“Bu əlaqələrin daha da güclənməsi Azərbaycanı həm də sərfəli tranzit ölkəsinə çevirir ki, burdan da bizim yaxşı iqtisadi dividendlərimiz ola bilər”
Türkiyə Böyük Millət Məclisinin sədri Binəli Yıldırımın Azərbaycana səfəri başlayıb. Ali qonağın şərəfinə fəxri qarovul dəstəsi düzülüb. Heydər Əliyev Beynəlxalq Aeroportunda Binəli Yıldırımı Milli Məclis sədrinin birinci müavini Ziyafət Əsgərov qarşılayıb. B.Yıldırım Azərbaycana səfəri çərçivəsində dövlət rəsmiləri ilə görüşəcək, iki ölkə arasında olan mövcud münasibətləri müzakirə edəcək. Qeyd edək ki, bu onun parlament rəhbəri kimi Azərbaycana ilk səfəridir. Türkiyəli siyasətçi səfərə çıxmazdan öncəki çıxışında da TBMM sədri kimi ilk səfərini qardaş Azərbaycana etməsini xüsusi vurğulayıb.
Binəli Yıldırımın indiki anda Bakıya səfərilə ABŞ-Türkiyə və Türkiyə-Rusiya münasibətlərinin bugünkü kontekstində Türkiyə-Azərbaycan münasibətlərinin hansı perspektivləri açılır?
Politoloq Vüqar Qədirov “Bakı-Xəbər”ə açıqlamasında bildirdi ki, Binəli Yıldırımın səfəri doğrudan da maraqlı zaman kəsiyinə təsadüf edir: “Biz Türkiyə ilə qardaş ölkə olmaqla yanaşı, həm də regional məsələlərin həllində, beynəlxalq qurumlar çərçivəsindəki əməkdaşlıqda ortaq mövqedən çıxış edirik. Məlumdur ki, Binəli Yıldırım Türkiyə parlamentinin sədri seçiləndən sonra ilk xarici səfərini məhz Azərbaycana reallaşdırdı. Belə bir ənənə iki ölkənin başçıları arasında da var. İstər İlham Əliyev, istərsə də Tayyib Ərdoğan yenidən ölkə başçısı seçiləndən sonra ilk səfərlərini qarışıqlı olaraq bir-birinin ərazisinə ediblər. Binəli Yıldırım Türkiyənin baş naziri olub. O, eyni zamanda həmin ölkənin iqtisadiyyatını dərindən bilir. Bu baxımdan da onun həm siyasi, həm də iqtisadi məsələlər barədə müzakirələr aparacağı gözləniləndir. Səfərin indiki anda reallaşması geopolitik anlamdan da maraqlıdır. Çünki hazırda Türkiyə-ABŞ münasibətləri olduqca gərgindir. Bunun fonunda Türkiyə ilə Rusiya arasında çox ciddi isinmə meylləri müşahidə olunur. Xüsusilə də Suriya konfliktindən sonra başlayan bu yaxınlıq hazırda siyasi sahə ilə yanaşı, iqtisadi sahəni də geniş əhatə etməkdədir. Məlum olduğu kimi, Azərbaycan Türkiyə ilə Rusiya arasında vacib körpü rolunu oyanayan bir ölkədir. Bizim xüsusi ünikallığımız ona görədir ki, postsovet ölkəsi olaraq Rusiya ilə eyni dövlətin tərkibində olmuşuq. Yəni yaxın qonşuluqla bərabər bizi həm də bir çox ortaq dəyərlər bir-birimizə bağlayır. Türkiyə ilə isə biz təmənnasız olaraq qardaş münasibətindəyik. ABŞ-la münasibətin gərginləşməsi yalnız Türkiyə ilə yaşanmır. Bu eyni zamanda ABŞ-Rusiya münasibətlərində də özünü göstərir. ABŞ-ın iki böyük ölkə ilə münasibətlərinin gərginləşməsi Moskva ilə Ankaranı daha yaxın olmağa vadar edir. Bu əlaqələrin daha da güclənməsi Azərbaycanı həm də sərfəli tranzit ölkəsinə çevirir ki, burdan da bizim yaxşı iqtisadi dividendlərimiz ola bilər”.
Məhəmmədəli QƏRİBLİ
