Xaqani Cəfərli: “Çox böyük ehtimalla bu hadisələr İranla sülh prosesinin tərkibi olacaq”
İran və ABŞ arasında müvəqqəti atəşkəsə baxmayaraq, İsrailin hücumlarını davam etdirdiyi Livan, Hizbullahı tərksilah etmək üçün ABŞ-dan hərbi yardım istəməyi planlaşdırır. İsrailin 12-ci Kanal televiziyasının Livan mənbəsinə istinadən verdiyi məlumata görə, Beyrut hökuməti əvvəlcə atəşkəs tələb etməyi planlaşdırır. Livanlı mənbə qeyd edib ki, Beyrut hökuməti Hizbullah tərksilah edilməzdən əvvəl dərhal atəşkəs tələb edəcək və Hizbullahın tərksilah edilməsi üçün ABŞ-dan hərbi yardım istəyəcək. Mənbə bildirib ki, onlar 2023-cü ilin oktyabr ayından bəri İsrailin hücumları nəticəsində viran qalan ölkənin yenidən qurulması üçün ABŞ-dan iqtisadi yardım paketi tələb edəcəklər. Bundan əvvəl İsrail və Livan arasında birbaşa danışıqlara başlanacağı açıqlanmışdı. Livanlı mənbə qeyd edib ki, Beyrut hökuməti Hizbullah tərksilah edilməzdən əvvəl dərhal atəşkəs tələb edəcək və Hizbullahın tərksilah edilməsi üçün ABŞ-dan hərbi yardım istəyəcək. ABŞ Livana bu köməyi göstərsə, İranla sülh prosesinin gələcəyi necə olacaq? Politoloq Xaqani Cəfərli baki-xeber.com-a bildirdi ki, Hizbullah Hərəkatının tərki-silah edilməsi ilə bağlı BMT Təhlükəsizlik Şurasının qərarı var. “İranın dəstəklədiyi hərəkat BMT Təhlükəsizlik Şurasının qətnamsəini yerinə yetirməkdən yayınır. Livan ordusunun isə Hizbullah Hərəkatını buna vadar etməyə gücü yoxdur. Ona görə də Hizbullah Hərəkatının tərki-silah edilməsi üçün kənar dəstəyə ehtiyac var. İrana qarşı əməliyyatlardan sonra Hizbullahın tərki-silah edilməsi daha da aktuallaşıb. Livan hökuməti və ordusu bu vəzifəni həyata keçirə bilmədiyi üçün ABŞ-dan hərbi yardım istəmək məcburiyyətindədir. Hizbullah Hərəkatının tərki-silah edilməsi İsrailin Livana qarşı hərbi əməliyyatlarına son qoya bilər. Əgər Hizbullah Hərəkatının tərki-silah edilərsə, bu bütün Yaxın Şərqdə gərginliyin azalmasına çox böyük təsir edə bilər. Hizbullah Hərəkatının tərki-silah edilməsi, Qəzzanın HƏMASdan təmizlənməsi yeni vəziyyət yarada bilər”. X.Cəfərlininin sözlərinə görə, əlbətdə, İran bunların olmasını istəmir. X.Cəfərli hesab edir ki, ancaq İranın nə istəməsindən asılı olmayaraq HƏMAS, Hizbullah Hərəkatı kimi təşkialtların mövcudluğunu uzun müddət davam etdirməsi artıq mümkün deyil: “Çox böyük ehtimalla bu hadisələr İranla sülh prosesinin tərkibi olacaq”. İradə SARIYEVA
