Aqşin Əliyev: “Rusiyanın Paşinyanı zəiflətmək planı işə düşəcəksə, bunu Köçəryanın əli ilə etməyə çalışacaqlar”
Ermənistanda baş nazir Nikol Paşinyana qarşı cəbhə böyüyür. Ermənistan mətbuatının yazdığına görə, Paşinyanın “Mülki Müqavilə” partiyasının keçmiş müttəfiqi “İşıqlı Ermənistan” partiyası bu dəfə Qarabağ klanı ilə birləşməyi qərara alıb.
Hələ də mer təyin oluna bilmədiyi üçün İrəvan ağsaqqallar şurasının növbədənkənar seçimləri yeni mübarizə meydanına çevrilib. Belə ki, deyəsən Qarabağ klanı bu cəbhəni uduzmaq istəmir. Elə ona görədir ki, İrəvan ağsaqqallar şurasının budəfəki seçimlərində “İşıqlı Ermənistan” partiyasını öz tərəfinə çəkməyi bacarıb. Beləliklə, İrəvanda ağsaqqallar şurasının budəfəki seçimlərində “Respublika” partiyası ilə “İşıqlı Ermənistan” partiyası “İşıq” vahid blokunda çıxış edəcəklər. Namizədlər içərisində isə birinci yerdə hazırkı ədliyyə naziri və “Respublika” partiyasının siyasi şurasının üzvü Artak Zeynalyandır. İkinci yerdə David Xajakyan, üçüncü yerdə isə Ani Xaçatryan qərarlaşıb.
Qeyd edək ki, “İşıqlı Ermənistan” bundan əvvəlki seçkilərdə “Çıxış” blokunun tərkibində Nikol Paşinyanın “Mülki Müqavilə” partiyası ilə birgə çıxış edib. Lakin Paşinyanın partiyası budəfəki seçkilərə tək qatılacağını bildirib.
Bu, faktiki olaraq, Paşinyana qarşı yeni blokun yaradılması anlamına gəlir. Belə vəziyyət Ermənistan üçün nə vəd edir?
Ekspert Aqşin Əliyevin sözlərinə görə, Ermənistanda Nikol Paşinyanın iqtidarı ələ keçirməsindən sonra ən çox diqqətçəkən fiqur sabiq prezident Robert Köçəryandır: “Qısamüddətli həbsdən sonra aktiv siyasətə qayıdan Köçəryan hazırda baş nazir Paşinyanın əsas rəqibidir. Köçəryanın aktiv siyasətə qayıtması bir neçə amillə bağlıdır. Ermənistanın sabiq prezidenti müqavimət göstərmək üçün mütləq mübarizə aparmalıdır. Bunu etməsə, onu çox asanlıqla məhv edəcəklər. Ona görə Köçəryan düşünür ki, mübarizə ilə həbs təhlükəsinin qarşısını almalıdır. Həbs olunsa belə, bunun siyasi səbəblərdən irəli gəldiyi görüntüsünü yarada bilsin. Digər amil ondan ibarətdir ki, Köçəryan özünü ruspərəst kimi göstərir, Rusiyanın mövqelərini müdafiə edir. Eyni zamanda, Qarabağ klanının əsas fiqurudur. Bu iki istiqamətdə baş nazir Nikol Paşinyana qarşı hücumlar təşkil edəcək. Yaxın perspektivdə Köçəryan müxalifətin liderliyinə iddia edəcək. Köçəryan iki müxalif qüvvəni – “Respublika” və “Daşnaksütyun” partiyalarını öz liderliyi altında cəmləşdirməyə çalışacaq. Bu iki partiya 105 yerlik parlamentdə 57 deputata malikdir. O, iki partiyanın liderliyinə iddia etməklə, Paşinyanın baş ağrılarını artıra bilər. Hazırda Paşinyanın reytinqi nisbətən yüksəkdir. Amma may ayında keçiriləcək erkən parlament seçkilərinə kimi reytinqi düşə bilər. Çünki Paşinyan islahat apara bilmir, həmçinin, resurslar yoxdur. Eyni zamanda, müxalifətin hər tərəfdən təzyiqi ilə üz-üzədir. Bu səbəbdən Köçəryan Rusiyadan müəyyən dəstəyə ümid etməklə mövqelərini gücləndirə bilər. Hazırda Köçəryan Rusiya tərəfindən tam dəstəklənir. Ona görə Rusiyanın Paşinyanı zəiflətmək planı işə düşəcəksə, bunu Köçəryanın əli ilə etməyə çalışacaqlar”.
Məhəmmədəli QƏRİBLİ
