mühüm strateji tərəfdaşı hesab edir. Bu Bəyannamə iki ölkə arasında 2013-cü ildə Zaqrebdə Sizin rəsmi səfəriniz çərçivəsində imzalanmışdır. Biz bu gün əməkdaşlığımızın bir sıra sahələrində mövcud olan böyük potensial haqqında danışdıq. Biz, həmçinin, siyasi məsələlər üzrə fikir mübadiləsi apardıq, o cümlədən enerji, iqtisadiyyat, mədəniyyət, elm-texnologiya, təhsil və əlbəttə ki, xalqlarımız arasında birbaşa təmasların inkişafı haqqında danışdıq. Mən bu gün imzalanmış sənədləri vacib hesab edirəm, alqışlayıram və bu, bizim ikitərəfli münasibətlərimizə təkan verəcək".
Xanım Prezident bildirib ki, Azərbaycan və Xorvatiya əsl dostlardır: "Biz bir-birimizi Avropa İttifaqı çərçivəsində də dəstəkləyirik. Biz Azərbaycanın Avropa İttifaqı ilə ikitərəfli qaydada münasibətlərinin inkişaf etdirilməsi ilə bağlı mövqeyini yüksək dəyərləndiririk. İnanıram ki, biz müdafiə sahəsində də əməkdaşlığımızı inkişaf etdirəcəyik. Çünki biz 2013-cü ildə müdafiə sahəsində də əməkdaşlıqla bağlı anlaşma memorandumu imzaladıq. Bu baxımdan zabitlərimiz və hərbçilərimiz, əsgərlərimiz bir sıra müxtəlif hərbi kurslarda, hərbi məktəblərdə öz təhsilini artıra bilər".
Öz növbəsində, Prezident İlham Əliyev də Xorvatiya ilə münasibətlərin strateji tərəfdaşlıq həddinə yüksəldiyini bildirməklə, bundan məmnunluğunu ifadə edib.
Xorvatiya Prezidenti bildirib ki, artıq Bakıda Xorvatiyanın daimi səfirliyinin fəaliyyətə başlaması haqda qərar qəbul edib: “Mən bununla bağlı Azərbaycana səfir də təyin edəcəyəm"
Göründüyü kimi, hər iki prezident ölkələrimizin bugünkü münasibətlərini strateji tərəfdaşlıq münasibətləri adlandırıb. Bu kontekstdə Bakıda Xorvatiya səfirliyinin açılmasını necə dəyərləndirmək olar?
Politoloq Yeganə Hacıyeva “Bakı-Xəbər”ə açıqlamasında bildirdi ki, Xorvatiya Azərbaycanın müstəqilliyini tanıyan ilk Avropa dövlətlərindən biridir: “Ölkələrimizin tarixində oxşarlıqlar çoxdur, təbiət və ərazilər baxımından da çox fərqlənmirik. Xorvatiya ilə Azərbaycan təxminən eyni vaxtda müstəqilliyini bərpa edib, siyasi və iqtisadi islahatların aparılması nəticəsində böyük uğurlara imza atıblar. Beynəlxalq hüquq və normalara hörmət edən hər iki ölkə öz iradəsindən asılı olmayaraq, qanlı müharibələrə cəlb olunub.
Bu günə qədər iki dövlət arasında 20 sənəd imzalanıb, 13-ü üzərində isə iş davam etdirilir. Bu sənədlər arasında ən mühümü, əlbəttə, 2013-ci ildə imzalanmış strateji tərəfdaşlıq və dostluq münasibətləri haqqında Zaqreb Bəyannaməsidir.
Sənəddə Azərbaycanın ərazi bütövlüyü dəstəklənməklə, Dağlıq Qarabağ münaqişəsinin BMT-nin qətnamələri əsasında sülh yolu ilə siyasi həllinə əhəmiyyətli yer ayrılıb. Bu sənəd ölkələrimiz arasında əlaqələrin inkişafı baxımından böyük əhəmiyyət kəsb edir. Ölkələrimiz arasında iqtisadi əlaqələrin əsas hissəsini, əlbəttə, Azərbaycanın Avropanın enerji təhlükəsizliyindəki mövqeyi və Cənub Qaz Kəmərinin reallaşması ilə dəyişən Avropanın enerji xəritəsinin reallaşmasında Xorvatiyanın dəstəyi təşkil edir. Xorvatiya TANAP və TAP kimi qaz kəmərlərinin Şərqi Avropa ölkələrinə daşınmasında xoşməramlı və dəstəkci mövqeyi ilə tanınır.
Azərbaycan-Xorvatiya münasibətlərinin önəmli məqamı isə təhlükəsizlik sahəsində əməkdaşlıqdır. Strateji tərəfdaş kimi, Xorvatiya beynəlxalq təşkilatlarda Dağlıq Qarabağ problemi ilə əlaqədar Zaqreb Bəyannaməsində öz əksini tapmış prinsiplərin təşviqinə, problemin beynəlxalq hüquq normaları cərcivəsində, dialoq yolu ilə həllinə tərəfdardır və bu istiqamətdə çalışır. Təbii ki, münasibətlərin bu səviyyədə olması diplomatik əlaqələrin daha da dərinləşməsini zəruri edir. Məhz bu səbəbdən də Xorvatiya Prezidenti ölkəsinin Bakıda səfirliyinin açılmasına qərar verib. Hesab edirəm ki, bu addım iki ölkə arasında əlaqələri daha da yüksələn xətt üzrə inkişaf etdirəcək”.
Məhəmmədəli QƏRİBLİ
