Xəzər Teyyublu: "Nə baş veribsə, Saakaşvilinin xarakterindən irəli gəlib"
Gürcüstanın sabiq prezidenti, Ukraynanın Odessa vilayətinin eks-qubernatoru Mixeil Saakaşvili Ukrayna vətəndaşlığından çıxarılıb. Bu barədə Ukrayna Dövlət Miqrasiya Xidmətinin saytında məlumat yayılıb. Məlumatda bildirilir ki, Ukrayna prezidenti Petro Poroşenko M.Saakaşvilinin vətəndaşlıqdan çıxarılması ilə bağlı fərman imzalayıb. Saakaşvili ilə bağlı materiallar Ukrayna Baş Prokurorluğuna göndərilib.
Ukrayna Radikal Partiyasından olan deputat İqor Moseiyçuk Saakaşvilinin Ukrayna vətəndaşlığından məhrum edilməsini doğru addım sayıb: "Saakaşvilini Ukrayna vətəndaşlığından məhrum etdilər. Bu göstərir ki, prezident Poroşenko, nəhayət, öz səhvlərini etiraf etməyə başlayıb".
M.Saakaşvili Ukrayna vətəndaşlığından məhrum olunmasını qanunsuz adlandırıb. Bu barədə o, "CNN" telekanalına müsahibəsində bildirib. Onun sözlərinə görə, bu qərar Ukrayna hakimiyyətinin siyasi rəqibləri aradan qaldırmaq üçün apardığı kampaniyanın bir hissəsidir.
Qeyd edək ki, hazırda eks-prezident ABŞ-dadır. O, Ukraynaya qayıtmaq üçün hüquqi yollar axtaracağını bəyan edib.
Gürcüstan prezidenti Georgi Marqvelaşvili ölkənin sabiq prezidenti M.Saakaşvilinin Ukrayna vətəndaşlığından məhrum edilməsinə münasibət bildirib. G.Marqvelaşvili xarici jurnalistlərlə görüşdə deyib ki, Saakaşvili Gürcüstanı tərk etməməli idi. "Saakaşvili Gürcüstan vətəndaşlığından imtina edəndə mən çox təəssüfləndim. Çünki iki dəfə prezident seçilmiş ölkənin keçmiş birinci şəxsinin Gürcüstan vətəndaşlığı olmalıdır. Baş komandan olmuş şəxs ölkəni tərk etməməli idi", - deyə prezident vurğulayıb.
Saakaşvilinin başına gələnlər onun şəxsi keyfiyyətlərilə bağlıdır, yoxsa başqa nəsə var?
Klassik Xalq Cəbhəsi Partiyasının sədr müavini Xəzər Teyyublu qəzetimizə açıqlamasında bildirdi ki, Saakaşvilinin başına gələnlərdə onun şəxsi xarakterindən irəli gələn faktorlar az deyil: "Saakaşvili Rusiya ilə antoqonist mövqedə olan liderdir. O bu mövqeyini Gürcüstanın prezidenti olanda da açıq nümayiş etdirib. ABŞ və Qərb dairələri onu öz adamları sayır. Ukraynada baş verən hadisələrdən sonra o öz ölkəsinin vətəndaşlığından imtina edərək Ukraynaya getdi. Hətta orada mühüm vəzifə də aldı. Düzü, Saakaşvilinin öz ölkəsinin vətəndaşlığından imtina etməsi çox təəccüblü görünürdü. Çünki həmin ölkənin əksər uğurları məhz bu liderin adı ilə bağlı idi. Təbii ki, onun məhz Ukraynada vəzifə ilə təmin olunması geniş planın tərkib hissəsi idi. Bununla ABŞ və Qərb dairələri Ukraynadan Rusiyaya qarşı ikinci cəbhəni açırdılar. Kifayət qədər xarizmatik və tanınmış bir lider bu məsələdə Ukrayna prezidentinə yaxından kömək edə bilərdi. Ancaq biz tərsini gördük. Saakaşvili tez-tez Ukraynanın vəzifəli şəxslərilə açıq qalmaqala girirdi. Sonda bu gərginlik onunla Poroşenko arasında yaşanmağa başladı. Siyasi kurs baxımından onların arasında ciddi fikir ayrılığının olmasını düşünmürəm. Çünki hər ikisi Qərbin adamı sayılır. Nə baş veribsə, Saakaşvilinin xarakterindən irəli gəlib".
Məhəmmədəli QƏRİBLİ
