Elşad Həsənov: “Bu çətin, qarışıq zamanda sərhədlərin bağlı qalması daha məqsədəuyğundur”
Azərbaycanın quru sərhədlərinin bağlı olması ölkəmizi çox böyük fəlakətlərdən qorudu. Bu baxımdan sərhədlərin bağlı saxlanılması uzaqgörən siyasətin göstəricisi olduğu şübhə doğurmur. Ekspertlər bildirirlər ki, quru sərhədlərimiz açıq olsaydı biz daha böyük hadisələrlə üz-üzə qala bilərdik. Həm 12 günlük İran-İsrail müharibəsində, həm də hazırda ABŞ və İsrailinin İrana qarşı davam etdirdiyi müharibəsində ziyan çəkə bilərdik. Söhbət qaçqın axınından, söhbət terrordan, daha neçə-neçə ağlagəlməz fəlakətlərdən gedir ki, biz onlardan xilas olunduq.
Azərbaycanın quru sərhədlərinin bağlı olması nələrin qarşısını aldı?
Quru sərhədlərimizin bağlı saxlanmasının əhəmiyyəti nə oldu?
Siyasi ekspert Elşad Həsənov baki-xeber.com-a bildirdi ki, bunun təhlükəsizlik, əmin-amanlıq baxımından əhəmiyyəti çox böyükdür. “Artıq 6 ildir ki, Azərbaycanın quru sərhəddləri bağlıdır. Sərhədlərin bağlanması da Azərbaycanın daxili sabitliyinin qorunması, daxili təhlükəsizliyinin təmin olunması üçün atılan məcburi addım idi. Çünki sərhəddlər açıq olan zaman xaricdən Azərbaycanın daxili işlərinə qarışmaq istəyən, Azərbaycanı öz təsirinə salmaq istəyən ölkələr ölkəmizə müxtəlif təsirlər etməyə çalışırdı. Məhz elə həmin dövrdə dünyaya COVİD-19 yayıldı və Azərbaycan da quru sərhəddlərini bağladı. Bundan sonra doğrudan da Azərbaycanda sabitlik, inkişaf oldu və daxili təhlükəsizlik təmin edildi. Məhz elə həm keçən ilin iyununda baş verən 12 günlük müharibə, həm də son İran müharibəsi fonunda onu demək lazımdır ki, Azərbaycan öz daxili sabitliyini qoruyur, xalqımızın inkişafını təmin edir. Quru sərhədlər açıq olsaydı Azərbaycanı çox böyük fəlakətlər gözləyə, müxtəlif problemlər ola, qaçqın axını gələ bilərdi. Bütün bunların sivil qaydada qarşısı alındı. Yəni Azərbaycan əhalisinin təhlükəsiz yaşaması üçün tədbirlər həyata keçirildi”.
E.Həsənov qeyd etdi ki, sərhədlərin bağlı olması əhali üçün müəyyən çətinliklər yaratsa da, ancaq bu çətinlik daxili sabitliyin qorunması naminə olduğuna görə xalq və dövlət olaraq daha böyük qazanc əldə edirik.
“Sərhədlərin bağlı olmasına görə qazandıqlarımız itirdiklərimizdən daha çoxdur. Dünya bir-birinə qarışıb və bu halda da Azərbaycanda sabitliyin hökm sürməsi məhz bu şərtlər daxilində aparılır. Ona görə də hesab edirəm ki, dünyada vəziyyət sabitləşənə qədər sərhəddlərin bağlı daha məqsədəuyğundur. Sərhədlər açıq olsa ölkə qarışsa bu dövlətin problemləri daha çox ola, xalq daha çox əziyyət çəkə bilər, nəinki sərhədlər bağlı olduğu halda.
Hər bir vətəndaş dərk etməlidir ki, Azərbaycanın daxili sabitliyini qorumaq, ölkənin inkişafını təmin etmək üçün bu çətin, qarışıq zamanda sərhədlərin bağlı qalması daha məqsədəuyğundur.
Bu ölkədə terror hadisələrinin qarşısını alan əsas şərtlərdən biridir. Dünya getdikcə qarışır, İran ətrafında vəziyyət daha da gərginləşir, üçüncü dünya müharibəsinin baş verməsi artıq reallığa çevrilir. İranın Körfəz Ölkələrinə, eyni zamanda NATO dövləti olan Türkiyəyə raket atması arealı daha da genişləndirir. Bu genişləndikcə Azərbaycana da problemlər yarada bilər. Bu səbəbdən də sərhədlərimizin bağlı olması həm də Azərbaycana bu gərginliyin keçməsinin qarşısını alır”-deyə E.Həsənov qeyd etdi.
İradə SARIYEVA
