Ramil Hüseynov: "Növbəti seçkilərdə üstünlük əldə etmək baxımından partiyanın yenilənməsi vacibdir"
Ədalət və İnkişaf Partiyasının (AKP) qrup toplantısında Türkiyə prezidenti Rəcəb Tayyib Ərdoğan geniş çıxış edərək bir sıra aktual məsələlərə toxunub. Diqqətçəkən məqamlardan biri də odur ki, Ərdoğan partiyanın yerli təşkilatlarının yenilənməsinə toxunub.
Onun bununla bağlı açıqlamasından məlum olub ki, 2019-cu ilə qədər partiyada ciddi yenilənmə olacaq: "Biz ilk növbədə özümüzü, partiyamızı yeniləməliyik. Son günlər "cihad" deyildiyi eşidilir. Cihad silahla deyil, ilk növbədə nəfslə mübarizə aparmaqdır. İnanıram ki, nəfsimizlə apardığımız mübarizə ilə yenidən özümüzü təzələyəcəyik, xalqımızın dəstəyini heç vaxt itirməyəcəyik. Nə zaman "status-kvo"nu qorumağa çalışacağıq, deməli, o zaman yolun sonuna gəlmişik. Hər zaman yenidən mübarizə ruhunda olmalıyıq. Yalnız bu halda 2019-da istədiyimiz nəticəni əldə edəcəyik. AKP-nin uğuru Türkiyənin uğuru olacaq. Yenilənmə prosesini aparmalıyıq. Bunun üçün qurultaya hazırlıq prosesini başlatmışıq. AKP-nin hansı yerli təşkilatları bizim ideyalarımız, davamız uğrunda mübarizə aparmırsa, bizə ziyan verir. Biz buna yol verə bilmərik. 2019-cu il bir qırılma nöqtəsidir. Parlament seçkilərini qazanmaq bizim üçün asan məsələdir. 2019-cu ildə prezident seçkilərində 50+1 səs almalıyıq. Bunun məsuliyyəti də böyükdür, ölkə üçün daha çox xidmət etməliyik".
Maraqlıdır, hakim partiyada nə baş verir? Sözügedən islahatların aparılması nədən irəli gəlir?
Məsələyə münasibət bildirən Vətəndaş və İnkişaf Partiyasının sədr müavini Ramil Hüseynov bunu bir sıra amillərlə əlaqələndirdi: "Məsələ ondadır ki, AKP-nin monolit olmağında Ərdoğanın xarizmasının rolu böyükdür. O prezident seçiləndən sonra partiyanı nəzarətdə saxlasa da, digərləri onun kimi güclü deyil. Hər halda reallıq ondan ibarətdir ki, Binəli Yıldırım nüfuzuna görə Ərdoğan səviyyəsində ola bilməz. Bir şeyi nəzərə almaq lazımdır ki, ötən ilin 15 iyulunda Türkiyədə baş verən məlum hadisələr AKP-yə də təsirsiz ötüşmədi. Hadisələrdən sonra məlum oldu ki, hakim partiyada Gülən tərəfdarları var. Görünür, Ərdoğan partiyanı gücləndirmək və monolitliyini qoruyub saxlamaqdan ötrü bu kimi islahatlarda maraqlıdır. Çünki indiki dönəmdə bu onun üçün çox vacib əhəmiyyət kəsb edir. Bir məqamı unutmaq olmaz ki, Gülən tərəfdarları AKP-nin 2002-ci ildə hakimiyyətə gəlməsinə dəstək verib. Bir müddət tərəflər arasında münasibətlər çox yaxşı olub. O üzdən, Ərdoğan çalışır ki, partiyada ola biləcək bu cür qruplar tam zərərsizləşdirilsin. Həm də növbəti seçkilərdə üstünlük əldə etmək baxımından partiyanın yenilənməsi vacibdir".
Vidadi ORDAHALLI
