Qabil Hüseynli: "Gerasimovun səfəri Türkiyə üçün vacib və uğurlu sayıla bilər"
Rusiya Silahlı Qüvvələrinin Baş Qərargah rəisi Valeri Gerasimov Türkiyəyə səfər edəcək. Bunu Türkiyənin xarici işlər naziri Mövlud Çavuşoğlu deyib. V.Gerasimov türkiyəli rəsmilərlə Suriya böhranını müzakirə edəcək. M.Çavuşoğlu səfərin dəqiq tarixini açıqlamayıb.
Nazir əlavə edib ki, Türkiyə və Rusiya Suriya böhranının nizamlanması məsələsində fəal əməkdaşlıq edirlər.
O bildirib ki, ABŞ-dan fərqli olaraq, Rusiya YPG ("Kürd xalq özünümüdafiə dəstəsi") və PYD-ni ("Demokratik İttifaq") silahlandırmır. Bu səfərin Rusiya-Türkiyə, NATO-Rusiya münasibətlərinə nə kimi təsiri olacaq?
Ekspert Elşən Mustafayev qəzetimizə açıqlamasında bildirdi ki, Rusiya Baş Qərərgah rəisinin Türkiyəyə nəzərdə tutulan səfəri iki ölkə arasındakı münasibətlərin daha da inkişaf etdirilməsi baxımından önəmli sayıla bilər: "Bu səfərə NATO- Rusiya münasibətlərinə təsir baxımından yanaşmaq doğru olmaz. Türkiyənin vacib NATO ölkəsi olduğunu nəzərə alanlar belə qənaətə gəlir. Ancaq görürsünüz ki, məhz Yaxın Şərqdəki problemlərə yanaşmaya görə Türkiyənin mövqeyi digər NATO ölkələrindən kəskin fərqlənir. Rusiya və Türkiyə, faktiki olaraq, Suriyada gedən müharibənin içindədirlər. Bu iki ölkə arasında münasibətlərin pisləşməsi və sonra normallaşması da məhz Suriya konfliktinə görə olub. Tehranda Suriya ilə bağlı keçirilən zirvədən də göründü ki, region ölkələri problemin çözülməsini Rusiya ilə birgə etmək niyyətindədirlər, nəinki Qərb və ABŞ-la. Çavuşoğlunun açıqlamasındaan da aydın görünür ki, onlar bu istiqamətdə Rusiyanın roluna ABŞ-dan daha çox üstünlük verirlər. ABŞ və Qərb isə Türkiyənin bu davranışlarından xoşlanmır və buna görə də kürd kartını ortaya atır. Gizli yolla YPG-yə yardım edirlər. İraqda isə kürd muxtariyyətinin müstəqilliyi ilə bağlı referendumun keçirilməsinə israr edirlər. Türkiyənin baş diplomatının məsələyə münasibəti sərt olub. O deyib ki, ölkə (İraq) bu qədər problem yaşayarkən, müstəqillik referendumu keçirmək vəziyyəti daha da gərginləşdirə bilər. Aydın görünür ki, Türkiyəni əhatə edən problemlər istiqamətində ona daha yaxın mövqedən Rusiya çıxış edir, nəinki əzəli müttəfiqləri. Bu baxımdan da Gerasimovun səfəri Türkiyə üçün vacib və uğurlu sayıla bilər".
Məhəmmədəli QƏRİBLİ
