Ramil Hüseynov: “Zaxarovanın açıqlaması boş və real gücə söykənməyən bir bəyanatdır”
Rusiya Xarici İşlər Nazirliyinin sözçüsü Mariya Zaxarova bəyan edib ki, Moskva ABŞ və İsraildən xaricdəki Rusiya müəssisələrinin təhlükəsizliyinə zəmanət vermələrini tələb edir. Zaxarova Ayətullah Əli Xameneinin və İranın bir sıra rəhbər şəxslərinin öldürülməsini “alçaqcasına törədilmiş qətllər” adlandırıb.
Rusiya XİN rəsmisi həmçinin ABŞ prezidenti Donald Trampın rəhbərlik etdiyi Vaşinqton administrasiyasını və İsraili özbaşınalıqda ittiham edərək, Yaxın Şərqin xaos uçurumuna daha dərindən sürükləndiyini bildirib: “Xəyali “İran təhlükəsi” yalnız Tehranda konstitusiya quruluşunun zorla devrilməsi planını həyata keçirmək üçün bir bəhanə idi”.
Göründüyü kimi, Rusiya bununla İranın yanında olduğunu göstərir.
Sözügedən məsələni baki-xeber.com-a şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, Rusiyanın İranla bağlı belə açıqlaması yetərli deyil: “Fakt odur ki, Rusiya bir-bir strateji tərəfdaşlarını itirir, amma bunu önləmək üçün Moskvanın əlindən heç nə gəlmir. 2024-cü ilin dekabrında Suriyada Bəşər Əsəd rejimi devrildi. 2026-cı ilin yanvarında Putinin dostu Venesuela prezidenti Maduro Birləşmiş Ştatlar tərəfindən oğurlanaraq həbs edildi. İndi də İran hədəf alınıb. Ancaq Rusiyanın nazirləri bunu pisləmək əvəzinə, Zaxarova kimi nazirlik sözçüsü buna münasibət bildirir. Halbuki, mövzu İran olduğu üçün Rusiyadan daha sərt bəyanatın olacağı gözlənilir. Rusiya tarix boyu dar məqamda müttəfiqlərini satıb. Bu dəfə də bənzər proseslərin şahidi oluruq. Bəzi gözləntilər var idi ki, Rusiya İranı hava zərbələrindən qorumaq üçün lazımi vasitələri verəcək. Ən azından ötən ilin iyununda 12 günlük müharibənin yaratdığı boşluqları doldurmaq üçün İrana yardım edə bilərdi. Ancaq bu, baş vermədi. Rusiya İranla bağlı heç BMT Təhlükəsizlik Şurası çərçivəsində belə, hət hansı təşəbbüslə çıxış etmir və yaxud da Trampın qəzəbindən buna cəsarət etmir. Ona görə də Zaxarovanın açıqlaması boş və real gücə söykənməyən bir bəyanatdır. Məgər ABŞ-ın İrandakı hakimiyyəti devirmək istəyi yenidir ki? 47 ildir ABŞ İrandakı hakimiyyəti devirmək istəyir. Hesab edirəm ki, gedən müharibə fonunda İranda Qərbə yaxın olan bir rejim qurulsa, bunun Rusiya üçün siyasi, iqtisadi nəticələri ağır olacaq. Rusiyanın regiondakı təsirinə güclü zərbə olacaq”.
Vidadi ORDAHALLI
