Yunus Oğuz: “İlham Əliyevin Qırğız Respublikasında Bakı-Tiflis-Qars dəmir yolundan istifadə ilə bağlı səsləndirdiyi mesaja dost ölkələrin müsbət reaksiya verəcəyi heç bir şübhə doğurmur” Əkbər Qoşalı: “Dost, qardaş ölkələrin Bakı-Tiflis-Qars dəmir yolu xəttindən istifadə etməsi həm bizim, həm o ölkələr üçün əhəmiyyətlidir, həm də bütün Avrasiya üçün önəm kəsb edən bir hadisədir”
Bu gün Azərbaycan dünya dövlətlərinin strateji əməkdaşı kimi özünü təqdim edir. Bütün iri regional neft-qaz, infrastruktur layihələrin əsas aparıcı qüvvəsinə çevrilən ölkəmiz bir sıra beynəlxalq əhəmiyyətli proyektlərin həyata keçməsində yaxından iştirak edir. Məlum olduğu kimi, Şərqlə Qərbin qovşağında yerləşən ölkəmiz Bakı-Tiflis-Qars dəmir yolu kimi iri infrastruktur layihəsinin reallaşmasında aparıcı rol oynayıb.
Bu günlərdə Qırğız Respublikasının Çolpon-Ata şəhərindəki Çingiz Aytmatov adına “Rux Ordo” Mədəniyyət Mərkəzində Türkdilli Dövlətlərin Əməkdaşlıq Şurasının (TDƏŞ) VI Zirvə görüşündə çıxışı zamanı Azərbaycan Prezidenti İlham Əliyev “Bütün dost ölkələri Bakı-Tiflis-Qars dəmir yolundan istifadə etməyə çağırıram” - bəyanatını səsləndirib.
“Olaylar” İnformasiya Agentliyinin və eyniadlı qəzetin baş redaktoru, siyasi icmalçı, yazıçı, tədqiqatçı Yunus Oğuz “Bakı-Xəbər”ə açıqlamasında bildirdi ki, özünü Azərbaycana dost sayan dövlətlərin hər biri Bakı-Tiflis-Qars dəmir yolundan istifadə etməkdə maraqlıdır. Yalnız Cənubi Qafqaz regionu üçün deyil, bütün dünya üçün əhəmiyyətli dövlət olan Azərbaycanın bir sıra beynəlxalq iqtisadi, infrastruktur layihələrinə həyat verməsi diqqətçəkəndir. “Əlbəttə, Prezident İlham Əliyev “dost ölkələr” sözünü çox düzgün vurğulayıb. Bəli, bu gün Azərbaycanla dost olmayan Ermənistan kimi ölkə də var. Tutalım, Ermənistan Hindistanla yük daşımaq istəyir. Azərbaycan buna imkan verərmi ki, bu marşrut üzrə Hindistandan Ermənistana, Ermənistandan da Hindistana yük daşınsın?! Baxmayaraq ki, Hindistanda ermənilərin sayı kifayət qədərdir və orada erməni lobbisi fəaliyyət göstərir. Təbii ki, ölkə başçısı “dost ölkə” deyərkən Qazaxıstanı, Rusiyanı, Türkiyəni, Özbəkistanı, Belarusu, digər ölkələri nəzərdə tutub. O ölkələri ki, həmişə Azərbaycanın haqlı mövqeyini dəstəkləyir, ölkəmizin ərazi bütövlüyünü tanıyırlar. Bu gün Azərbaycan böyük bir gücə, bütün sahələrdə strateji əhəmiyyətə malikdir. Ölkəmiz Şərqlə Qərbi birləşdirən strateji bir məkanda yerləşir. Azərbaycan güclü geostrateji gücə malik olduğundan, ölkə başçısı İlham Əliyev bütün dost dövlətləri əhəmiyyətli Şərq-Qərb dəhlizindən, Bakı-Tiflis-Qars dəmir yolundan istifadəyə çağırıb. Burada söhbət təkcə yükdaşımadan, sərnişin, turist daşımadan getmir, strateji neft-qaz borularından, Azərbaycan qazının borulara yüklənərək Avropaya ötürülməsindən, gəmidaşımadan və s. söhbət gedir. Tutalım, Türkmənistan Ermənistanla müqavilə bağlaya bilər ki, biz sizə Azərbaycan vasitəsilə qaz verəcəyik, amma Azərbaycan bunun qarşısını kəsəcək” - deyə bildirən Y.Oğuz hesab edir ki, Azərbaycanla dost olan, strateji müttəfiq olan dövlətlər ölkə başçsının mesajını yüksək dəyərləndirəcəklər. Y.Oğuzun fikrincə, Azərbaycanla bütün istiqamətlərdə, o cümlədən də yükdaşıma sahəsində əməkdaşlıq etmək istəyən dövlətlər saysızdır: “İlham Əliyevin Qırğız Respublikasında Bakı-Tiflisi-Qars dəmir yolundan istifadə ilə bağlı səsləndirdiyi mesaja dost ölkələrin müsbət reaksiya verəcəyi heç bir şübhə doğurmur. Bu gün dünya ölkələri yükdaşımada, turizmdə və strateji məhsullar olan karbohidrogen məhsulların ötürülməsində və alınmasında Azərbaycana ehtiyacları olduğu üçün, ölkəmizlə daha yaxın dost olmağa çalışacaqlar. Bildiyiniz kimi, Gürcüstan Respublikası yeni baş nazirinin ilk rəsmi səfər etdiyi ölkələrdən biri Azərbaycan oldu. Bu heç də təsadüfi deyildi. Azərbaycanın Şərqdən gələn əhəmiyyətli neft-qaz xətlərinin çoxu Gürcüstandan keçir. Ölkəmiz bu işə maneçilik törətsə, təsəvvür edin ki, hansı hadisələr baş verə bilər. İnvestisiya qoyuluşu məsələsini də önə çəkməliyik. Bu gün Azərbaycanla Türkiyə fəal investisiya qoyuluşu rolunu oynayırlar. Bunlar da çox vacib məsələlərdir”.
Y.Oğuz onu da qeyd etdi ki, əslində, bu bütün tərəflərdən gələn məhsulların, strateji xətlərin Ermənistana tərəf getməməsi üçün əhəmiyyətli məsələdir.
Atatürk Mərkəzinin şöbə müdiri, Milli Qeyri-Hökumət Təşkilatları Forumunun idarə heyətinin üzvü Əkbər Qoşalı da hesab edir ki, Azərbaycan Respublikasının Prezidenti İlham Əliyevin bütün dost dövlətləri Bakı-Tiflis-Qars dəmir yolu xəttindən istifadə etməyə çağırması çox müsbət haldır: “Bu sammitdə, digər sammitlərdən fərqli olaraq, qardaş Özbəkistanın və Macarıstanın dövlət rəhbərləri də iştirak edirdilər. Bu da müzakirə edilən məsələlərin dairəsinin daha da genişlənməsi deməkdir. Azərbaycan Prezidentinin istər bu sammit çərçivəsində keçirdiyi görüşlərdə, çıxışlarında səsləndirdiyi fikirlər türk dövlət başçılarının bir araya gəlməsi üçün doğrudan da çox dəyərlidir. İndiyə qədər Azərbaycan Prezidenti bu istiqamətdə çoxlu sayda addımlar atıb, fikirlər səsləndirib. Ölkə başçımızın türk birliyi naminə atdığı addımlar bir daha bu sammit çərçivəsində də özünü göstərdi. Prezidentimizin bütün dost ölkələri Bakı-Tiflis-Qars dəmir yolu xəttindən istifadə etməyə çağırması da bunun göstəricilərindən biridir. Bu mesaj Azərbaycanın imkanlarından, xüsusilə də tranzit imkanlarından, geopolitik mövqeyinin yaratmış olduğu şanslardan, imkanlardan qardaş, dost ölkələrin də istifadə etməsi üçün bir şərait yaradır. Bu o imkanların qardaş ölkələrlə paylaşılması mənasını ifadə edir. Dost, qardaş ölkələrin Bakı-Tiflis-Qars dəmir yolu xəttindən istifadə etməsi həm bizim, həm o ölkələr üçün əhəmiyyətlidir, həm də bütün Avrasiya üçün önəm kəsb edən bir hadisədir. Onlar daha az xərc çəkməklə, daha asan yolla bu marşrutdan istifadə edə biləcəklər. Məsələlərə ancaq mənəvi prizmadan baxmayıb həm də iqtisadi baxımdan yanaşsaq, bunun əhəmiyyəti daha böyükdür”.
Ə.Qoşalı qeyd etdi ki, Bakı-Tiflis-Qars dəmir yolu xətti ancaq üç dövləti birləşdirmir, o, Bakıdan şərqə, Qarsdan qərbə doğru şaxələnmək, genişlənmək imkanı olan bir infrastruktur vasitəsidir. “Bu xəttin imkanları ona qoşulacaq hər kəs üçün yeni şanslar, yeni imkanlar, əlavə üstünlüklər qazandırmaqdadır. Daşınan məhsulların qiymətinin çatdırılacaq ölkələrə nisbətən ucuz başa gəlməsi, sərnişin daşımada əldə ediləcək başarlar, insanların bir-birilə bir-birinin ölkəsindən keçərək daha yaxından tanış olması, turizmin inkişafı, infrastruktur layihələrinin birləşdirilməsi, gəliş-gedişlərin sıxlaşdırılması, tezləşdirilməsi hesab edirəm ki, bu dəmir yolu xəttinin önəmini, tarixiliyini, eyni zamanda da perspektivini ifadə etməkdədir” - deyə Ə.Qoşalı vurğuladı.
İradə SARIYEVA
