Vüqar Qədirov: “Xəzərin hüquqi statusu ilə bağlı məsələ illər öncə ölkəmizin konkret mövqeyi ilə gündəmə gəlib”
Azərbaycan Respublikasının xarici işlər naziri Elmar Məmmədyarov Aktauda keçirilən Xəzəryanı ölkələrin dövlət başçılarının V zirvə toplantısının yekunlarına dair müsahibə verib.
Nazir bildirib ki, Konvensiyanın razılaşdırılması prosesi üzv dövlətlər tərəfindən davamlı səylər tələb edirdi: “Etiraf etməliyik ki, Konvensiyanın razılaşdırılmasının son mərhələsi heç də asan olmayan müzakirələrdən keçib. 2017-ci ilin dekabrında Moskvada keçirilmiş Xəzəryanı dövlətlərin xarici işlər nazirlərinin ikigünlük iclası çox intensiv xarakter daşıdı və nəhayət ki, Konvensiyanın razılaşdırılması istiqamətində əsas irəliləyiş əldə olundu. Bir sıra müddəalar üzrə çox ağır müzakirələr keçdi. Amma danışıqlar xoş niyyətlə və qarşılıqlı etimad şəraitində aparıldığı təqdirdə, müsbət nəticə verir. Bütün bu müzakirələrin yekunu olaraq, Xəzəryanı dövlətlərin Aktauda keçirilmiş zirvə toplantısında Konvensiya imzalanmaq üçün prezidentlərə təqdim olundu və biz bu nailiyyətə imza atdıq”.
Göründüyü kimi, xarici işlər naziri bildirib ki, Konvensiyanın imzalanması üçün ciddi səylər göstərilib, böyük işlər görülüb. Bəs Azərbaycan diplomatiyasının hansı addımları Xəzərlə bağlı Konvensiyanın imzalanmasının sürətlənməsində təsirli rol oynayıb?
Politoloq Vüqar Qədirovun sözlərinə görə, Konvensiyanın imzalanmasında Azərbaycan diplomatiyasının böyük rolu olub: “Xəzərin hüquqi statusu ilə bağlı məsələ illər öncə ölkəmizin konkret mövqeyi ilə gündəmə gəlib. Azərbaycan tərəfindən Xəzərin mövcud statusunun köhnəlməsi və yeni statusa ehtiyacı olması barədə təklif qeyri-müəyyən formada qarşılanmışdı. Hətta Türkmənistan nümayəndə heyəti bu anlayışı başa düşmür, Qazaxıstan isə məsələyə biganə, Rusiya isə ehtiyatla yanaşırdı. Həmin dövrdən uzun illər keçsə də, Azərbaycan tərəfinin güclü siyasi iradəsi, daim xoş qonşuluq siyasətinə sədaqəti və xoş məramı bu Konvensiyanın imzalanması yolunda maneələrin aşılmasına imkan verdi. Ölkə başçısı Konvensiyanın imzalandığı tədbirdə ölkəmizin bu istiqamətdə tutduğu konstruktiv mövqeni xüsusilə vurğuladı. Bilirsiniz ki, ölkəmiz bu istiqamətdə həm yeni təşəbbüslərlə çıxış edib, həm də yekun nəticəyə gəlməkdə mühüm əhəmiyyətə malik olan görüşlərə evsahibliyi edib. Məlumdur ki, bəzi detallarla bağlı Azərbaycanın Xəzərdəki qonşuları ilə fikir ayrılıqları mövcud olub. Hətta bu detallar belə rəsmi Bakının konstruktiv olmasına, qonşuluq münasibətlərinin ən yüksək səviyyədə qorunub saxlanmasına mane olmayıb. Bu baxımdan da Xəzərin hüquqi statusu ilə bağlı Konvensiyanın imzalanmasında Azərbaycan diplomatiyasının rolu xüsusi qeyd olunmalıdır”.
Məhəmmədəli QƏRİBLİ
