Elşən Həsənov: “Yalnız nəzəriyyəni praktikaya tətbiq edəndə ortaya gözəl nəticə çıxır”
Rusiyanın Azərbaycandakı yeni səfiri Mixail Boçarnikov mətbuat konfransında deyib ki, əsas vəzifələrindən biri Azərbaycan hökuməti və ictimaiyyəti ilə sıx əlaqələr qurmaq, ölkəmizlə tanış olmaqdır.
Səfir ölkədə fəaliyyətə başlamasından bu yana artıq Qəbələ və Azərbaycanın Dağıstanla həmsərhəd olan digər regionlarına səfər etdiyini bildirib: "Əsası dövlət başçılarımızın həyata keçirdiyi görüşlər çərçivəsində praktiki məsələləri artırmaqdır. Məhz bu təmaslar əməkdaşlığımıza təsir göstərir. Əsas vəzifə onlar arasında təmasları hazırlamaqdır. Gündəlikdə noyabr ayında Gəncədə millətlərarası əməkdaşlıq forumunun keçirilməsi var. Bu, biznes, nazirliklər, dövlət başçıları nümayəndələrinin iştirakı ilə ölkələrimizin nümayəndələri arasında böyük görüş olacaq".
O, həmçinin, vurğulayıb ki, ilin sonuna qədər iqtisadiyyat nazirlərinin həmsədrlik etdiyi hökumətlərarası komissiyanın iclası keçirilməlidir: "Bu vəzifələr ilin sonunadək fəaliyyətimin birinci mərhələsinə aiddir".
Səfir daha sonra bəyan edib ki, Rusiyanın Azərbaycandakı səfirliyinin yaxın müddət ərzində əsas hədəfi iki ölkənin dövlət başçıları arasında qurulmuş əlaqələrin praktiki məsələlərlə zənginləşdirilməsidir. Ölkə başçıları arasındakı münasibətlərin praktik məsələlərlə zənginləşdirilməsi deyəndə səfir nəyi nəzərdə tutur?
Azərbaycan Sosialist Partiyasının sədri Elşən Həsənov qəzetimizə açıqlamasında bildirdi ki, Azərbaycanla Rusiya arasındakı münasibətlər əvvəlcə yaxın və mehriban qonşuluğa əsaslanır: “Bizim payımıza dünyanın bu nəhəng ölkəsi ilə qonşu olmaq düşüb. Bundan əlavə, biz həmin ölkə ilə uzun müddət eyni dövlətin tərkibində yaşamışıq. Yəni bizim onlarla çoxlu ortaq dəyərlərimiz var. Təbii ki, belə münasibətlərin tənzimlənməsində səfirlərin və ölkə başçılarının da rolu böyük olur. Fikir versəniz görərsiniz ki, Rusiya Azərbaycana səfir kimi ən təcrübəli diplomatlarını göndərir. Yeni səfirin keçirdiyi mətbuat konfransından da göründü ki, diplomat ölkəmizlə bağlı ən xırda detallar barədə belə məlumatlıdır. Hazırda Rusiya-Azərbaycan münasibətləri daha dinamik şəkildə inkişaf edir, hətta mən deyərdim ki, yeni mərhələyə qədəm qoyub. Rusiya mediasında Azərbaycanla bağlı müsbət fikirlərin yer alması münasibətlərin inkişaf etdirilməsi üçün münbit şəraitin yarandığına işarədir. Səfir bu açıqlamanı İlham Əliyevin Rusiyaya nəzərdə tutulan səfəri ərəfəsində verib. Çox güman ki, Prezidentin səfəri çərçivəsində Azərbaycan üçün fundamental əhəmiyyət kəsb edən məsələ olan Dağlıq Qarabağla bağlı müzakirələr aparılacaq. İstər ATƏT-in Minsk Qrupunun həmsədri kimi, istərsə də işğalçı Ermənistana təsir edə bilən ölkə olaraq Rusiyanın münaqişənin həll prosesində oynadığı rol mühüm əhəmiyyət kəsb edir. Bu baxımdan da ölkə başçıları arasındakı təmaslar və onlardan alınan nəticələr bizim üçün də böyük əhəmiyyət və maraq kəsb edir. Xüsusi olaraq vurğulamaq istəyirəm ki, iki ölkə arasındakı münasibətlərin qənaətbəxş səviyyədə qalmasında dövlət başçılarının şəxsi münasibətlərinin yüksək səviyyədə olması da mühüm rola malikdir. Səfir bu münasibətlərin praktik məsələlərlə zənginləşməsi deyəndə ortadakı əməli fəaliyyəti və konkret olaraq əldə edilən nəticələri nəzərdə tutur. Bilirsiniz ki, yalnız nəzəriyyəni praktikaya tətbiq edəndə ortaya gözəl nəticə çıxır. Bu baxımdan da səfirin vurğuladığı məsələnin öz tətbiqini tapması Azərbaycan üçün də böyük önəmə malikdir”.
Məhəmmədəli QƏRİBLİ
