Vəfa Heydərli: "Bütün bunlar onu deməyə əsas verir ki, Almaniyanın sifarişinə qeyd-şərtsiz əməl olunmayacaq"
Almaniya hökuməti Avropa İttifaqının icra orqanı Avropa Komissiyasına müraciət edərək Türkiyə ilə Gömrük Birliyi anlaşmasının yenilənməsinin təxirə salınmasını istəyib. Almaniya Avropa Komissiyasından Türkiyəyə iqtisadi təzyiq göstərilməsini də tələb edib.
Bu tələblər Almaniya tərəfindən Aİ-nin xarici siyasət və təhlükəsizlik məsələləri üzrə ali nümayəndəsi Federika Mogerini və Avropa Komissiyasının genişlənməyə məsul nümayəndəsi Yohhanes Hana göndərilən məktubda əksini tapıb. Məktubda Aİ üzvlüyünə hazırlıq mərhələsi çərçivəsində Türkiyəyə ayrılan maddi yardımların kəsilməsi məsələsinin konkretləşdirilməsi tələb edilir. Eyni zamanda, Berlin hesab edir ki, Aİ Türkiyə ilə Gömrük Birliyi anlaşmasının müasirləşdirilməsi mövzusunda Ankara ilə aparılan müzakirələri dondurmalı, demokratiya və hüququn üstünlüyünə hörmət etməsi üçün Türkiyəyə təzyiq göstərməlidir.
Qeyd edək ki, Türkiyə ilə Almaniya arasında bir müddətdir gərginlik hökm sürür. Gərginliyin səbəbi Almaniyanın Türkiyədə hərbi çevriliş cəhdində ittiham edilən hərbçilərə, mülki şəxslərə, eləcə də Türkiyədən mühacirət etmiş jurnalistlərə sığınacaq verməsi, Türkiyənin isə Almaniya vətəndaşı olan jurnalisti və hüquq müdafiəçisini həbs etməsidir.
Almaniyanın bu tip müraciəti Türkiyə üçün nə vəd edir?
Politoloq Vəfa Heydərli qəzetimizə bildirdi ki, Türkiyə ilə Almaniyanın münasibətlərinin korlanmasında bir sıra faktorlar mühüm rol oynayıb: "Bildirilir ki, türk-alman münasibətləri Aleksandr Neu adlı şəxs səbəbindən soyuyub və düzəlməz həddə çatıb. Almaniya mətbuatı yazır ki, münasibətlərin pisləşməsində kulminasiya nöqtəsi alman deputatların Konyadakı NATO bazasını ziyarət etməsinə icazə verilməməsi olub. Alman tərəfi bu məsələni şişirtsə də, icazənin verilməməsi səbəbinin üzərindən sükutla keçib.
İş ondadır ki, Konyada yerləşən NATO bazasını ziyarət etmək istəyən alman heyəti arasında sol partiyadan Bundestaqa seçilən millət vəkili Aleksandr Neu da olub. Aleksandr Neu keçmişdə PKK-nı açıq dəstəkləyən bəyanatlar verib. Türkiyə də bu səbəbdən deputatları hərbi bazaya buraxmaqdan imtina edib.
Aleksandr Neu PKK terror şəbəkəsi ilə əlaqədə olduğu səbəbindən rəsmi Ankara nümayəndə heyətinin Konyada yerləşən İncirlik bazasına ziyarətini rədd edib.
Qeyd edim ki, ki, Aleksandr Neu ötən ilin avqustunda radioya müsahibəsi zamanı PKK-nın Türkiyədəki fəaliyyəti haqda müsbət fikirlər səsləndirib. Ancaq bu heç də o demək deyil ki, Gömrük Birliyi Almaniyanın istəyinə sözsüz tabe olacaq. Müraciətin ardınca keçirilən mətbuat konfransında Türkiyə ilə Gömrük İttifaqının münasibətlərinin möhkəmlənməsinin hər iki tərəf üçün mühüm iqtisadi faydalar qazandırılacağı bildirildi. Komissiya Türkiyə ilə Gömrük İttifaqının münasibətlərinin yenilənməsi üçün Aİ üzvü ölkələrdən hazırda səlahiyyət tələb edildiyini, yenilənmiş razılaşmanın hər iki tərəf üçün faydalı ola biləcəyini bəyan edib.
Aİ Komissiyasının mətbuat katibi Karlos Martin Ruis De Qordejuele bildirib ki, son hadisələr fonunda Türkiyə ilə münasibətlər davam etdirilməlidir. Bütün bunlar onu deməyə əsas verir ki, Almaniyanın sifarişinə qeyd-şərtsiz əməl olunmayacaq".
Məhəmmədəli QƏRİBLİ
