Bu gün Qərb ölkələrinin Türkiyəyə mənfi münasibət sərgiləməsi heç kimə sirr deyil. Türkiyənin terrorçu hesab etdiyi PKK-ya, onun törəmələrinə verilən sığınacaq, göstərilən dəstək qeyd edilənlərin real təsdiqidir. Eyni zamanda Qərb ölkələri Suriyadan olan qaçqınlarla da bağlı Ankaraya verdikləri vədləri yerinə yetirməkdən yayınır. Bunun əvəzində onların Türkiyənin daxili işlərinə daha çox müdaxilə cəhdləri də özünü qabarıq büruzə verir.
Son günlərdə baş verənlər fonunda Almaniyanın Türkiyəyə qarşı qərəzli siyasət yürütməsi özünü daha aydın şəkildə büruzə verir. Hətta iş o yerə çatıb ki, Almaniya qardaş ölkəyə qarşı sanksiyalar tətbiq etməyə başlayıb. Belə ki, Almaniya Türkiyəyə qarşı silah və onun ehtiyat hissələrinin ixracının dayandırılması ilə bağlı sanksiya tətbiq edib. Məlumatlara görə, Almaniya ilk növbədə hərbi işbirliklərini dondurub, silah və hərbi avadanlıqların satışını təxirə salıb.
Qeyd edək ki, Almaniya ilə Türkiyə arasında münasibətlər son iki il ərzində gərginləşib. Bu fonda alman qoşunlarının Türkiyənin "İncirlik" aviabazasından çıxarılması davam edir. Almaniyanın "Der Spiegel" nəşrinin Müdafiə Nazirliyindəki mənbəyə istinadla məlumatına görə, 10 gün əvvəl havada yanacaq dolduran "Airbus A310 MRTT" təyyarəsi İordaniyadakı aviabazaya yollanıb. Bu günə kimi Türkiyədəki aviabazanı təyyarələrə xidmət edən təqribən 20 nəfər tərk edib.
"İncirlik" aviabazasında təqribən 260 alman hərbi qulluqçu, xüsusi optika ilə təchiz edilmiş 6 "Tornado" kəşfiyyat təyyarəsi və 1 havada yanacaq dolduran təyyarə olub. Onlar İŞİD terrorçu qruplaşmasının Suriyadakı və İraqdakı mövqelərinə havadan zərbələri dəstəkləyiblər. Bundan sonra isə Almaniya aviasiyası və döyüş kontingenti İordaniyada yerləşəcək və beynəlxalq antiterror koalisiyasının əməliyyatlarında iştirak etməyə davam edəcək. Almaniya hərbçiləri Türkiyə ərazisini iyulun sonuna qədər tərk etməlidir. Plana görə, qoşunların tam köçürülməsi oktyabr ayında başa çatmalıdır.
Bundesver qoşunlarının çıxıb getməsinə Almaniya Bundestaqının qalmaqallı qətnaməsi səbəb olub. Qətnaməyə görə, 1915-ci ildə Osmanlı İmperiyasında baş vermiş hadisələr "erməni xalqının soyqırımı" kimi tanınıb. Buna cavab olaraq, Türkiyə hökuməti Almaniya parlamenti deputatlarının "İncirlik"də yerləşən hərbi kontingentə baş çəkməsinə qadağalar qoyub. Berlinin 2016-cı ilin iyulunda baş tutmayan qiyamdan sonra ölkədən qaçmış türkiyəli hərbçilərə siyasi sığınacaq verməsi isə buna daha bir səbəb olub. Türkiyə bu fonda Almaniyanı terrorizmi, o cümlədən PKK terror təşkilatının Suriya qolu sayılan YPG təşkilatını dəstəkləməkdə ittiham edib.
Baş verənlərin ardınca Almaniyanın xarici işlər naziri Ziqmar Qabriel Türkiyəyə səfər edən ölkə vətəndaşlarını ehtiyatlı olmağa çağırıb. O, hüquqi təminatların olmadığı bir ölkəyə sərmayə yatırmağı heç kimə tövsiyə etmədiklərini deyib: "Türkiyə siyasətimizə yeni bir istiqamət verməliyik. Türkiyədə yaşanan hadisələrə laqeyd qala bilmərik. Gələcəkdə Türkiyə ilə yaxşı əlaqələr qurmaq istəyirik, amma "tanqo"nu 2 nəfər oynayır". Türkiyə prezidentinin mətbuat katibi İbrahim Kalın isə bu açıqlamalara sərt reaksiya verib: "Almaniyanın bəyanatları ikitərəfli əlaqələri fəda etmək deməkdir, belə bir şeyə əsla imkan vermərik! Türkiyədəki Almaniya vətəndaşlarının təhlükəsizlikdə olmadıqları, Türkiyədəki Almaniya firmalarının tərəddüd etdikləri, narahat olduqlarına dair bəyanatları kəskin şəkildə pisləyirik. Bu mümkün deyil. Bu günə qədər hər hansı bir Almaniya firmasına qarşı təhqiqat aparılıbmı? Haqsızlıq edilibmi? Belə bir şey yox ikən bunu ortaya atmaq əlaqələri fəda etmək deməkdir, buna əsla razı ola bilmərik. Kiçik siyasi hesablarla iqtisadi əlaqələri zədələmək, Türkiyədəki alman investorların beyinlərində tərəddüd yaratmağa çalışmaq qəbuledilməzdir. Biz Türkiyədəki Almaniya sərmayələrinin təhlükəsizlikdə olduğunu deyirik. Alman turistlər qonaqlarımızdır. Can və mal təhlükəsizlikləri bizə əmanətdir.
Almaniya vətəndaşlarının hamısını tərəzinin eyni gözünə qoymaq siyasi məsuliyyətsizlikdir. Qəbul etmirik. Biz Almaniya ilə əlaqələrimizin yaxşı olmasını istəyirik. Qarşılıqlı hörmət və maraqlar çərçivəsində". Bu arada isə, digər məlumatlara görə, Almaniya Türkiyənin daxili işlərinə müdaxilə etmək üçün ikili vətəndaşlığı olan türklərə qalmaqal yaradacaq təklif edib. Belə ki, Almaniya hökuməti onlardan "Türkiyədə saxlansaq, ya da həbs olunsaq, Almaniyanın bizə sahib çıxmasını istəyirik" şəklində ərizə yazmalarını istəyib. Almaniya bu yolla Türkiyədəki həbslərə müdaxilə etməyə çalışır. Türkiyə KİV-nin yazdığına görə, Berlin Türkiyədən qaçan 220-yə qədər FETÖ-çüyə sığınacaq verib. Bununla da kifayətlənməyən Berlin təşkilatın Almaniyada lobbi fəaliyyətinə dəstək verir ki, beləliklə də Ankaraya qarşı qərəzli münasibətini açıq şəkildə meydana qoymuş olur. Ankara isə bunlara qarşı lazımi addımlar atacağını gizlətmir.
Tahir TAĞIYEV
