Təbriz Musayev: “165 uşağın ölümünə daimi üzvlərin susqun yanaşmasının kökündə dərin səbəblər var”
ABŞ prezidenti Donald Trampın həyat yoldaşı Melaniya Tramp BMT Təhlükəsizlik Şurasının silahlı ünaqişələrdə uşaqlar mövzusuna həsr olunmuş iclasına sədrlik edib. Tədbir 2 mart bazar ertəsi günü Nyu-Yorkda ABŞ və İsrailin İrana qarşı hərbi əməliyyatı fonunda baş tutub.
Birinci xanım hazırkı dövrü "çətin" adlandırıb. "Birləşmiş Ştatlar bütün dünyada bütün uşaqların yanındadır", - deyə Melaniya Tramp vurğulayıb və konkret olaraq Yaxın Şərqdəki münaqişədən deyil, ümumi vəziyyət haqqında danışdığını açıqlayıb. "Ümid edirəm ki, tezliklə sizə sülh veriləcək", - deyə o əlavə edib.
İranın BMT-dəki Daimi nümayəndəsi Əmir Səid İrəvani isə tədbirdən öncə ABŞ-ın BMT Təhlükəsizlik Şurasına sədrliyini və ABŞ ordusu İran şəhərlərini atəşə tutarkən uşaqların qorunması ilə bağlı iclas keçirməsini "dərin rüsvayçılıq” adlandırıb.
Ümumilikdə, Melaniyanın uşaqların qorunması ilə bağlı fikirləri yaxşıdır. Ancaq maraqlı olan odur ki, Təhlükəsizlik Şurasının üzvü olan heç bir ölkə xüsusi bir bəyanatla çıxış etmədi. Yəni İranın Minab şəhərində məktəbə endirilən zərbə nəticəsində ölən 165 uşaq barəsində danışılmadı. TŞ üzvü olan heç bir ölkə buna toxunmadı. Ümumilikdə, uşaqların qorunması ilə bağlı siyasət, verilən bəyanatlar normaldır. Ancaq Melaniyanın tədbirə rəhbərlik edərkən “ABŞ bütün uşaqların yanındadır” deməsi və İranda 165 uşağın eyni məktəbdə öldürülməsi bir-biri ilə uzlaşmayan təzahürlərdir. TŞ-nin üzvlərindən heç biri necə oldu bu uyğunsuzluqla bağlı xüsusi bir açıqlama ilə çıxış etmədi?
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayev hesab edir ki, bütün bunlar əslində beynəlxalq hüququn böhran keçirməsinin göstəricisidir: “Məsələ ondadır ki, İkinci Dünya müharibəsindən sonra qurulan dünya nizamı hazırkı tələblərə cavab vermir. Dünyanın taleyinin BMT Təhlükəsizlik Şurasının 5 daimi üzvü tərəfindən müəyyən edilməsi yanlış siyasi qərar idi. O üzdən, əvvəl-axır belə paradoksal vəziyyətin yaranacağı gözlənilən idi. TŞ-nin daimi üzvü olan Rusiya 4 ildir Ukraynada işğalçı müharibə aparır. Rusiya müharibə dövründə Ukraynadan 20 min nəfərə yaxın uşaq oğurlayıb və indiyə qədər onların böyük əksəriyyətini geri qaytarmayıb. Baxmayaraq ki, ukraynalı uşaqların taleyi bütün beynəlxalq qurumların diqqət mərkəzindədir. O baxımdan Rusiya kimi ölkədən Minabda raket zərbəsi nəticəsində ölən 165 uşaqla bağlı hansısa bəyanat gözləmək sadəlövhlük olar. Digər TŞ üzvü olan Çin bu kimi məsələlərdə onsuz da heç vaxt konkret mövqe ortaya qoymayıb. Pekin hər zaman ABŞ-la olan böyük ticarət dövriyyəsinə önəm verib. TŞ-nin daimi üzvü olan Böyük Britaniya demək olar hər zaman ABŞ-ın yanında olub, Vaşinqtonun siyasətinə dəstək verib. Digər üzv Fransaya gəldikdə isə, bu ölkə yaxın tarixdə Ruandada milyonlarla insanın soyqırıma məruz qalmasına bilavasitə bais olub. Belə bir ədalətsiz dünya nizamı mövcuddur. Həmin daimi üzvlər 1993-cü ildə Azərbaycan ərazilərinin Ermənistan tərəfindən işğal edilməsinə dair BMT-nin 4 qətnaməsinə səs verdilər. Ancaq sözügedən qətnamələr sadəcə bir kağız parçası oldu. Bir dəfə belə onların icrasına təşəbbüs göstərilmədi. Bax budur 165 uşağın ölümünə daimi üzvlərin susqun yanaşmasının kökündə dayanan səbəb. Yəni bunun kökündə dərin səbəblər var”.
Vidadi ORDAHALLI
