Aqşin Əliyev: “Dövlətimiz xalqımızla birlikdə elə qüvvələrin müstəqilliyimizə, sabitliyimizə maneə olmasına imkan verməyəcək”
Prezident İlham Əliyev Almaniya Kansleri Angela Merkellə keçirilən birgə mətbuat konfransında bildirib ki, Azərbaycan demokratik dəyərlərə sadiq ölkədir: “Azərbaycanda bütün demokratik təsisatlar mövcuddur, bütün azadlıqlar, o cümlədən söz və mətbuat azadlığı təmin edilir. Azərbaycanda yüzlərlə mətbu orqan fəaliyyət göstərir ki, onların arasında müxalifət mətbuatı da kifayət qədər çoxdur. Yəni Azərbaycanda heç kim tənqidə, fərqli baxışa görə təqib olunmur, heç kim cəzalandırılmır. Azərbaycanda sərbəst toplaşma azadlığı da təmin edilir və istənilən siyasi qüvvə bu imkanlardan istifadə edə bilər”.
Dövlət başçısı qeyd edib ki, bu il Azərbaycanda prezident seçkiləri keçirilib: “Seçkilər ərəfəsində və seçkilərdən sonra müxalifət bir çox aksiya, mitinqlər keçirib - azad, sərbəst şəkildə, heç bir maneəsiz. O başqa məsələdir ki, o aksiyalara min nəfərdən çox adam gəlməyib. Bu da yəqin ki, müxalifətin hansı hörmətə malik olduğunu göstərir, ancaq heç bir məhdudiyyət qoyulmur. Azərbaycan demokratik dəyərlərə, insan haqlarına sadiqdir. Avropa Şurası təkcə Azərbaycanı yox, bir çox ölkələri tənqid edir. Biz bu tənqidə normal yanaşırıq. Əgər tənqid əsaslıdırsa, biz, əlbəttə, nəticə çıxarırıq. Əgər biz hesab ediriksə, bu tənqid əsassızdır, qərəzlidir, ikili standartlara əsaslanır, əlbəttə ki, öz sözümüzü deyirik, açıq şəkildə bildiririk. Mən də giriş sözümdə qeyd etdim ki, xanım kanslerlə insan haqları, demokratik inkişafla bağlı məsələlər açıq, konstruktiv şəkildə müzakirə edildi və bu məsələlər bundan sonra da müzakirə olunacaq”.
Göründüyü kimi, ölkə başçısı Azərbaycanda insan haqlarının yüksək səviyyədə qorunduğunu bəyan edib. Eyni zamanda bildirib ki, bəzən buna beynəlxalq qurumlar tərəfindən ikili standartlarla yanaşılır. Belə qərəzli münasibət haradan qaynaqlanır?
Ekspert Aqşin Əliyevin sözlərinə görə, təəssüf ki, Azərbaycan daim bu yanaşmadan əziyyət çəkib: “Təəssüflər olsun ki, Azərbaycanın uğurları bütün beynəlxalq təşkilatlar və ölkələr tərəfindən eyni cür qarşılanmır. Bu uğurlar tarix boyu ölkəmizə qarşı düşmən mövqeyində dayanan ermənilər və onlara havadarlıq edənlərlə bərabər, bəzi beynəlxalq insan haqları təşkilatlarını qıcıqlandırır. Bu təşkilatlar müxtəlif vasitələrdən istifadə edərək Azərbaycanın beynəlxalq aləmdə formalaşmış müsbət imicinə zərbə vurmaq yolunda dəridən-qabıqdan çıxırlar. Hətta beynəlxalq qurumların qəbul etdiyi elə qətnamələr var ki, xalqımıza məxsus olan qonaqpərvərlik ənənəsinə də korrupsiya donu geyindirməyə cəhd edilib. Bəzən ölkəmizlə bağlı qəbul edilən qərarlar obyektiv monitorinqə əsaslanmır. Ölkədən ötürülən bəzi qərəzli “donos”lar hesabına belə nəticə hasil olur. Biz əsasən də bu yöndə həmin təşkilatlara soxulmuş və ya onları təsir altına alan erməni lobbisinin əməlindən əziyyət çəkirik.
Daha əminliklə deyə bilərik ki, bizim normal məsləhətlərə, fikir mübadiləsinə ehtiyacımız olsa da, Azərbaycana qarşı qərəzli mövqedən çıxış edən təşkilatların “tövsiyələrinə” heç bir ehtiyacımız yoxdur. Ölkəmiz sürətlə inkişaf edir, böyük uğurlara sahib olur. Bütün bunları bəzi qüvvələrin gözləri götürmür. Bizə qarşı olan bütün bu hücumlar ölkəmizin müstəqilliyini, daxili sabitliyini pozmağa yönəlib. Təbii ki, dövlətimiz xalqımızla birlikdə elə qüvvələrin müstəqilliyimizə, sabitliyimizə maneə olmasına imkan verməyəcək”.
Məhəmmədəli QƏRİBLİ
