Akif Nağı: “Bunu Ermənistanın ənənəvi siyasətinin davamı saymaq olar”
Hakimiyyətə gələndən sonra Ermənistanın baş naziri Nikol Paşinyan Dağlıq Qarabağla bağlı danışıqlardan müxtəlif bəhanələrlə yayınmağa çalışır. Əvvəlcə o, danışıqlar prosesində qondarma qurumun müstəqil tərəf kimi iştirakını tələb etdi.
Bunun beynəlxalq birlik tərəfindən ciddi təpki ilə qarşılandığını gördükdə isə ortaya növbədənkənar parlament seçkiləri ilə bağlı bəhanəni atdı. Ən əsası da Ermənistanın daxilindəki sabitliyin lazımi səviyyədə olmadığını əsas gətirərək, danışıqlardan yayındırıcı manevrlər etməyə başladı. Görünən budur ki, Paşinyan özündən əvvəlki sələflərindən heç nə ilə fərqlənmir və bütün gücü ilə vaxt udmağa çalışır. Hətta, demək olar ki, onun nümayiş etdirdiyi davranışlar Serj Sarkisyandan da qeyri-konstruktiv olduğunu üzə çıxarmış olur. İndi gəlin onun son açıqlamasına diqqət edək. Ermənistanın baş naziri Nikol Paşinyandan Azərbaycanla həmsərhəd Tavuş vilayətində jurnalistlər Dağlıq Qarabağ münaqişəsinə dair danışıqlar və Prezident İlham Əliyevlə görüş barədə hansı yeni xəbərin olduğunu soruşublar. Erməni KİV-lərin yaydığı məlumata görə, Paşinyan “konstruktiv danışıqlara hazır olduğunu” bildirib, amma bunun üçün hazırlığa ehtiyac olduğunu vurğulayıb: “Dağlıq Qarabağ münaqişəsinin tənzimlənməsi üzrə danışıqlar prosesinin bərpası üçün müəyyən hazırlıq mərhələsi lazım gələ bilər. Biz artıq bəyan etmişik ki, proseslərin istənilən inkişaf ssenarasinə, o cümlədən danışıqların bərpasına hazırıq. Xüsusilə hazırkı siyasi vəziyyətdə müəyyən hazırlıq mərhələsi lazımdır, müəyyən zəmin yaradılmalıdır”.
Göründüyü kimi, Paşinyan yenə söz oynatmaqla məşğuldur. Bir tərəfdən deyir ki, konstruktiv danışıqlara hazırdır, digər tərəfdən isə bunun üçün hazırlığın vacibliyini dilinə gətirir. Paşinyanın son açıqlamasını Dağlıq Qarabağla bağlı danışıqlardan yayınma cəhdi kimi qiymətləndirmək olarmı?
Qarabağ Azadlıq Təşkilatının sədri Akif Nağı qəzetimizə açıqlamasında bildirdi ki, Paşinyan Ermənistanın ənənəvi taktikasından istifadə edir: “Onlar hər cəhdlə yenidən danışıqlar prosesini uzatmağa çalışırlar. Mən belə başa düşürəm ki, Paşinyan bu vaxtı situasiyanın tam aydınlaşdırılması üçün edir. Çünki onlar hələ də kimin yanında olacaqlarını konkret müəyyənləşdirə bilməyiblər. Rusiya ilə Qərbin arasında sərgardan qalan Paşinyanın öz daxilində də bu qeyri-müəyyənlik hökm sürür. Xatırlayırsınızsa, bir neçə gün bundan əvvəl Paşinyan belə bir açıqlama verdi ki, danışıqlara hazırdırlar, lakin Ermənistanın öz üzərinə götürdüyü öhdəliklər çərçivəsi və Ermənistanın maraqları kontekstində bunun aparılmasını istəyirlər. Bu, çox diqqətçəkən bir məqamdır. Söhbət hansı öhdəliklərdən gedir? Paşinyan bu öhdəlikləri Rusiya və ya Qərb qarşısında götürüb? Buna heç bir aydınlıq gətirilmədi. Maraqlı olan digər nüans isə bundan ibarətdir ki, əvvəl Paşinyan danışıqlardan Ermənistanın yaxasını kənara çəkirdi və danışıqların qondarma qurumla aparılmasının zəruriliyini vurğulayırdı. İndi isə bu danışıqlarda birbaşa Ermənistanın maraqlarını önə çəkir və deyir ki, problem ölkəsinin maraqları çərçivəsində həll edilməlidir. Hesab edirəm ki, Paşinyanın son açıqlaması onun danışıqlar prosesindən yayındığını bir daha sübut edir. Bizim şərtlərimiz bəllidirsə, hansı hazırlıq mərhələsindən söhbət gedə bilər? İlkin mərhələ bundan ibarət olmalıdır ki, Ermənistan işğal etdiyi ərazilərdən çıxmalıdır. Ortada “Lavrov planı” deyilən bir sənəd var. Maraqlıdır ki, Paşinyan həmin sənədin heç yanından “keçmək” istəmir. Bir daha bildirirəm ki, Paşinyan özünə yeni havadar axtardığı üçün bələ vəziyyətə düşüb. Bunu Ermənistanın ənənəvi siyasətinin davamı saymaq olar”.
Məhəmmədəli QƏRİBLİ
