Yeganə Hacıyeva: “Artıq 27 ildir Ermənistanın aqressiv siyasəti qitələrarası strateji keçid olan Cənubi Qafqaz regionunun iqtisadi perspektivini...”
Ermənistanda yeni hökumətin qurulması faktı bəlkə də Dağlıq Qarabağ münaqişəsinin nizamlanması üzrə danışıqlara təkan verilməsinə səbəb ola bilər. Bunu Bakıda Almaniya Kansleri xanım Angela Merkel Azərbaycan Prezidenti İlham Əliyevlə birgə mətbuat konfransında deyib.
A.Merkel bildirib: "Dağlıq Qarabağ məsələsi haqqında açıq danışdıq. Mən bir daha vurğuladım ki, Almaniya bu münaqişənin həllində maraqlıdır və biz buna Minsk Qrupu çərçivəsində öz töhfəmizi verəcəyik. Ermənistanda yeni hökumətin qurulması faktı bəlkə də bu sahədə vəziyyətin yaxşılaşdırılmasına, danışıqlara təkan verilməsinə səbəb ola bilər və Almaniya da burada iştirak edə bilər. Biz regionun təhlükəsizliyi haqqında da danışdıq. Azərbaycanın coğrafi vəziyyəti çox maraqlıdır, yəni bir tərəfdən Rusiya, bir tərəfdən İranla əhatə olunub, Türkiyə ilə əlaqələri var. Biz bu fikirlə razıyıq ki, münaqişələr sülh, danışıqlar yolu ilə həll olunsun və bu regionda mövcud olan bütün münaqişələr sülh yolu ilə həll edilməlidir.
Bizim bundan sonrakı dialoqumuzun intensivləşdirilməsi üçün şərait və əsaslar var. Bəzən fərqli fikirlər olanda da bu barədə danışmaq və fikir mübadiləsi aparmaq lazımdır və qarşı tərəfin fikrinə də diqqətlə qulaq asmaq lazımdır. Ona görə də mən Sizə müzakirələr üçün təşəkkür edirəm, çox sağ olun".
Göründüyü kimi, xanım Merkel konkret olaraq bildirib ki, Ermənistanda yeni hökumətin qurulması bəlkə də Dağlıq Qarabağ münaqişəsinin nizamlanması üzrə danışıqlara təkan verilməsinə səbəb ola bilər. Bu fikirdə o nəticə hasil olurmu ki, Qarabağ münaqişəsinin nizama salınmasına indiyə kimi məhz Ermənistanın mane olduğuna xanım Merkel eyham vurdu?
Politoloq Yeganə Hacıyeva qəzetimizə açıqlamasında bildirdi ki, Almaniya Kansleri Angela Merkelin keçən həftə Cənubi Qafqaz regionuna strateji səfəri baş tutdu: “Səfərin ümumilikdə Almaniya üçün deyil, həmçinin, Avropa Birliyi üçün xüsusi önəm daşıdığını qeyd etmək istəyirəm. Bilirik ki, Cənubi Qafqaza səfərdən öncə xanım Merkelin Rusiya Prezidenti Vladimir Putinlə Berlində kifayət qədər uzun zaman çəkən görüşü baş tutub. Bu mövzuda qeyd etmək istədiyim əsas məqam odur ki, Angela Merkelin istər Rusiya Prezidenti Putinlə görüşu, istərsə də Cənubi Qafqaz ölkələrinə səfəri daha çox iqtisadi maraqlar ətrafında baş tutan səfərlərdir. Cənubi Qafqaz ölkələrinə səfər zamanı görüşlərdə ölkələrin Avropa Birliyinin enerji diversifikasiyası üzrə rolu və əhəmiyyəti məsələləri ətrafında müzakirələr həyata keçirildi.
Almanya Kansleri Angela Merkelin regiona səfərində müzakirələrin mühüm hissəsi, əlbəttə, regional təhlükəsizlik, Cənubi Qafqazdakı konfliktlər və onların Avropanın enerji təhlükəsizliyinə və birliyin regiondakı iqtisadi maraqlarına yarada biləcəyi təhdidlər haqqında olub, əsas məqam kimi Ermənistan-Azərbaycan Dağlıq Qarabağ münaqişəsinə geniş yer ayrılıb.
Avropa Birliyinin enerji təhlükəsizliyində yüksək rolu və geosiyasi əhəmiyyəti olan Azərbaycanın ərazi bütövlüyünün təmin olunması regionda sülh və təhlükəsizlik üçün çox vacib məsələdir” .
Politoloqun sözlərinə görə, A.Merkelin Bakıda apardığı danışıqlarda Cənubi Qafqazda regional təhlükəsizlik məsələləri, Ermənistan-Azərbaycan Dağlıq Qarabağ münaqişəsi əsas hissəni təşkil edib: “Müzakirələr zamanı Angela Merkel “Ermənistanda yeni hökumətin qurulması bəlkə də Dağlıq Qarabağ münaqişəsi üzrə danışıqlara təkan verilməsinə səbəb ola bilər” fikrini işlədib.
Heç kimə sirr deyil ki, Dağlıq Qarabağ münaqişəsinin nizamlanması məhz Ermənistan hökumətinin beynəlxalq hüquq normalarına hörmət etməməsi, danışıqlarda qeyri-konstruktiv yanaşma sərgiləməsi üzündən uzanıb.
Artıq 27 ildir Ermənistanın aqressiv siyasəti qitələrarası strateji keçid olan Cənubi Qafqaz regionunun iqtisadi perspektivini və regionun qitələrarası tampon zona kimi imkanlarını azaltmaqdadır. Dəyişən qlobal siyasi müstəvidə Cənubi Qafqazın region olaraq artan rolunu nəzərə alsaq, Ermənistan rəhbərliyinin konfliktin həllində daha öncələr sərgilədiyi qeyri- konstruktiv yanaşmanın qəbul olunmadığı və konfliktin həllində siyasi, diplomatik üsulların nəticə verməməsinin hərbi üsulların istifadə olunmasını qaçılmaz etdiyi qənaəti hər gün daha da möhkəmlənir. Bu isə regionda iqtisadi maraqları olan tərəflərin Ermənistana siyasi və diplomatik təzyiqini artırması ilə nəticələnir.
Müzakirələr zamanı Angela Merkelin “Ermənistanda yeni hökumətin qurulması bəlkə də Dağlıq Qarabağ münaqişəsi üzrə danışıqlara təkan verə bilər” fikirləri də özündə məhz bunu ehtiva edir”.
Məhəmmədəli QƏRİBLİ
