Şimali Koreyanın ötən həftə sonu növbəti dəfə "Xvason-14" qitələrarası ballistik raketinin uğurlu sınağını keçirməsindən sonra dünyanı maraqlandıran əsas məsələ yeni nüvə müharibəsinin nə zaman başlanacağıdır. Rəsmi Pxenyan bəyan edir ki, qitələrarası ballistik raketin buraxılışı qonşu ölkələr üçün heç bir təhlükə yaratmayıb. O da vurğulanır ki, raket Yaponiyanın iqtisadi zonası istiqamətində buraxılıb. Məsələyə ilk növbədə ABŞ kifayət qədər sərt reaksiya verərək müharibə hazırlığına başlayıb.
Şimali Koreya, öz növbəsində, son raket sınağının yeni sanksiyalara görə Vaşinqtona sərt xəbərdarlıq olduğunu bildirib. Şimali Koreya lideri Kim Çen İn yeni sınaqları ABŞ üçün ciddi xəbərdarlıq adlandırıb. O bəyan edib ki, Birləşmiş Ştatlar tərəfindən Pxenyana qarşı yönələn sanksiya və hərbi təhdidlər yalnız ölkənin nüvə gücünün artırılmasına olan meylini gücləndirir. Onun sözlərinə görə, nüvə proqramı strateji gücdür, ona görə bu dayandırıla bilməz: "ABŞ bizim dövlətimizə toxunmağa cürət edərsə, təhlükə altında olacaq".
Şimali Koreyanın Xarici İşlər Nazirliyinin bəyanatında isə deyilir ki, Vaşinqton kommunist ölkəsinə ziyan vurduğuna dair yanlış xülyalarından ayılmalıdır. Pxenyanın bəyanatı ABŞ hava qüvvələrinin iki B-1B bombardmançılarını Koreya yarımadası üzərində uçuşa göndərməsindən sonra səslənib. Raketin buraxılmasından sonra Ağ Ev bəyanatında bildirib ki, Şimali Koreyanın raket sınağı ölkəni daha da çox təcrid edəcək düşüncəsiz və təhlükəli bir addımdır. Bəyanatda əlavə edilir ki, ABŞ ölkənin və regiondakı tərəfdaşlarının təhlükəsizliyini qorumaq üçün bütün lazımi tədbirləri görəcək.
Artıq Şimali Koreyanın qitələrarası ballistik raket sınağına cavab olaraq, ABŞ və Cənubi Koreya nəzarətlərində olan su hövzələrinə bir neçə raket buraxıblar. Ordu rəsmiləri bildiriblər ki, raket əleyhinə müdafiə sistemi, ehtiyac yarandığı halda, çox sürətlə işlək vəziyyətə gətirilə bilər. ABŞ prezidenti Donald Tramp da Koreya tərəfindən qitələrarası ballistik raketin sınaqdan çıxarılması ilə əlaqədar bəyanat verib: "Şimali Koreya tərəfindən növbəti qitələrarası ballistik raketin sınaqdan çıxarılması - bir aydan da az müddət ərzində ikinci belə test bu rejimin daha bir düşüncəsiz və təhlükəli addımıdır. Birləşmiş Ştatlar bu raket sınağını pisləyir, bu cür sınaqların və həmin silahların guya Şimali Koreyanın təhlükəsizliyini təmin etməsi barədə həmin rejimin müddəalarını rədd edir".
Prezident qeyd edib ki, əslində belə sınaqların əks təsiri var. Bundan başqa, Tramp Çinin Şimali Koreyanın silah proqramını dayandırmağa kifayət qədər səy göstərmədiyini iddia edərək məyus qaldığını bildirib: "Mən Çindən çox məyus olmuşam. Bizim ağılsız keçmiş liderlərimiz onlara ticarətdən yüzlərlə milyard dollar əldə etməyə imkan veriblər, amma onlar bizim üçün Şimali Koreya ilə bağlı heç nə etmirlər, sadəcə danışırlar. Biz bunun davam etməsinə icazə verməyəcəyik. Çin bu problemi asanlıqla həll edə bilər". ABŞ-ın BMT yanında daimi nümayəndəsi Nikki Heyli bildirib ki, Şimali Koreya ətrafındakı vəziyyətlə bağlı söhbətlərə son qoymağın və fəaliyyətə başlamağın vaxtı gəlib çatıb. O, Çin, Yaponiya və Cənubi Koreyanı təzyiqi gücləndirməyə çağırıb: "Şimali Koreya barədə danışmaq kifayətdir. Çin hərəkət etmək lazım olduğunu bilir. Yaponiya və Cənubi Koreya təzyiqi gücləndirməlidir". Heyli həmçinin qeyd edib ki, bu təkcə ABŞ-ın problemi deyil. O, beynəlxalq həll tələb edir.
Bütün bunların ardınca ABŞ bölgəyə yeni hərbi qüvvələr yeritməyə başlayıb. Yaranmış vəziyyətdə ekspertlər hərbi əməliyyatların istənilən an başlaya biləcəyini istisna etmir. Artıq hər iki tərəf hərbi qüvvələrini hazır vəziyyətə gətirib. ABŞ Hərbi Hava Qüvvələrinin Sakit okean üzrə komandanı, general Terrens Şonessi bildirib ki, Birləşmiş Ştatların Silahlı Qüvvələri, zərurət yaranarsa, Şimali Koreyanın hərəkətlərinə cavab olaraq güc tətbiq etməyə həmişə hazırdır: "Şimali Koreya regionda sabitlik üçün ən aşkar təhlükə olaraq qalmaqdadır". Şonessi vurğulayıb ki, Şimali Koreya probleminin həllində diplomatiya prioritet olaraq qalır.
Onun sözlərinə görə, bununla yanaşı, Vaşinqton öz müttəfiqləri qarşısında məsuliyyət daşıyır, dönməz sədaqət nümayiş etdirir, eyni zamanda pis ssenariyə hazırlaşır: "Əmr olsa, biz öz seçəcəyimiz yerdə sürətli, məhvedici və dağıdıcı güclə cavab verməyə hazırıq". Belə vəziyyətdə isə Şimali Koreya ABŞ-a nüvə zərbəsi endirməyə hazır olduğunu bəyan edir. "Washington Post" nəşrinin məlumatına görə, Pentaqonun kəşfiyyat birliyi olan "Defence İntelligency Agency" (DİA) Şimali Koreyanın ballistik nüvə raketinə sahib olduğunu təsdiq edib. Ekspertlərə görə, Şimali Koreyanın son addımları Koreya yarımadasında ciddi toqquşmalara səbəb ola bilər. Həmçinin, "Washington Post" ABŞ-ın Pxenyanın qarşısını almaq üçün ciddi tədbirlərə əl atmağa hazırlaşdığını, hərbi toqquşmalara gedə biləcəyini xüsusi olaraq vurğulayır.
Tahir TAĞIYEV
