Aytən Rəhimli: “Bu mərasimi İran dövləti özü təşkil edib”
Tural İrfan: “Belə də izah edirlər ki, guya Amerika və İsrailin hücumundan ehtiyat edilib və həmin mərasimi kilsədə keçiriblər”
Sosial şəbəkələrdə və mediada İranın keçmiş ali dini rəhbəri Əli Xameneinin 40 mərasiminin Tehranın Müqəddəs Sarkis kilsəsində keçirildiyini əks etdirən videogörünrülər yayılıb.
Digər xəbərlərə görə, mərasim erməni icmasının nümayəndələri tərəfindən təşkil olunub. Tədbirdə dini ayinlər icra edilib və müxtəlif çıxışlar səsləndirilib.
Məlumata görə, Tehrandakı erməni kilsəsində keçirilən mərasimdə İran hökumətinin bir sıra rəsmi şəxsləri, o cümlədən mədəniyyət naziri də iştirak edib.
Seyid Əli Xamenei fevralın 28-də ABŞ və İsrail hərbi hava qüvvələrinin endirdiyi zərbələr nəticəsində həlak olub.
İranın keçmiş ali dini liderinin 40 mərasiminin Tehrandakı erməni kilsəsində qeyd edilməsi təəccüb doğurub. Bu mərasimin erməni kilsəsində təşkil edilməsinin səbəbləri barədə deyilir ki, İsrailinin İranı növbəti dəfə vuracağından əndişələndikdən Xameneinin 40 mərasimi məhz erməni kilsəsində keçirilib. Yeri gəlmişkən görüntülər yayılan kimi bəziləri bunun süni zəka vasitəsilə Xameneinin ruhunu təhqir etmək üçün hazırlandığını iddia etdi, yayılan xəbərlər və ekspert fikirləri, İran mediasının yazdıqları bunun həqiqət olduğunu göstərib.
Tədqiqatçı Aytən Rəhimli baki-xeber.com-a bildirdi ki, yayılan görüntülər gerçəkdir. “Yayılan görüntülər doğrudur. Bu Tehrandakı Müqəddəs Sarkis kilsəsində baş verib. Bu mərasimi İran dövləti özü təşkil edib. Yəni kimlərin, hansı təşkilatların Xamenei üçün 40 mərasimi keçirməsini dövlət özü müəyyən edib. Bunun keçirilməsində məqsəd erməni toplumunun İran hökumətinə nə qədər sadiq olduğunu göstərmək və onlara verilən imtiyazlara görə hökumətə təşəkkür etmək üçün belə bir mərasim təşkil ediblər. Orada İrşad naziri, parlament üzvləri də iştirak ediblər”.
A.Rəhimli hesab edir ki, İran hökuməti Xamenenin 40 mərasiminin kilsədə də keçirilməsinə tapşırıq verməklə erməni əhalinin onlara nə qədər sadiq olduğunu, onları dəstəklədiyini göstərmək istəyib.
Milli Cəbhə Partiyasının sədr müavini, ilahiyyatçı Tural İrfan baki-xeber.com-a bildirdi ki, Xamenein erməni kilsəsində 40 mərasimin keçirilməsi barədə videogörüntülər yayılıb, amma bunun nə dərəcədə doğru olduğu məlum deyil, amma həqiqət də ola bilər. “Çünki burada görünür ki, xristian dünyasının mərhəmət hissini qabartmaq, İran hakimiyyətinin tolerant olduğunu göstərmək üçün görüntü xatirinə ola bilsin, bu mərasim kilsədə keçirilib. Ancaq İranda erməni kilsəsindən başqa kilsələr də, eyni zamanda atəşpərəstlərin məbədləri də, yəhudilərinin sinaqoqları da var. Eyni zamanda məscidlər mövcuddur. Bu qədər yerlərin içindən erməni kilsəsinin seçilməsi Amerikanın, Avropanın, xristian dünyasının diqqətini cəlb etmək üçündür ki, İran hakimiyyəti toletantdır, dinlər arasında heş bir fərq qoymur. Bunun xristian dünyasının diqqətini çəkmək üçün edildiyi də deyilir.
Ancaq belə də izah edirlər ki, guya Amerika və İsrailin hücumundan ehtiyat edilib və həmin mərasimi kilsədə keçiriblər. Yəni onlar kilsəni vurmazlar Bu da o qədər ağlabatan deyil. Çünki müqəddəs yerlər mövcuddur. 40 mərasimini İmam Rzanın məscidində keçirsəydilər ora bütün müsəlman aləminin diqqətində olan məkandır və cəsarət edib oranı vura bilməzdilər. Hər bir halda o mərasimin orada keçirilməsi ilə bağlı müxtəlif variantlar ola bilər”-deyə T.İrfan bildirdi.
İradə SARIYEVA
