Könül Quluzadə: "Ancaq Rusiyanın daxilindəki vəziyyətdən doğan təbii artım məsələsi heç də ürəkaçan deyil və yaxın illərdə daha da pisləşə bilər"
Rusiya yaxın dövrlərdə son 20 ildə görünməyən köç dalğası ilə üz-üzə qalacaq. Bu barədə Pentaqona yaxınlığı ilə tanınan, "Kölgə CIA" adlandırılan ABŞ-ın məşhur kəşfiyyat və analiz şirkəti - "Stratfor"un hesabatında bildirilir.
Rusiyada ixtisaslı kadrların son dövrdə ölkəni tərk etdiklərinə işarə edilən hesabatda qeyd olunur ki, Rusiyadan beyin axını ölkənin iqtisadiyyatına və siyasətinə də təsir edir.
Hesabatda bildirilir ki, hakimiyyətə qarşı narazılıqdan dolayı xaricə köç edən Rusiya vətəndaşlarının sayı getdikcə artır. Gəlirlərin azalması və ictimai narazılıqların artması da buna təsir edir.
Rusiyadakı gələcəyinə inamını itirən yüksək ixtisaslı mütəxəssislərin ölkəni tərk etdiklərini məlumat verən Amerika şirkəti, beyin axını dalğasının uzun illər ərzində Rusiya iqtisadiyyatına zərər verəcəyini bildirir. "Stratfor" Rusiyadan yaşanacaq köç dalğasının ölkəyə 1,5 trilyon dollar ziyan vuracağını proqnozlaşdırır.
Hesabatda Rusiyanı son iki ildə çox sayda milyoner və milyarderin tərk etdiyi xatırladılır.
Bu hesabatdakı məqamları nə dərəcədə real saymaq olar?
Ekspert Könül Quluzadə qəzetimizə bildirdi ki, bu informasiyaya ABŞ maraqları kontekstindən yanaşmaq lazımdır: "Sırf miqrasiya baxımıdan yanaşdıqda məlum olur ki, Rusiyada bu sahədəki vəziyyət elə də katastrofik həddə çatmayıb. Bilirsiniz ki, hazırda Rusiya ilə ABŞ arasında ciddi qarşıdurma yaşanır. Bu vəziyyət həm də tərəflər arasında informasiya müharibəsinin olmasını labüd edir. "Stratfor"un çaldığı həyəcan təbilini də bu qəbildən saya bilərik. Rusiya ərazi baxımından dünyanın ən böyük ölkəsidir. Əhalisinin sayı ilə ərazisinin böyüklüyü arasında ciddi təzad var. Eyni zamanda, həmin ölkədə əhalinin təbii artımı baxımından vəziyyət ürəkaçan deyil. Ölənlərlə yeni doğulanlar arasında kəskin disbalans mövcuddur. Hiss olunur ki, bu faktor Rusiya hakimiyyətini dərindən narahat edir. Məhz bu səbəbdəndir ki, hökumət çoxuşaqlılığın olması ilə bağlı ciddi güzəştlər və həvəsləndirici tədbirlər həyata keçirir. Bütün bu reallıq eyni zamanda Rusiyaya çoxlu sayda miqrant qəbul etməyə imkan verir. Hazırda Rusiyada miyonlarla miqrant yaşayır. Vəziyyətin dəyişməsi, müəyyən islahatlar miqrantların ölkəni tərk etməsilə nəticələnir ki, bu da Rusiyaya sərf etmir. Buna görə də Rusiya sərt miqrasiya qanunvericiliyinin tətbiqində maraqlı deyil. Sırf Rusiya vətəndaşlarının kütləvi şəkildə ölkəni tərk etməsi üçün isə elə bir ciddi əsas yoxdur. Düzdür, böyük kapitala sahib olan bəzi şəxslər xaricdə, nisbətən liberal iqtisadiyyatın olduğu yerdə iş qurmaqda maraqlıdır. Ancaq bu heç də o anlama gəlmir ki, Rusiyanı kütləvi boşalma gözləyir. Ancaq Rusiyanın daxilindəki vəziyyətdən doğan təbii artım məsələsi heç də ürəkaçan deyil və yaxın illərdə daha da pisləşə bilər".
Məhəmmədəli QƏRİBLİ
