Fikrət Sadıqov: "Şröderin addımında iqtisadi amildən çox, siyasi mesajlar nəzərə çarpır"
Almaniyanın keçmiş kansleri Rusiya prezidenti Vladimir Putinin təklifini qəbul edərək, "Rosneft" şirkətinin direktorlar şurasının üzvü olmağa razılıq verib. Qərbin aparıcı demokratik qəzetləri bu təyinatı birmənalı olaraq yeganə sözlə ifadə edib - satqınlıq! Qərb analitikləri hesab edirlər ki, Gerhard Şröderin "Rosneft"in direktorlar şurasına daxil olması Qərb siyasətçisinin avtoritar dövlətə satılmasının böyük nümunələrindən biri sayılmalıdır.
Qərb mətbuatı Şröderin bu addımla ən çox doğma partiyası sosial-demokratları pis vəziyyətdə qoyduğunu yazır:
"Alman sosial-demokratlarının qarşıdakı Bundestaq seçkilərində Martin Şults rəhbərliyində onsuz da heç bir ümid vəd etməyən kampaniyası Şröderin əli ilə çökür".
Alman mətbuatının yazdığına əsasən, Martin Şults Şröderə zəng edərək onu qərarından vaz keçməyə çağırıb, lakin həmin səy də səmərə verməyib.
Rusiya-Almaniya münasibətlərinin neftlə bağlı məqamlara görə kəskin fazaya qədəm qoyduğu bir mərhələdə Şröderin bu addımını necə dəyərləndirmək olar?
Politoloq Fikrət Sadıqov qəzetimizə açıqlamasında bildirdi ki, əslində, bu məsələdə qeyri-adi nəsə yoxdur: "Yəni kənar müşahidəçi üçün belə görünə bilər ki, dəvət ediblər, bu da qəbul edib. Əslində isə burada böyük bir toqquşma var - maraqların uzlaşmaması. Bilirsiniz ki, Şröder sıradan bir siyasətçi deyil. Dünyada böyük nüfuza malikdir. Onun kansler olduğu dönəmə diqqət etsəniz, Rusiya ilə aralarında ciddi yaxınlaşmanın olduğunu görəcəksiniz. Doğrudan da iki ölkə arasındakı münasibətlərin ən mehriban dövrü məhz Şröderin kanslerlik dönəmi sayıla bilər. Vəzifədən çıxandan sonra da onun Rusiya ilə birgə layihələri olub. Yəni bu qərar spontan olaraq verilməyib. Qərb dairələrinin, Almaniya rəsmilərinin bu məsələyə verdiyi aqressiv münasibəti anlayırıq. Çünki Rusiya ilə Qərb arasında olan indiki ziddiyyətli məqamda Şröderin məlum addımı Rusiyaya əlavə nəfəslik, qarşı tərəfə isə zərər verir. Moskvanın keçmiş kansleri işə götürməsi həm də onu sübut edir ki, Qərbdə Moskvaya qarşı tətbiq edilən sanksiyaları qəbul etməyən parlaq siyasətçilər var. Rusiya bu addımı ilə özünə qarşı tətbiq edilən ideoloji blokadanı məharətlə yarır. Bir daha təsdiq olunur ki, heç də bütün Qərb dairələri Rusiyaya qarşı tətbiq edilən sanksiyaları dəstəkləmir. Şröderin addımında iqtisadi amildən çox, siyasi mesajlar nəzərə çarpır".
Məhəmmədəli QƏRİBLİ
