Xaqani Cəfərli: "Azərbaycan da hər cür təxribata hazır olmalıdır"
NATO-nun Şərqi Aralıq dənizində yerləşdirilmiş hava hücumundan müdafiə və raketdən müdafiə sistemləri İran tərəfindən buraxılan və Türkiyə hava məkanına doğru istiqamətlənən ballistik raketi zərərsizləşdirib. Bu barədə Türkiyənin Müdafiə Nazirliyi 4 mart tarixində məlumat yayıb. Bildirilib ki, raket Suriya və İraq üzərindən keçdikdən sonra vaxtında NATO sistemləri tərəfindən ələ keçirilib. Raketin qalıqlarından biri Hatay vilayətinin Dörtyol rayonuna düşüb, lakin xəsarət alan olmayıb.
Türkiyə rəsmiləri ölkəyə qarşı yönələn istənilən düşmən addımına cavab vermək hüququnu saxladıqlarını bəyan ediblər və ərazi ilə hava məkanının qorunması üçün bütün zəruri tədbirlərin görüləcəyini vurğulayıblar. Hadisədən sonra Türkiyənin xarici işlər naziri Hakan Fidan iranlı həmkarı ilə telefon danışığında Tehrana eskalasiyaya səbəb ola biləcək addımlardan çəkinmək barədə xəbərdarlıq edib.
NATO da İranın Türkiyə istiqamətində raket buraxdığını təsdiqləyərək bu addımı pisləyib və alyansın Türkiyə də daxil olmaqla bütün müttəfiqlərinə dəstəyinin sarsılmaz olduğunu bildirib. Pit Heqset isə raketin vurulmasının NATO-nun kollektiv müdafiə ilə bağlı 5-ci maddəsinin tətbiqi üçün əsas yaratmadığını qeyd edib.
Ekspertlərin fikrincə, İran ordusu həmin raketlə Aralıq dənizində yerləşən ABŞ və Böyük Britaniyanın hərbi bazalarını hədəfə almağı planlaşdırıb. Lakin ABŞ-ın Aralıq dənizindəki hava hücumundan müdafiə sistemləri raketi Türkiyə üzərində, mənzil başına çatmamış vurub. Buna görə də raketin qalıqları Türkiyə ərazisinə düşüb.
İranın Türkiyəni raketlə həqiqətən vurmaq planı olub-olmadığı və ya bunun təsadüf nəticəsində baş verib-vermədiyi isə hələ də dəqiq məlum deyil.
Bu mövzud "Bakı-Xəbər" nəşrinə fikrlərini bildirən politoloq Xaqani Cəfərli deyir ki, bölgədə iri miqyaslı hərbi əməliyyatlar gedir və qonşu ölkələrin də bundan təsirlənməsi istisna deyil. Ekspertin fikrincə Türkiyə hava məkanına yönəlmiş ballistik raket də bunun göstəricisidir: "Məntiqlə İran Türkiyə ərazisini vurmaqda maraqlı olmamalıdır. Ancaq hərbi əməliyyatlar zamanı məntiq işləmir. Bu mənada Türkiyə hava məkanına yönəlmiş ballistik raketin təxribat məqsədilə atıldığı da, texniki səbəbdən ola biləcəyi də istisna deyil. Üstəlik, Türkiyənin ərazsiində ABŞ-ın (NATO) hərbi bazalarının olması, İsrailin neft təlbatının 35-40 faizini qarşıyan Bakı-Tiflis-Ceyhan boru xəttinin Türkiyə ərazsindən keçməsi də İranın radikal dairələrində qəzəb yaradır. İstisna deyil ki, Türkiyə hava məkanına yönəlmiş ballistik raket də bu infrstrukturlara qarşı yönəlib. Rəsmi Ankaranın sərt reaksiyası da göstərir ki, Türkiyə rəsmiləri məhz bu ehtimalı daha əsaslı hesab edirlər.
Türkiyənin xarici işlər naziri Hakan Fidan iranlı həmkarı ilə telefon danışığında Tehrana eskalasiyaya səbəb ola biləcək addımlardan çəkinmək barədə xəbərdarlığı effektli olmaya bilər. Ölüm qorxusu ilə davranan teokratik rejim hər şeyi, hər kəsi məhv etmək istəyir. Öz xalqını, dövlətini, vətənini fəlakətə atan rejimdən hər çür addım gözləmək olar. Rejimin çöküşü yaxınlaşdıqca o daha da təhlükəli ola bilər. Buna görə bölgə ölkələrinin hər biri ehtiyatlı olmalıdır. İranın təxribatı ilə üzləşmə ehtimalı ən az olan ölkə Azərbaycan olsa da, Azərbaycan da hər cürə təxribata hazır olmalıdır."
Akif NƏSİRLİ
