Məlahət İbrahimqızı: “Həm Heydər Əliyev Fondunun rəhbəri kimi, həm birinci xanım kimi, həm millət vəkili kimi həm Azərbaycanda, həm regionda, həm də beynəlxalq aləmdə gördüyü işlərin, xeyriyyəçilik fəaliyyətinin nəticəsində çox qısa müddət ərzində…”
Azərbaycan Respublikasının Birinci vitse-prezidenti, Heydər Əliyev Fondunun rəhbəri, UNESCO və İSESCO-nun xoşməramlı səfiri, tanınmış ictimai-siyasi xadim Mehriban Əliyeva böyük və çoxşaxəli fəaliyyəti ilə nəinki Cənubi Qafqazda, MDB-də, eləcə də bütün dünyada özünə böyük nüfuz qazanıb.
O, geniş fəaliyyəti dövründə bir-birindən fərqli layihələrin müəllifi olaraq insanlığın, humanist dəyərlərin etibarlı dostuna çevirilib. Mehriban xanımın ötən dövrlərdən bəri həyata keçirdiyi layihə və proqramların əsas istiqamətlərini təhsil, mədəniyyət, səhiyyə, idman və sosial sahələr təşkil edir.
Mehriban Əliyevanın millət vəkili olduğu dövrlərdəki fəaliyyəti, Heydər Əliyev Fondunun rəhbəri olaraq həyata keçirdiyi çoxşaxəli proqram və layihələr, ölkəmizdə birinci xanım institutunu formalaşdırması, Birinci vitse-prezident kimi gördüyü işlər həmişə xüsusi təhlil və mülahizələr doğurub.
Millət vəkili Məlahət İbrahimqızı “Bakı-Xəbər”ə açıqlamasında bildirdi ki, Mehriban Əliyeva hələ birinci xanım olmazdan illər öncə də Azərbaycanda bir sıra mühüm işlər həyata keçirib: “Mehriban xanım Əliyeva Azərbaycanın çağdaş tarixində görkəmli ictimai-siyasi xadim, dövlət adamı kimi dəyərləndirilir. Mehriban xanım hələ dövlət müstəqilliyimizin ilk illərində Azərbaycanda çox böyük işlər görüb.
Bilirsiz ki, ölkəmiz 1991-ci ildə müstəqillik əldə edib, lakin 1991-1993-cü illəri respublikamızın tarixində böhran, tənəzzül dövrü kimi xarakterizə etmək olar. O dövrdə Azərbaycan xalqı fəlakətlə üz-üzə dayanmışdı. Lakin 1993-cü ildə ulu öndər hakimiyyətə gəldikdən sonra ölkəmizdə bütün sahələrdə sürətli tərəqqi başladı. Bugünkü inkişafın, nailiyyətlərin, bütün uğurların təməli qoyuldu. 1993-cü ildə ulu öndər hakimiyyətə gələndən sonra Azərbaycanda ilk görülən işlərdən biri kimi olimpiya hərəkatının əsası qoyuldu və Azərbaycan müstəqil dövlət olaraq dünyada keçirilən idman yarışlarında, beynəlxalq olimpiya oyunlarında təmsil olunmağa başladı. Məhz o dövrdə Mehriban xanım iki böyük qeyri-hökümət təşkilatını təsis edərək Azərbaycana çox böyük töhfələr verdi. O, Azərbaycan Mədəniyyətinin Dostları Fondunu yaradaraq bu qurumun xəttilə Azərbaycan mədəniyyətinin, incəsənətinin beynəlxalq aləmdə, Avropada, regionda təbliğ olunmasında müstəsna xidmətlər göstərib. Bununla paralel olaraq Mehriban xanım, hələ o vaxt birinci xanım olmamasına baxmayaraq, bir ziyalı, tanınmış ictimai-siyasi xadim kimi Azərbaycanın ən çətin günlərində öz çiyinlərinə belə xoşməramlı, çox dəyərli, Azərbaycan üçün çox önəmli olan bu işi götürmüşdü. Dediyim kimi, bir tərəfdən Azərbaycan mədəniyyətinin, incəsənətinin beynəlxalq aləmdə, regionda təbliği ilə, qorunması, araşdırılması ilə bağlı işlər görürdü. Eyni zamanda o, hələ keçən əsrin 90-cı illərinin əvvəllərində Qarabağ mədəniyyətinin, Qarabağ musiqisinin, incəsənətinin yayılması istiqamətində də çox böyük işlər həyata keçirirdi. Mehriban xanım müstəqil Azərbaycan dövlətində olimpiya hərəkatının formalaşmasında çox böyük uğurlara, ilklərə imza atdı. Bilirsiz ki, Mehriban xanım Milli Gimnastika Federasiyasının rəhbəridir və bu federasiyanın prezidenti olduğu ilk gündən çox böyük işlər görməyə başladı. Bu gün milli gimnastlarımızın dünya səviyyəsində, beynəlxalq idman yarışlarında yüksək nailiyyətlər əldə etməsi məhz Mehriban xanımın xidmətlərinin, gərgin əməyinin nəticəsidir”.
M.İbrahimqızı bildirdi ki, 2003-cü ildə Mehriban xanım ölkəmizin birinci xanımı statusu daşımağa başladı. “2003-cü ildə ulu öndərimizin siyasi varisi möhtərəm prezidentimiz İlham Əliyev xalqın böyük dəstəyi ilə prezident seçildi və artıq Mehriban xanım öz çiyinlərinə yeni missiyalar götürdü. 2003-cü ildə ilk dəfə müstəqil dövlətçilik tariximizdə birinci xanım institutu yarandı. Bununla Mehriban xanım nəcib, məsuliyyətli və eyni zamanda da çox şərəfli bir status daşımağa başladı. Birinci xanım olaraq o, həqiqətən də Azərbaycanda çox böyük işlər görməyə başladı. Birinci xanım olduğu vaxtlardan Azərbaycanda və dünyada böyük nüfuza malik olan Heydər Əliyev Fondunu təsis etdi. Bu fond Azərbaycanda, Azərbaycandan uzaqda, Şərqdə, Qərbdə, Avropada, Afrikada, Asiyada, Amerikada müxtəlif qitələrdə çox böyük xeyriyyəçilik hərəkatına start verdi. Yeniləşən Azərbaycanda yeni məktəblər layihəsi kimi ən önəmli bir layihəyə imza atdı, Heydər Əliyev Fondunun dəstəyi ilə onlarla, yüzlərlə məktəb ən yüksək standartlarla təmir olundu. Bunlar Mehriban xanımın gördüyü işlərin zərrəsidir. İstər valideyn himayəsindən məhrum uşaqlarla, istər səhiyyə sahəsində, eləcə də Qarabağla, qaçqınlarla, məcburi köçkünlərlə, şəhid ailələri ilə bağlı çoxlu işlər görüb. Həyatımızın elə sahəsi yoxdur ki, orada Mehriban xanımın imzası olmasın. Həm Heydər Əliyev Fondunun rəhbəri kimi, həm birinci xanım kimi, həm millət vəkili kimi həm Azərbaycanda, həm regionda, həm beynəlxalq aləmdə gördüyü işlərin, xeyriyyəçik fəaliyyəti nəticəsində çox qısa müddət ərzində Mehriban xanıma UNESCO-nun xoşməramlı səfiri adı verildi. Mehriban xanım Azərbaycan tarixində ilk Azərbaycan vətəndaşı idi ki, UNESCO-nun xoşməramlı səfiri adını aldı. Bu da bir ilk idi. Mehriban xanım mədəniyyətlərarası dialoqa, bəşər mədəniyyətinə çox böyük töhfələr verib. Onun xidməti insana və insanlığa xidmətdir. Mehriban xanımın aləmində, fəlsəfəsində insan amili var, onun cinsi, dini, irqi fərq etməz. Mehriban xanımın həyata keçirdiyi layihələr hər zaman gücsüzlərə, zəiflərə, dəstəyə, köməyə, haraya ehtiyacı olan insanlara yönəlib. O da ona görə çox yüksək dəyərləndirildi. Məsələn, Pakistanda çox böyük təbii fəlakətdən əziyyət çəkənlərə əlini uzadırdı, Heydər Əliyev Fondunun Afrikada, Rusiyanın müxtəlif bölgələrində layihələri olurdu. Mehriban xanım Heydər Əliyev Fondunun rəhbəri kimi dünya çapında gördüyü genişmiqyaslı işlərin nəticəsi idi ki, ona İSESCO-nun da xoşməramlı səfiri adını verdilər. Bu təkcə Azərbaycanda deyil, bütün dünyada ilk oldu ki, bir insan iki mədəniyyətin elçisi oldu. O həm UNESCO-nun, həm də İSESCO-nun səfiri oldu. Bu da Azərbaycan xalqına şərəf gətirdi”- deyə bildirən M.İbrahimqızının sözlərinə görə, Mehriban xanım millət vəkili olduğu dövrlərdə də çox böyük işlər görüb. M.İbrahimqızı qeyd etdi ki, onun təşəbbüsü ilə parlamentdə aministiya aktının qəbul olunması çox önəmli hadisə olub. Bundan əlavə, M.Əliyevanın Milli Məclisdə bir sıra qanun layihəsinin müəllifi olması da onun böyük, uğurlu fəaliyyətindən xəbər verir.
“Mehriban xanımın xidmətləri o qədər çoxdur ki, saymaqla bitməz. Eyni zamanda Mehriban xanım ölkəmizin ilk Birinci vitse-prezidenti oldu. Bu da bizdə ilk institut oldu. Mehriban xanımın fəlsəfəsində insana və insanlığa xidmət yüksək səviyyədə durur. Birinci vitse-prezident təyin olunduqdan sonra onun gördüyü ilk iş, ilk addım qaçqınlar və məcburi köçkünlərlə bağlı oldu. Bu yalnız həssas insanlara xidmət deyildi, həm də Qarabağ probleminin həllinə yönəlik bir addım idi. O, UNESCO və İSESCO-nun xoşməramlı səfiri olaraq da bu istiqamətdə beynəlxalq aləmdə çox böyük işlər görüb. Bu qurumların iclaslarında qaçqın və məcburi köçkün məsələsi, Qarabağ problemi daim gündəmdə olub. Bizim Qarabağdakı milli mənəvi irsimizlə, eləcə də Qarabağ atının dünyada tanıdılması, Qarabağ musiqisinin, incəsənətinin, muğamının təbliği ilə bağlı çox genişmiqyaslı işlərə imza atıb. Azərbaycan Mədəniyyətinin Dostları Fondunun xəttilə bu kimi xoşməramlı işlər həyata keçirib. Muğamın, aşıq musiqisinin, eləcə də Novruz bayramının UNESCO-ya daxil edilməsi də Mehriban xanımın əməyinin bəhrəsidir”-deyə bildirən M.İbrahimqızının sözlərinə görə, M.Əliyeva yalnız Azərbaycanın qeyri-maddi mənəvi irsinin deyil, başqa xalqların da dəyərlərinin UNESCO-ya daxil edilməsinə böyük dəstək verib. “Tatarıstanın bir sıra bayramlarının, eləcə də digər xalqların bayramlarının UNESCO-ya daxil edilməsinə böyük dəstək verib. UNESCO-nun Azərbaycanda keçirilən iclasında türk qəhvəsinin UNESCO-ya daxil edilməsi məsələsini qaldırıb. Bilirsiz ki, bu qəhvəyə görə uzun illərdir yunanlarla Türkiyə arasında böyük mübahisə vardı. Türkiyə deyirdi ki, bu qəhvə bizimdir, yunanlar isə bunun onlara aid olduğunu deyirdi. Bu mübahisəli bir məsələ idi. UNESCO-nun Azərbaycanda keçirilən iclasında həm Çin mətbəxinin dünyanın 5 mətbəxindən biri olduğu, eyni zamanda qəhvənin türklərə məxsus olduğu UNESCO irsində yer aldı. Bu da onun böyük xidməti idi. Heydər Əliyev Fondunun xəttilə də, eyni zamanda UNESCO və İSESCO-nun xoşməramlı səfiri kimi Azərbaycanda Birləşmiş Millətlər Təşkilatının, Avropa Şurasının, Ümumdünya Səhiyyə Təşkilatının xəttilə bir sıra beynəlxalq tədbirlər keçirildi. Bu tədbirlər də çox nadir ölkələrdə keçirilir. Bilirsiz ki, mədəniyyətlərarası dialoq forumu Azərbaycanda keçirilir. Artıq 6-cı forum keçirildi. Mehriban xanımın bütün sahələrdə gördüyü işlər saymaqla qurtarmaz. Dediyim kimi, o, bir çox ilklərə imza atıb. Biz əminik ki, bundan sonra da Mehriban xanım yeni ilklərə imza atacaq. Mehriban xanıma uğurlar, can sağlığı arzu edirik. Arzu edirik ki, Merhriban xanım müstəqil Azərbaycanın güclənməsi naminə möhtərəm Prezidentimiz İlham Əliyevin yorulmaz fəaliyyətində onunla bərabər ölkəmizə daha çox uğurlar gətirsin”-deyə millət vəkili bildirdi.
İradə SARIYEVA
