Məhəmməd Əsədullazadə: “Münaqişənin alovlanması Ermənistanda bütün siyasi dəngələri məhvə apara bilər”
Ermənistanın eks-prezident Robert Köçəryan Paşinyanı Qarabağ danışıqlarından “dovşan kimi qaçmaqda” günahlandırıb. Belə ki, o, erməni telekanallarından birinə verdiyi açıqlamada Ermənistandakı hadisələrin Qarabağa da təsir etdiyini deyib.
Onun sözlərinə görə, Ermənistandakı hadisələr müəyyən dərəcədə Qarabağa təsir edib: “Hesab etmirəm ki, orada proseslər Ermənistandakı ilə eynidir, çünki Qarabağdakı situasiya Ermənistandakı situasiyadan fərqlənir, amma müəyyən oxşarlıq əlbəttə var. Qiymət vermək istəmirəm, çünki son vaxtlar Qarabağda olmamışam. Ola bilsin Bako Saakyanla görüşmək və birinci əldən informasiya almaq lazım gələcək”.
Eks-prezident baş nazir Nikol Paşinyanın hakimiyyətə təzə gələndə qarabağlı olmadığı üçün Dağlıq Qarabağın adından danışıqlar aparmaq mandatının olmadığı haqda bəyanatına da toxunub: “Hamı görəcək ki, o, danışıqlara gedəcək, artıq belə bəyanat verib. Mən bunu (Paşinyanın Dağlıq Qarabağın adından danışıqlar aparmamaq barədə dediklərini) təcrübəsizliklə əlaqələndirirəm, görünür, onlar təsəvvür etməyiblər ki, danışıqlardan imtina nədir və bunun hansı nəticələri olacaq. Ermənistanın birinci şəxsi yaxasını kənara çəkərək deyə bilməz ki, “mən əllərimi yuyuram”. Hətta ən pis danışıqlar da müharibədən yaxşıdır və danışıqlar ümumiyyətlə yoxdursa, o zaman müharibə yeganə yoldur”.
Köçəryan onu da bildirib ki, Qarabağ məsələsində Paşinyanla məsləhətləşmələr aparmağa və təcrübəsini bölüşməyə hazırdır: “Mən hazıram. Heç vaxt danışıqlardan qaçmamışam. Üzərinə məsuliyyət götürməyi bacarmaq və uğur əldə etməyə çalışmaq lazımdır, dovşan kimi qaçmaq yox”.
R.Köçəryanın Ermənistan prezidenti (1998-2008) olduğu 10 il ərzindən Dağlıq Qarabağ münaqişəsinin tənzimlənməsi ilə bağlı Azərbaycanla təxminən 30 dəfə danışıqlar keçirilib. Söhbət prezidentlər səviyyəsində keçirilən danışıqlardan gedir. Ancaq məhz Köçəryanın qeyri-konstruktiv siyasəti üzündən heç bir nəticə əldə olunmayıb. İndi də Köçəryan danışıqlardan elə danışır ki, sanki onun prezidentliyi dövründə Ermənistan hansısa kompromos varianta razılaşıb?!
Ümumən onun sülh danışıqları və Paşinyanla bağlı bu yanaşmasını ekspertlər necə dəyərləndirirlər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, Ermənistanın baş naziri Nikol Paşinyanın Qarabağ konfliktinin həlli ilə bağlı verdiyi bəyanatlar həqiqətən münaqişənin alovlanmasına xidmət edir: “Burada eks-prezident Robert Köçəryanın Paşinyanı ittiham etməkdə müəyyən qədər haqqı var. Ancaq məsələ ondadır ki, Köçəryan bu barədə danışmaqla hiyləgər gedişlər edir. Ona görə ki, Köçəryan 10 il prezident olduğu dönəmdə Qarabağ danışıqlarında imitasiya siyasəti yeritdi. Köçəryanın qorxusu odur ki, Azərbaycan hərbi təzyiqləri artırmaqla Paşinyanı güzəştə məcbur edə bilər. Bu da Qarabağ klanının fiaskosu olar. Ona görə də onun istəyi odur ki, Paşinyan da mənasız danışıqlara qatılsın və imitasiya davam etsin. Təbii ki, bu gün erməni ictimai-siyasi dairələri başda Paşinyan olmaqla, Azərbaycandan çəkinirlər. Münaqişənin alovlanması Ermənistanda bütün siyasi dəngələri məhvə apara bilər. Hazırda Paşinyanla Köçəryan arasında siyasi mübarizə yeni müstəviyə keçir. Köçəryan çalışacaq ki, Paşinyana hər fürsətdə zərbə vursun. Məhz onun Qarabağ kartından istifadə etməsi bundan sonra da davam edəcək. Bəli, bu gün Paşinyan Azərbaycanla danışıqlardan çəkinir. Çünki gətirəcəyi arqumentlər danışıqlarda müsbət irəliləyişə aparmayacaq. Hesab edirəm ki, Paşinyanın siyasəti il ərzində Köçəryanın müxalifəti ilə mübarizəyə həsr olunacaq. Bundan əlavə, Köçəryan yaxşı bilir ki, Paşinyan Azərbaycan Prezidenti ilə danışıqlar aparmasa, məğlub olacaq. Hər vəchlə istəyir ki, danışıqlarda Paşinyanın diplomatik məğlubiyyəti ilə ona qarşı cəbhəni genişləndirsin. Qarabağ klanı ilə Paşinyanın Ermənistanda sosial bazasını zəiflətsin. Amma Köçəryanın cəhdləri mənasızdır. Ona görə ki, Paşinyan Qərbin dəstəyi ilə Qarabağ klanını məğlub edəcək”.
Vidadi ORDAHALLI
