Elçin Mirzəbəyli: “Bu aspektdən hesab edirəm ki, səslənən fikirlər qərəzlidir və obyektivlikdən uzaqdır”
Azərbaycan Prezidenti İlham Əliyevin və Almaniyanın Federal Kansleri Angela Merkelin birgə mətbuat konfransı zamanı alman jurnalistlərindən birinin verdiyi sual göstərdi ki, hələ də məsələlərə tamamilə qərəzli, reallıqdan uzaq prizmadan yanaşan jurnalistlər var. Əvvəla Almaniyadan olan jurnalist harada olduğunu bilmir. O, Azərbaycanı Əfqanıstanla səhv salır.
Almaniya kimi inkişaf etmiş bir ölkənin özünü hamıdan üstün sayan KİV nümayəndəsinin harada olduğunun fərqinə varmaması təəccüb doğurur. Hər halda, öz ölkəsinin hökumət başçısının səfərini işıqlandıran bir jurnalistin bu cür kobud səhvi gülünc görünür, Almaniya mediasının üzərinə kölgə salır.
Bütün bunlarla yanaşı, reallıq ondan ibarətdir ki, bəzi avropalı jurnalistlərin qərəzli səpkili suallar səsləndirmələri təsadüfi xarakter daşımır. Bu, Azərbaycana qarşı hər zaman ədalətsiz mövqedən çıxış edən müəyyən dairələrin çirkin xarakterli sifarişlərindən irəli gəlir. Məsələ ondadır ki, bu, Azərbaycanı sevməyən, onun demokratik inkişafını gözü götürməyən hansısa dairələrin sifarişidir və onlar tərəfindən hazırlanaraq jurnalistə ötürülüb. Bu cür jurnalistlər yaxşı olardı ki, Azərbaycan barəsində ətraflı məlumat əldə etsinlər, sonra bu ölkəyə səfər etsinlər.
Onsuz da Prezident İlham Əliyev ətraflı cavabı ilə Azərbaycanın demokratik dəyərlərə sadiq ölkə olduğunu, bütün azadlıqların, o cümlədən söz və mətbuat azadlığının təmin edildiyini, fərqli baxışa görə heç kimin təqib olunmadığını, heç kimin cəzalandırılmadığını konkret faktlarla əsaslandırdı. Ancaq təəssüf doğuran məqam ondan ibarətdir ki, hələ də bəzi media nümayəndələri qərəzli və qeyri-peşəkar fəaliyyətlə məşğuldurlar. Hələ də Azərbaycanda bütün sahələrdə müşahidə olunan inkişafı görmək istəmirlər. Bütün bunların fonunda, bəzi beynəlxalq media təmsilçilərinin özlərini Azərbaycana qarşı qərəzli aparmalarının səbəbi nədir?
Məsələyə münasibət bildirən “Xalq Cəbhəsi” qəzetinin baş redaktoru, media eksperti Elçin Mirzəbəylinin sözlərinə görə, onların özlərini qərəzli aparmalarının bir neçə səbəbi var: “Bunun başlıca səbəbi onunla əlaqədardır ki, həmin media təmsilçiləri ayrı-ayrı siyasi dairələrin maraqlarından çıxış edərək müəyyən sifarişləri həyata keçirirlər. Özlərini müstəqil adlandırsalar da, faktiki olaraq müstəqil deyillər. Hansısa iqtisadi dairələrin korporativ maraqlarını ifadə edirlər. Yaxud da erməni diasporu ilə bu və ya digər şəkildə işbirliyindədirlər. Bundan irəli gələrək Azərbaycana qarşı qərəzli mövqedən çıxış edirlər. Digər tərəfdən, islamafobiya faktoru var. Uzun illərdir sözügedən amil də bu məsələdə müəyyən rol oynayır. Ona görə də Azərbaycana qarşı qərəzli münasibət sərgiləyirlər. Bu bir daha Avropadan olan bəzi media təmsilçilərinin bəsit düşüncəyə malik olduqlarını göstərdi. Eyni zamanda, regionu yaxından tanımadıqlarını ortaya qoydu. Bu aspektdən hesab edirəm ki, səslənən fikirlər qərəzlidir və obyektivlikdən uzaqdır. Təəssüflər olsun ki, hələ də bəzi media nümayəndələri Azərbaycana qarşı müəyyən dairələrin sifarişlərini yerinə yetirməklə məşğuldurlar. Baxmayaraq ki, onlar bunun heç bir effekt verməyəcəyinin fərqindədirlər”.
Vidadi ORDAHALLI
