Yeganə Hacıyeva: “Xorvatiyanın ən böyük marağı ölkəmizlə energetika sahəsində daha dərindən əməkdaşlıq etməkdir”
Azərbaycan Prezidenti İlham Əliyev sentyabrın 5-də Xorvatiya Respublikasına rəsmi səfərə gedib. Sentyabrın 6-da geniş tərkibdə görüş başa çatdıqdan sonra Prezident İlham Əliyevin və Prezident xanım Kolinda Qrabar-Kitaroviçin iştirakı ilə Azərbaycan-Xorvatiya sənədlərinin imzalanması mərasimi olub. “Azərbaycan Respublikasının Mədəniyyət Nazirliyi ilə Xorvatiya Respublikasının Mədəniyyət Nazirliyi arasında 2018-ci, 2019-cu və 2020-ci illər üzrə mədəni əməkdaşlığa dair Proqram”ı Azərbaycan Respublikasının xarici işlər naziri Elmar Məmmədyarov və Xorvatiya Respublikasının mədəniyyət naziri xanım Nina Obuljen Korzinek imzalayıb.
“Azərbaycan Respublikasının Kənd Təsərrüfatı Nazirliyi ilə Xorvatiya Respublikasının Kənd Təsərrüfatı Nazirliyi arasında əməkdaşlıq haqqında Anlaşma Memorandumu”nu Azərbaycan Respublikasının Xorvatiya Respublikasındakı səfiri Fəxrəddin Qurbanov və Xorvatiya Respublikasının Kənd Təsərrüfatı Nazirliyində dövlət katibi xanım Mariya Vuçikoviç imzalayıb.
Sənədlərin imzalanması mərasimindən sonra Prezident İlham Əliyev və xanım Kolinda Qrabar-Kitaroviç mətbuata bəyanatlarla çıxış ediblər.
Prezidentin Xorvatiya səfərini necə dəyərləndirmək olar və Xorvatiya bir ölkə kimi Azərbaycan üçün hansı əhəmiyyəti daşıyır?
Politoloq Yeganə Hacıyevanın sözlərinə görə, Xorvatiya ilə Azərbaycan arasındakı münasibətlər çox uğurla davam etdirilir: “Demək olar ki, strateji tərəfdaşlıq həddində qiymətləndirilir. Məlumdur ki, bir müddət öncə Xorvatiya Prezidenti rəsmi səfərlə Bakıda olub. İlham Əliyevin Xorvatiyaya səfəri ölkələr arasındakı siyasi dialoqun çox fəal aparıldığına bir sübutdur. Bundan əlavə, ölkələrimizi təmsil edən nümayəndə heyətləri tez-tez beynəlxalq tədbirlərdə görüşür və sağlam əməkdaşlıq edirlər. Məndə olan məlumata görə, Azərbaycanla Xorvatiyanın strateji tərəfdaş olduğunu təsdiq edən bəyannamə də imzalanıb. Ölkə başçılarının ilk görüşdən sonra mediaya verdikləri açıqlamadan bəlli oldu ki, tərəflər nəticədən məmnundurlar. Ölkə başçıları ticarət dövriyyəsinin artırılmasının zəruriliyini qeyd ediblər. Bilirsiniz ki, Xorvatiyanın ən böyük marağı ölkəmizlə energetika sahəsində daha dərindən əməkdaşlıq etməkdir. Prezident İlham Əliyev də qeyd edib ki, Azərbaycan “Cənub Qaz Dəhlizi”nin icrası ilə çox fəal məşğuldur, bu nəhəng layihənin təşəbbüskarıdır. Bu layihə 7 ölkəni birləşdirir, Bakıdan Avropaya qədər 3500 kilometr uzunluğunda qaz kəmərinin çəkilişini və Azərbaycanın nəhəng “Şahdəniz” yatağının işlənməsini nəzərdə tutur. Təsadüfi deyil ki, Xorvatiya “Cənub Qaz Dəhlizi”nin Bakıda keçirilən Məşvərət Məclisində böyük nümayəndə heyətilə təmsil edilib. Bütün bunlar göstərir ki, Xorvatiya təmsil olunduğu Avropa qitəsinin enerji təhlükəsizliyində Azərbaycanın oynayacağı rolu dərk edir və bu sahədə ölkəmizlə yaxından əməkdaşlıq etmək niyyətindədir. Ümidvaram ki, digər sahələrdə də tərəflər önəmli razılıqlar əldə edəcəklər”.
Məhəmmədəli QƏRİBLİ
