Yeganə Hacıyeva: "Region dövlətlərinin və regionda iqtisadi marağı olan güclərin sammitdə təmsil olunmaması..."
Rusiya xarici işlər naziri Sergey Lavrov Türkiyə, Rusiya və İranın Suriya ilə bağlı üçtərəfli sammitinin vaxtını açıqlayıb. Hər üç ölkə 8-9 avqustda İran paytaxtında Suriya məsələsini müzakirə edəcək.
Daha əvvəl Rusiyanın Tehrandakı səfirliyi görüşün Tehranda keçiriləcəyini açıqlasa da, dəqiq tarixi deməmişdi.
Tehranda keçiriləcək Suriya sammiti region üçün nə vəd edir?
Politoloq Yeganə Hacıyeva qəzetimizə bildirdi ki, sammitin keçirildiyi yer və iştirakçı ölkələrin palitrası maraqlı mənzərəni ortaya qoymuş olur: "Suriya probleminin müzakirə olunduğu sammit ilk dəfədir Avropa Birliyinin operatorluğu ilə ABŞ-ın iştirakı olmadan keçirilir. Maraqlı burasıdır ki, sammitdə iştirak edən ölkələrin hər biri Suriyada marağının olduğunu gizlətmir. Hər üç ölkənin konfliktin həllilə bağlı öz baxışları var. Və bu mövqelər daim iştirakçılar arasında haçalanıb. Yəni tərəflərin bir-birinə asan güzəştə gedəcəyini iddia etmək mümkün deyil. Regional təhlükəsizliklə bağlı şərtlərdə Rusiya ilə İranın marağında uzlaşma var. Türkiyə isə fərqli mövqe sərgiləyir. Rusiya üçün Suriya konflikti iqtisadi cəhətdən xeyli xərc deməkdir. Bu səbəbdən də prosesin tez yekunlaşmasını istəyir. Gələn il Rusiyada prezident seçkiləridir. Buna görə də Rusiya seçkilərə kimi Suriyada irəliləyişə nail olmağı hədəfləyir. Bu sammit, eyni zamanda, Yaxın Şərqdə ABŞ-ın ziyanına olan güclərin bir araya gəlməsinin rəsmiləşdirilməsi kimi qiymətləndirilə bilər. Çox maraqlıdır ki, bu format ABŞ-ın yeni administrasiyasını o qədər də narahat etmir. Region dövlətlərinin və regionda iqtisadi marağı olan güclərin sammitdə təmsil olunmaması, eləcə də iştirakçıların konfliktin həllinə müxtəlif baxış ortaya qoyması tədbirin uğurla nəticələnəcəyinə dair ehtimalları xeyli azaldır. Biz qısa müddət ərzində bu nəticəni görəcəyik. Yəqin ki, Rusiya bu məsələdə maksimum dərəcədə çalışacaq ki, ortaq məxrəc əldə etsin. Çünki Suriya məsələsinin tez həll edilməsi hamıdan çox həmin ölkəyə lazımdır".
Məhəmmədəli QƏRİBLİ
