Rəsul Cahangirli: “Ölkədə qeyri-neft sektorunun inkişaf etməsi hesabına çoxşaxəli iqtisadiyyat formalaşır”
Çürümüş, laxlamış təməl üzərində müstəqil dövlət formalaşdırmaq iqtidarında olmayan Nikol Paşinyan Ermənistanda vəziyyəti sahmana salıb, sələflərinin çirkablarını təmizləməyə çalışsa da, özü bataqlığın içərisində batıb gedir.
Məsələ ondadır ki, küçə yürüşləri zamanı erməni xalqına verdiyi vədlərin yerinə yetirilməsinin qeyri-mümkün olduğunu hiss edən Paşinyan özünə imic qazanmaq üçün korrupsioner hökumətdən miras qalan mənimsəmə, rüşvətxorluq hallarını aşkarlamaqla hakimiyyətdə yerini möhkəmlətməklə vaxt qazanır. Amma, göründüyü kimi, istəyinə nail ola bilmir. Reallıq ondan ibarətdir ki, ölkə iqtisadiyyatı yerində sayır. Ermənistanın xarici borcu da durmadan artır. Ən son məlumata görə, ölkənin xarici borcu 7 milyard dolları ötüb. Bununla yanaşı, Ermənistanın xarici aktivləri vur-tut 2,4 milyard dollar təşkil edir ki, bunun da 1,2 milyard dolları sərbəst dönərli vəsaitdir.
Ermənistandan fərqli olaraq, Azərbaycanın xarici iqtisadi aktivləri 40 milyard dollardan çoxdur. Son dövrlər Azərbaycan iqtisadiyyatında baş verən inkişafı hiss etməmək qeyri-mümkündür. Ölkə iqtisadiyyatının bir sıra sahələrinə dövlətin qayğı və diqqətinin artması, beynəlxalq təcrübəyə əsaslanan yeni inkişaf metodlarının tətbiq edilməsi öz nəticəsini göstərməkdədir. Bu istiqamətdə həyata keçirilən islahatların əsas məqsədi iqtisadiyyatın şaxələndirilməsini və investisiya qoyuluşunu sürətləndirmək, qeyri-neft sektorunun yüksək inkişaf tempini təmin etmək və ixrac imkanlarını genişləndirməkdir. Bütün bunların nəticəsidir ki, Azərbaycanın valyuta ehtiyatları artmaqdadır. Ölkə iqtisadiyyatı bütün göstəricilərə görə öndədir.
Sözügedən məsələni dəyərləndirən ekspert Rəsul Cahangirlinin sözlərinə görə, Azərbaycan iqtisadiyyatı bütün parametrlərə görə Ermənistan iqtisadiyyatından öndədir: “Azərbaycan iqtisadi imkanlarına görə Cənubi Qafqazda lider mövqedədir. Azərbaycan regionda ən çox valyuta ehtiyatına malik olan ölkədir. Regionun faktiki olaraq iqtisadi lokomotivi Azərbaycan hesab olunur və bu danılmaz faktdır. Azərbaycanın vəsaiti hesabına nəinki ölkə daxilində, o cümlədən ölkə xaricində bir sıra meqalayihələr həyata keçirilir. Azərbaycanın maliyyə aktivləri hesabına Türkiyədə böyük neft-kimya kompleksləri tikilir. İranda dəmir yolu inşa edilir və s. Ölkə regionun tranzit mərkəzinə çevrilir. Bir neçə ildən sonra Azərbaycanın bununla bağlı iqtisadi imkanları daha da artacaq və böyük maliyyə resurslarına sahib olacaq. Nəzərə almaq lazımdır ki, Azərbaycan iqtisadiyyatı Ermənistan iqtisadiyyatından təkcə neft amilinə görə öndə deyil. Azərbaycanda həm də qeyri-neft sektorunun inkişaf etməsi hesabına çoxşaxəli iqtisadiyyat formalaşır. Bu da yaxın perspektivdə çox yaxşı nəticələr verəcək. İşğalçı Ermənistanın isə sabahı qeyri-müəyyən görünür. Ona görə ki, ölkənin xarici borcu durmadan artır, Ermənistan Cənubi Qafqazda bütün regional layihələrdən təcrid olunub”.
Vidadi ORDAHALLI
